តើសាសនិកអ៊ិស្លាមត្រូវត្រៀមអ្វីខ្លះសម្រាប់ទទួលខែរ៉ម៉ាឌន (បួស)?
- ភ្នំពេញ
រាជធានីភ្នំពេញ ៖ រ៉ម៉ាឌន (Ramadan) ជាខែទី៩ នៃប្រតិទិនមហាម៉ាត់សករាជដែលព្រះជាម្ចាស់ (អល់ឡោះ) បានប្រសិទ្ធនាមថា ខែរ៉ម៉ាឌន ។…
រាជធានីភ្នំពេញ ៖ រ៉ម៉ាឌន (Ramadan) ជាខែទី៩ នៃប្រតិទិនមហាម៉ាត់សករាជដែលព្រះជាម្ចាស់ (អល់ឡោះ) បានប្រសិទ្ធនាមថា ខែរ៉ម៉ាឌន ។ សម្រាប់អ្នកដែលកាន់សាសនាអ៊ិស្លាម បានចាត់ទុកខែនេះជាខែដ៏ប្រពៃ ជាខែដែលល្អបំផុតសម្រាប់សាសនិកអ៊ិស្លាមទូទៅ ដោយសារព្រះជាម្ចាស់បានដាក់កាតព្វកិច្ចបួស (តមអាហារ) ពេញមួយខែ (មានរយៈពេល ២៩ថ្ងៃ ឬ៣០ថ្ងៃ) និងការគោរពប្រតិបត្តិ ផ្សេងៗទៅលើអ្នកកាន់សាសនាអ៊ិស្លាមទាំងអស់លើសាកលលោក ។
លោកម៉ាន ស៊ួត អាប់ឌុលឡោះ សាស្ត្រាចារ្យផ្នែកច្បាប់សាសនាដែលបានបញ្ចប់ការសិក្សាពីប្រទេសអារ៉ាប់បានលើកឡើងកាលពីពេល ថ្មីៗកន្លងមកថា «បួស» (តមអាហារ) គឺជាការទប់ខ្លួននូវប្រការអ្វីមួយដែលព្រះជាម្ចាស់បានហាមឃាត់ ដោយកំណត់ពេលវេលាច្បាស់លាស់ និងលក្ខខណ្ឌត្រឹមត្រូវតាមច្បាប់សាសនា ។ លោកលើកឡើងថា៖ «បួស គឺជាការតមមិនឲ្យផឹកទឹក មិនឲ្យហូបបាយ ឬហូបអ្វីដែលបញ្ចូលតាមមាត់ ចាប់ពីមេឃសខាងកើត(មុនថ្ងៃរះ) រហូតដល់ថ្ងៃលិច ព្រមជាមួយនឹងការនៀតក្នុងចិត្ត(តាំងចិត្ត) ដោយមិនឲ្យលឺសំឡេងមកខាងក្រៅឡើយ» ។
លោកបន្តថា ការបួសនេះមិនត្រឹមតែឲ្យផ្អាកនៃការបរិភោគអាហារ ឬសារធាតុទឹកទេ សូម្បីតែការនិយាយដើមគេ ការជេរបញ្ចោរគេ ឬការអុជអាលអ្នកដទៃក៏ត្រូវតែហាមដែរ ។
ជាពិសេសគឺការរួមភេទពេលដែលយើងកំពុងបំពេញបួស (បានន័យថាពេលថ្ងៃគឺមិនឲ្យប្រព្រឹត្តនូវតំណមទាំងលើ តែពេលយប់គឺយើងអាចបរិភោគ ផឹកទឹក ឬរួមរ័កជាមួយគ្រួសាររបស់យើងបានធម្មតាវិញ) ។
តើសាសនិកអ៊ិស្លាម គួរត្រៀមអ្វីខ្លះសម្រាប់ទទួលខែរ៉ម៉ាឌនដែលជាខែដ៏វិសេសវិសាលនេះ ?
