រាជធានីភ្នំពេញ ៖ ជនសង្ស័យម្នាក់ រួមជាមួយថ្នាំញៀន៣៤កញ្ចប់តូច-ធំ ត្រូវបានកម្លាំងសមត្ថកិច្ចប៉ុស្តិ៍ចាក់អង្រែលើ សហការជាមួយនគរបាលផ្នែកអន្តរាគមន៍នៃអធិការដ្ឋាននគរបាលខណ្ឌមានជ័យឃាត់ខ្លួន ស្ថិតនៅចំណុចសំណង់អនាធិបតេយ្យលើផ្លូវ៦០ម៉ែត្រ ក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ កាលពីវេលាម៉ោង១០ព្រឹកថ្ងៃទី២៤ មេសា នេះ ។
សេចក្តីរាយការណ៍ឱ្យដឹងថា ជនសង្ស័យខាងលើ ឈ្មោះ នាថ ពិសារ អាយុ៣៤ឆ្នាំ មានទីលំនៅមិនពិតប្រាកដ មានស្រុកកំណើតនៅខេត្តព្រៃវែង ។ លោកនាយប៉ុស្តិ៍នគរបាលចាក់អង្រែលើ លោកអ៊ុំ រតនា បានឱ្យដឹងថា ដោយទទួលបានបញ្ជាពីលោកវរសេនីយ៍ឯកតេង ស៊ីណូ អធិការនគរបាលខណ្ឌ បញ្ជារអោយនគរបាលប៉ុស្តិ៍ត្រូវសហការជាមួយនគរបាលផ្នែកអន្តរាគមន៍ នៃអធិការដ្ឋាននគរបាលខណ្ឌ ចុះទៅល្បាតនៅចំណុចខាងលើ ឱ្យបានញឹកញាប់ ព្រោះតំបន់នោះជាតំបន់អនាធិបតេយ្យ និងជាតំបន់មានការលួចលាក់ចរាចរណ៍គ្រេឿងញៀនជាញឹកញាប់ផងដែរ ដូច្នេះហើយនៅវេលាខាងលើ កម្លាំងនគរបាលបានចុះល្បាត ក៏ប្រទះឃើញជនសង្ស័យម្នាក់ មើលទៅគួរអោយសង្ស័យ ក៏ធ្វើការឃាត់សួរនាំ និងឆែកឆេរលើខ្លួនប្រាណ ស្រាប់តែប្រទះឃើញមានថ្នាំញៀនជាច្រើនកញ្ចប់ ទើបសមត្ថកិច្ចសម្រេចធ្វើការឃាត់ខ្លួនជនសង្ស័យ បញ្ចូនមកកាន់ប៉ុស្តិ៍រដ្ឋបាលនគរបាលមូលដ្ឋានដើម្បីសាកសួរនាំ ។
ក្នុងការឃាត់ខ្លួន កម្លាំងសមត្ថកិច្ចដកហូតបានថ្នាំញៀនក្រាមសថ្លា ឬហៅថា ម៉ាទឹកកកចំនួន៣៤កញ្ចប់ ក្នុងនោះ២កញ្ចប់ធំល្មម ។ បច្ចុប្បន្ន ជនសង្ស័យ រួមជាមួយវត្ថុតាង ត្រូវឃុំខ្លួនបណ្តោះអាសន្ននៅប៉ុស្តិ៍រដ្ឋបាលនគរបាលចាក់អង្រែលើ រងចាំកសាងសំណុំរេឿងបញ្ចូនទៅសាលាដំបូងរាជធានីភ្នំពេញ ចាត់ការទៅតាមនីតិវិធីច្បាប់ ។
ចែករំលែកព័តមាននេះ