ខេត្តសៀមរាប ៖ ក្រុមការងារចម្រុះរួមមាន មន្ត្រីជំនាញនៃអាជ្ញាធរជាតិអប្សរា ប៉ូលិសបេតិកភណ្ឌ អាជ្ញាធរមូលដ្ឋានជាច្រើនរូប បានចុះពិនិត្យមើលការកាប់ទន្ទ្រានព្រៃនៅក្នុងឧទ្យានអង្គរ នារសៀលថ្ងៃទី២៣ ខែមេសា ឆ្នាំ២០១៨ ស្ថិតក្នុងភូមិក្រវ៉ាន់ សង្កាត់នគរធំ ក្រុងសៀមរាប ខេត្តសៀមរាប ខាងកើតកន្លែងត្រួតពិនិត្យសំបុត្រភ្ញៀវទេសចរណ៍ ចំណុចអក្សរតេផ្លូវ៦០ម៉ែត្រ។ លោក បេង ប៊ន មន្ត្រីទទួលបន្ទុកព្រៃឈើ នៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន បានឱ្យដឹងថា សកម្មភាពលួចកាប់ទន្ទ្រានព្រៃឈើ នៅខាងកើតប៉ុស្តិ៍ត្រួតពិនិត្យសំបុត្រ៦០ម៉ែត្រ បានចាប់ផ្តើមតាំងពី ឆ្នាំ២០១៧មកម្លេះ តែក្រោយការទប់ស្កាត់ឃើញថា សកម្មភាពទាំងនោះបានបញ្ឈប់ហើយ។ ដោយឡែកក្នុងកំឡុងពេលបុណ្យចូលឆ្នាំថ្មីកន្លងមកនេះ សកម្មភាពកាប់ទន្ទ្រានដុតព្រៃបានកើត ឡើងម្តងទៀត។ ជនដែលសកម្មក្នុងការកាប់ព្រៃនេះ មានឈ្មោះ ថៃ ធឿង ដែលបានលួចកាប់ ទន្ទ្រានដីព្រៃនោះមានទំហំប្រមាណជាកន្លះហិកតា នៅខាងក្រោយផ្ទះរបស់ខ្លួន រួមនឹងកន្លែងផ្សេងៗ ជាច្រើនកន្លែងទៀត។
មួយចំណុចទៀតនៅឆៀងមុខផ្ទះ ថៃ ធឿង មានទំហំប្រមាណ៣០ម៉ គុណនឹង៤០ម៉ ដែលបង្កដោយជនមិនស្គាល់ឈ្មោះ។ លោក បេង ប៊ន បានបញ្ជាក់ទៀតថា៖ ការលួចកាប់នេះ ធ្វើឡើងពេលក្រុមការងារព្រៃឈើរបស់អាជ្ញាធរជាតិអប្សរាអវត្តមានដូចជាពេលបុណ្យចូលឆ្នាំថ្ងៃសម្រាកបុណ្យជាតិ ថ្ងៃសៅរ៍-អាទិត្យ និងចន្លោះមុន និងក្រោយពេលចូល និងចេញធ្វើការរបស់ក្រុមការងារ។ ពួកគេតែងលួចកាប់បន្តិចម្តងៗជារៀងរាល់ថ្ងៃ លុះពេលហាមឃាត់ ហើយសួរនាំក៏ឆ្លើយថា គ្រាន់តែដើរកាប់ដើម្បីហាត់ប្រាណ ឬក៏ប្រើពាក្យជេរប្រទេចតបមកក្រុមការងារ ហើយអះអាងថា ព្រៃទាំងអស់នេះជាកម្មសិទ្ធិរបស់ខ្លួន ទាំងដែលខ្លួនត្រឹមជាអ្នកចំណូលស្រុកប៉ុណ្ណោះ ហើយអ្នកខ្លះទៀតត្រូវចៅសង្កាត់អះអាងថា មិនមានឈ្មោះជាប្រជាជនស្ថិតក្នុងភូមិស្រុករបស់ខ្លួនឡើយ។
ដោយមូលហេតុនេះហើយទើបអាជ្ញាធរជាតិអប្សរា មិនមានសមត្ថកិច្ចក្នុងការដាក់ទោសទណ្ឌ ចំពោះជនបង្កបទល្មើស ក៏តែងតែសហការជាមួយអាជ្ញាធរមូលដ្ឋាន និងមន្ត្រីពាក់ព័ន្ធផ្សេងៗ ដើម្បីជួយទប់ស្កាត់ផងដែរ។ លោក ង៉ា ចុង ចៅសង្កាត់នគរធំ ក៏បានរំឭកថា ច្រើនដងណាស់ ដែលលោកហៅ ថៃ ធឿង ទៅជួបដើម្បីនិយាយគ្នា តែជននេះមិនសូវទៅ ហើយក៏ធ្លាប់ធ្វើកិច្ចសន្យា នឹងបុគ្គលនេះច្រើនដងដែរកន្លងមក តែធ្វើរួចជននោះនៅតែមិនបញ្ឈប់សកម្មភាពរបស់ខ្លួនដដែល។ លោកក៏បានលើកឡើងថា ដើម្បីទប់ស្កាត់ឱ្យបាន ក្រុមការងារទាំងអស់ ពិសេសមន្ត្រីប៉ូលិសបេតិកភណ្ឌ ត្រូវដាក់កម្លាំងតាមគ្រប់ជំហាន និងបង្ក្រាបលើបទល្មើសជាក់ស្តែង ហើយដាក់ទោសឱ្យសមនឹង កម្រិតទោសទើបរាងចាល ដោយមិនអាចយោគយល់បានឡើយ ព្រោះកន្លងមកការយោគយល់ គឺគ្មានប្រសិទ្ធិភាពចំពោះជននោះទេ។
ចំណែក មន្ត្រីប៉ូលិសបេតិកភណ្ឌ បានអះអាងថា ចំពោះករណីដុតព្រៃ និងកាប់ព្រៃទន្ទ្រានយកដីនេះ គឺមិនបានដឹងព័ត៌មានឡើយ តែពីពេលនេះទៅ ក្រុមការងារនឹងចុះល្បាត ហើយសហការយ៉ាងជិតស្និទ្ធជាមួយក្រុមការងារអាជ្ញាធរជាតិអប្សរា អាជ្ញាធរមូលដ្ឋាន ដោយការចុះល្បាតឱ្យបានញឹកញាប់ ពិសេសបន្ថែមលើម៉ោងការងារដែលក្រុម អាជ្ញាធរជាតិអប្សរាផុតម៉ោងធ្វើការ។ សូមបញ្ជាក់ផងដែរថា សម្រាប់ការចុះពិនិត្យនៅរសៀលថ្ងៃទី២៣ ខែមេសា ឆ្នាំ២០១៨នេះ ក្រុមការងារចម្រុះមិនបានឃើញមានអ្នកបង្កហេតុឡើយ ព្រោះពួកគេបានគេចខ្លួនអស់ហើយ និងសម្ងំក្នុងផ្ទះ។ ហើយការកាប់នោះនៅតែមានទៀត ដែលតាមការស្មានគឺធ្វើឡើងមួយថ្ងៃទៅពីរថ្ងៃមុននេះ ពេលក្រុមការងារផុតម៉ោងការងារ ទើបពួកនោះលួចចូលមកកាប់៕
ចែករំលែកព័តមាននេះ