ក្រុមម្ចាស់ផ្ទះ Bayern បានត្រៀមខ្លួនរួចជាស្រេចក្នុងការស្វាគមន៍សត្រូវចាស់ Real Madrid ក្នុងជំនួបឆេមពានលីគវគ្គពាក់កណ្តាលផ្តាច់ព្រ័ត្រជើងទី១ នៅវេលាម៉ោង១និង៤៥នាទីរាត្រីរំលងអាធ្រាត្រនេះ ។ ក្រុម Bayern ដែលស្ថិតក្រោមការដឹកនាំរបស់លោក Heynckes ហាក់ផ្លាស់ប្តូរទម្រង់លេងល្អច្រើននារដូវកាលនេះ និងបច្ចុប្បន្នកំពុងត្រៀមខ្លួនគ្រងជាម្ចាស់ជើងឯកអាល្លឺម៉ង់ប៊ុនដេស្ល៊ីហ្កា បន្ទាប់ពីដាច់ពិន្ទុឆ្ងាយពីក្រុមលេខ២ Schalke រហូតដល់២២ពិន្ទុ ។
ចំពោះការបង្ហាញខ្លួននៅឆេមពានលីគ៤ឆ្នាំចុងក្រោយ Bayern បានឡើងមកដល់វគ្គនេះ៣ដងជាប់គ្នាចាប់តាំងពីរដូវកាល២០១៣-២០១៤ ដល់២០១៥-២០១៦ ប៉ុន្តែមិនទទួលបានជ័យជម្នះឡើងទៅវគ្គបន្តនោះទេ ខណៈរដូវកាលមុនពួកគេត្រូវហាលអាវត្រឹមវគ្គ៨ក្រុមពេលប៉ះ Real Madrid ។
ម្យ៉ាងទៀត Bayern ធ្លាប់ត្រូវបានក្លិបស្តេចសតាមលត់ដល់ទឹកដីខ្លួនឯងដោយលទ្ធផល៤ទល់នឹង០ កាលពីជំនួបវគ្គពាក់កណ្តាលផ្តាច់ព្រ័ត្រឆ្នាំ២០១៤ ។ ទោះបីយ៉ាងណាជំនួបយប់នេះ Bayern មានសង្ឃឹមច្រើនដោយសារតែកូនក្រុមពួកគេអាចនឹងខកខានប្រកួតតែកីឡាករ Kingsley Coman និង Arturo Vidal ប៉ុណ្ណោះ ។
ក្រុមភ្ញៀវ Real Madrid ដែលជាក្រុមជើងឯកចាស់ នៅតែរក្សាទម្រង់លេងដ៏ខ្លាំងក្លារបស់ខ្លួនសម្រាប់ការប្រកួតធំៗ បើទោះជាមានបញ្ហាខ្លះពេលលេងនៅក្នុងលីគ ។ Real Madrid ហាក់ស្គាល់ពីប្រព័ន្ធលេងរបស់ Bayern កាន់តែច្បាស់បន្ទាប់ពីប៉ះគ្នាច្រើនលើកមក ។ ទន្ទឹមនឹងនេះ Ronaldo គឺជាកីឡាករដែលតែងតែអាចរកគ្រាប់បាល់បានជូនក្រុមជានិច្ច ដែលជាហេតុធ្វើឱ្យម្ចាស់ផ្ទះពិបាកនឹងទប់ទល់ ។
ដូច្នេះ Real Madrid នឹងមិនញញើតក្នុងការទៅលេងនៅទឹកដី Bayern ឡើយ ស្របពេលកូនក្រុមរបស់ខ្លួនពុំមានកីឡាករសំខាន់រូបណាអវត្តមាននោះទេ ៕
ចែករំលែកព័តមាននេះ