អ្នកដែលកាន់សាសនាអ៊ិស្លាមសប្បាយរីករាយដែលទទួលបានពីការធ្វើគោរពពីព្រះជាម្ចាស់ គឺគាត់បានបំពេញនូវកាតព្វមួយ នៃច្បាប់អ៊ិស្លាម ។ ក្នុងនោះរួមមាន ការជឿទៅលើព្រះជាម្ចាស់ ការអធិដ្ឋាន(សំពះយាំង) ការដាក់ទាន ការតមអាហារ និងការធ្វើធម្មយាត្រា(ធ្វើហាជ្ជី)នៅទីក្រុងម៉ាកះ ប្រទេសអារ៉ាប៊ីសាអូឌីដែលជាទីកំណើតរបស់ព្យាការីមូហាម៉ាត់ ។
លោករ៉ស៊ីគីន ហ៊ូសេន និស្សិតកំពុងបន្តការសិក្សាផ្នែកច្បាប់សាសនានៃសាកលវិទ្យាល័យ Fatoni university ប្រទេសថៃ បានប្រាប់កោះសន្តិភាពកាលពីថ្ងៃទី២០ ខែមេសា ឆ្នាំ២០១៨ថាសម្រាប់សាសនិកអ៊ិស្លាម អ្វីដែលត្រូវត្រៀមដើម្បីទទួលរ៉ម៉ាឌន គឺការបួងសួងទៅកាន់អល់ឡោះព្រះជាម្ចាស់ដើម្បីឲ្យគាត់ទទួលបាននួវអាយុជីវិតដល់ខែរ៉ម៉ាឌន ។ បើសិនជាគាត់មានសមត្ថភាពបង្រៀន គឺគាត់អាចបង្រៀនដល់បងប្អូនមូស្ល៊ីមដែលគាត់មិនសូវដឹងជ្រៅជ្រះខាងផ្នែកសាសនា ពីច្បាប់ ឬកាតព្វកិច្ចនៃការបួសទៅកាន់ពួកគាត់ផងដែរ និងមានការរៀបចំប្រាក់ផ្ទាល់ខ្លួនសម្រាប់អ្នកមានលទ្ធភាព ឬក៏ស្វែងរកជំនួយពីអ្នកដែលមានសមត្ថភាពដើម្បីផ្ដល់អាហាសម្រាប់អ្នកបួសក្នុងខែរ៉ម៉ាឌននេះ ។
គ្រូបង្រៀនផ្នែកសាសនាក្នុងរាជធានីភ្នពេញ លោកអាប់ឌុលកឌៀត ហ៊ើរូនបានបញ្ជាក់បន្ថែមថា មុននឹងចូលដល់ខែរ៉ម៉ាឌន យើងទាំងអស់គ្នាត្រូវត្រៀមជាមុននូវរាល់កិច្ចការជាច្រើនទៀត។ ក្នុងនោះមានដូចខាងក្រោម៖
១-ធ្វើអារម្មណ៍ឲ្យរីករាយ និងបួងសួងសុំពីអល់ឡោះជាម្ចាស់ឲ្យយើងទាំងអស់គ្នាបានជួបខែរ៉ម៉ាឌន ។
២-ការតាំងចិត្តច្បាស់លាស់ក្នុងការប្រើប្រាស់ពេលវេលាឲ្យបានល្អក្នុងកិច្ចគោរពសក្ការៈ និងការសាងអំពើល្អ ផ្សេងៗ ។
៣-ព្យាយាមស្វែងយល់អំពីបញ្ញត្តិ ផ្សេងៗពាក់ព័ន្ធនឹងខែរ៉ម៉ាឌន ។
៤-តាំងចិត្តបោះបង់រាល់ប្រការ អាក្រក់ៗ និងសារភាពរាល់កំហុសជាមួយនឹងការសុំក្តីអភ័យទោសពីអល់ឡោះដោយពិតប្រាកដ ។
៥-ត្រូវធ្វើចិត្តបរិសុទ្ធក្នុងការបំពេញកិច្ចគោរពសក្ការៈចំពោះអល់ឡោះ ជាពិសេសការបួស ។
៦- បើកចិត្តឲ្យទូលាយ និងផ្តល់ក្តីស្រលាញ់ ការអធ្យាស្រ័យដល់បណ្តាសាសនិកអ៊ិស្លាម និងមនុស្សលោកទូទៅ ។
៧-ចៀសឆ្ងាយរាល់ប្រការហាមឃាត់ទាំងឡាយ ។
៨-តាំងចិត្តបំពេញការបួស និងប្រតិបត្តិសឡាតតារ៉វីស(សំពះយាំងពេលយប់) ដោយចិត្តស្មោះសរ មានជំនឿ និងប្រកបដោយក្តីសង្ឃឹមនូវកុសលអំពីអល់ឡោះជាម្ចាស់ ។
រ៉ម៉ាឌនឆ្នាំ២០១៨ នឹងចូលមកដល់នៅថ្ងៃទី១៦,១៧ ខែឧសភា ឆ្នាំ២០១៨(មិនទាន់ច្បាស់លាស់ គឺអាស្រ័យទៅលើការមើលខែ) ៕
ចែករំលែកព័តមាននេះ