រាជធានីភ្នំពេញ ៖ ដើម្បីបែងចែកសេវាហិរញ្ញវត្ថុឲ្យដល់ដៃប្រជាពលរដ្ឋគ្រប់មជ្ឈដ្ឋាន និងក្នុងគោលបំណងលើកកម្ពស់បរិយាប័ន្នហិរញ្ញវត្ថុ ធនាគារជាតិនៃកម្ពុជា និងសហព័ន្ធបរិយាប័ន្នហិរញ្ញវត្ថុ ហៅកាត់ថា(AFI) ត្រៀមបើកកិច្ចពិភាក្សាមួយ ដើម្បីរៀបចំគោលនយោបាយ និងដាក់ចេញនូវវិធីសាស្ត្រធ្វើយ៉ាងណា ឱ្យពលរដ្ឋក្រីក្រអាចទទួលបានសេវាហិរញ្ញវត្ថុមានតម្លៃសមរម្យ និងប្រើប្រាស់ឲ្យបានគ្រប់គ្នា ដោយមានកិច្ចការពារពីគ្រឹះស្ថានមីក្រូហិរញ្ញវត្ថុដែលមានអាជ្ញាប័ណ្ណត្រឹមត្រូវ ។ នេះបើតាមការឲ្យដឹងពីមន្ត្រីធនាគារជាតិនៃកម្ពុជា ។
អគ្គនាយកត្រួតពិនិត្យនៃធនាគារជាតិនៃកម្ពុជា លោក រ័ត្ន សុវណ្ណនរៈ បានឲ្យដឹងកាលពីថ្ងៃទី២២ មេសា ថា កិច្ចពិភាក្សានេះគ្រោងធ្វើឡើងនៅថ្ងៃទី២៤-២៧ មេសា ដែលនឹងរៀបចំនៅខេត្តសៀមរាប ដោយមានតំណាងធនាគារកណ្តាល និងក្រសួងហិរញ្ញវត្ថុប្រមាណ៤៣ប្រទេសនៅទូទាំងពិភពលោកចូលរួម ក្នុងគោលបំណងដាក់ចេញវិធីសាស្ត្រដើម្បីឱ្យប្រជាពលរដ្ឋក្រីក្រអាចទទួលបាន និងប្រើប្រាស់សេវាហិរញ្ញវត្ថុផ្លូវការដែលមានតម្លៃសមស្រប និងមានកិច្ចការពារពីគ្រឹះស្ថានមីក្រូហិរញ្ញវត្ថុដែលមានអាជ្ញាប័ណ្ណត្រឹមត្រូវ ។
លោកថ្លែងថា ៖« ការផ្ដល់សេវាហិរញ្ញវត្ថុតម្លៃសមរម្យនេះ គឺមានអាទិភាពច្រើនដល់បងប្អូនប្រជាពលរដ្ឋក្រីក្រ ទាំងអត្រាការប្រាក់ទាប និងសេវារដ្ឋបាលនានា ព្រមទាំងមានការគាំពារពីគ្រឹះស្ថានមីក្រូហិរញ្ញវត្ថុ ដែលមានអាជ្ញាប័ណ្ណត្រឹមត្រូវផងដែរ » ។
លោកបន្ដថា ៖« កន្លងមក ធនាគារជាតិនៃកម្ពុជា សហការជាមួយអង្គការដៃគូ បានធ្វើការសិក្សាមួយ ហើយយើងទទួលបានលទ្ធផលថា ប្រជាពលរដ្ឋ៧១%នៃពលរដ្ឋពេញវ័យសរុប ទទួលបានការប្រើប្រាស់សេវាហិរញ្ញវត្ថុ។ អីចឹង ពីមុនមក កម្រិតបរិយាប័ន្នហិរញ្ញវត្ថុយើងនៅទាប តែមកដល់ឆ្នាំ២០១៥ឃើញថា មានការកើនឡើង » ។
លោកបញ្ជាក់ថា ៖« បរិយាប័ន្នហិរញ្ញ វត្ថុ មានន័យថា ធ្វើយ៉ាងណា ជួយឱ្យប្រជាពលរដ្ឋដែលមិនទាន់ទទួលបានសេវា បានប្រើប្រាស់សេវាហិរញ្ញវត្ថុដូចជា ប្រាក់កម្ចី បញ្ញើ និងការផ្ទេរប្រាក់ ជាដើម ឱ្យគាត់មានលទ្ធភាពប្រើប្រាស់សេវានេះបានគ្រប់គ្នា » ។
លោកថា ៖« ជាទិសដៅនៅពេលបច្ចុប្បន្ន យើងកំពុងរៀបចំយុទ្ធសាស្ត្របរិយាប័ន្នហិរញ្ញវត្ថុ ហើយនៅក្នុងនោះ យើងមានជាគោលនយោបាយនិងវិធីសាស្ត្រផ្សេងៗដើម្បីជំរុញកម្រិតបរិយាប័ន្នហិរញ្ញវត្ថុ នៅពេលយើងដាក់ចេញ នឹងមានភាពប្រសើរឡើងបន្ថែមទៀតនាពេលខាងមុខ » ។
នាយកប្រតិបត្តិនៃសមាគមមីក្រូហិរញ្ញវត្ថុកម្ពុជា លោក យុន សុវណ្ណា មានប្រសាសន៍ដែរថា ៖« បរិយាប័ន្នហិរញ្ញវត្ថុនេះមានសារសំខាន់ និងជាទិសដៅមួយ ដើម្បីកាត់បន្ថយភាពក្រីក្រ និងជំរុញកំណើនសេដ្ឋកិច្ច ។ កាលនៅចុងឆ្នាំ២០១៦ និងដើមឆ្នាំ២០១៧ ប្រជាពលរដ្ឋកម្ពុជាពេញវ័យមានការកើនឡើងគួរឱ្យកត់សម្គាល់ដែលទទួលបានសេវាហិរញ្ញវត្ថុ សន្សំ កម្ចី និងសេវាផ្សេងទៀតពីគ្រឹះស្ថាននៅក្នុងប្រព័ន្ធទទួលបានអាជ្ញាប័ណ្ណ និងការអនុញ្ញាតពីធនាគារជាតិនៃកម្ពុជា » ។
យោងតាមសេចក្តីជូនដំណឹងរបស់ធនាគារជាតិនៃកម្ពុជាថ្មីៗនេះឱ្យដឹងថា ធនាគារជាតិនៃកម្ពុជា និងសហព័ន្ធបរិយាប័ន្នហិរញ្ញវត្ថុ នឹងបើកកិច្ចប្រជុំក្រុមការងារចំនួន២គឺ ៖ ១-ក្រុមការងាររៀបចំយុទ្ធសាស្ត្របរិយាប័ន្នហិរញ្ញវត្ថុ (Financial Inclusion Strategy Peer Learning Group – FISPLG) និង ២-ក្រុមការងាររៀបចំបទដ្ឋានរួមសម្រាប់បរិយាប័ន្នហិរញ្ញវត្ថុ (Global Standards Proportionality Working Group – GSPWG) ក្នុងគោលបំណងពិភាក្សាលើការងាររៀបចំគោលនយោបាយដើម្បីលើកកម្ពស់បរិយាប័ន្នហិរញ្ញវត្ថុ ៕
ចែករំលែកព័តមាននេះ