ខេត្តបន្ទាយមានជ័យ ៖ យ៉ាងហោចណាស់មនុស្ស២នាក់រងរបួស និងរថយន្ត៣គ្រឿងរងការខូចខាតក្នុងករណីគ្រោះថ្នាក់ចរាចរណ៍រថភ្លើងបុករថយន្តតូចធំនៅក្នុងក្រុងប៉ោយប៉ែត និងស្រុកអូរជ្រៅ ចាប់តាំងពីរថភ្លើងបានចាប់ផ្តើមដំណើរការឡើងវិញពីក្រុងប៉ោយប៉ែតទៅក្រុងសិរីសោភ័ណ និងពីក្រុងសិរីសោភ័ណមកក្រុងប៉ោយប៉ែតដែលមានរយៈពេលមិនទាន់បាន១ខែផង ។
ករណីផ្ទួនៗខាងលើនេះពិតធ្វើឱ្យមានការអំពាវនាវឱ្យមន្ត្រីជំនាញ និងសមត្ថកិច្ចចាត់វិធានការឆ្លើយតបហើយ ។ មានការកត់សម្គាល់ជុំវិញឧបទ្ទវហេតុទាំង៣ករណីគឺ នៅឃុំកូប ស្រុកអូរជ្រៅកាលពីថ្ងៃទី៧ មេសា រថភ្លើងបុករថយន្តកាមរីបាឡែន ខណៈរថភ្លើងបើកបរមកពីទិសខាងកើត និងរថយន្តបើកបរមកពីទិសខាងត្បូង ប៉ុន្តែប៉ះគ្នាតិចតួចគ្មានអ្នករងរបួសទេ ។ ចំណែក២កន្លែងទៀតកើតឡើងនៅក្រុងប៉ោយប៉ែតកាលពីថ្ងៃទី២១ មេសា នៅក្នុងភូមិអូរជ្រៅ សង្កាត់ប៉ោយប៉ែត រថភ្លើងបុករថយន្តនីស្សាន់២បាំងកន្លះ និងករណីចុងក្រោយកើតឡើងនៅព្រឹកថ្ងៃទី២៣ មេសា នៅភូមិនិមិត្ត១ សង្កាត់និមិត្ត ក្រុងប៉ោយប៉ែត ។
ករណីទាំង៣ខាងលើ ២ករណីដំបូងខូចខាតតែខាងភាគីរថយន្ត ដោយឡែកករណីទី៣នេះភាគីរថភ្លើងខូចខាតធ្ងន់ធ្ងរមិនអាចបន្តដំណើរបានឡើយ ដោយសារធ្លាយធុងទឹកហើយរ៉ាឌីយ៉ាទ័រខូចខាតធ្ងន់ធ្ងរតែម្តង។
ជួបសម្ភាសន៍ផ្ទាល់ជាមួយអ្នកបើកបររថភ្លើងនៅព្រឹកថ្ងៃទី២៣ មេសា បានប្រាប់ថា យោងតាមច្បាប់ចរាចរណ៍ផ្លូវដែកតំបន់ មិនមែនទីប្រជុំជន អ្នកបើកបរយានយន្តមុនឆ្លងកាត់ផ្លូវរថភ្លើង ត្រូវមានការប្រុងប្រយ័ត្នមើលឆ្វេងមើលស្តាំ លើកលែងតែតំបន់មានអ្នកធ្វើចរាចរណ៍ច្រើន ។ លោកបន្តថា ករណីលើកទី៣នេះគឺរថភ្លើងរងការខូចខាតមិនអាចដំណើរការបាន ព្រោះធ្លាយធុងទឹកនិងរ៉ាឌីយ៉ាទ័រ ហើយថ្នាក់ដឹកនាំបាននឹងកំពុងយកចិត្តទុកដាក់ឱ្យក្រុមការងារគិតគូរធ្វើយ៉ាងណាជួសជុលរថភ្លើងឡើងវិញឱ្យបានឆាប់ដើម្បីឱ្យពលរដ្ឋបានធ្វើដំណើរដោយរលូនមិនចំណាយប្រាក់តទៅទៀត ។ តាមការឱ្យដឹងពីនគរបាលជំនាញចរាចរណ៍ក្រុងប៉ោយប៉ែតប្រាប់តាមទូរស័ព្ទថា ផ្លូវឆ្លងកាត់ផ្លូវរថភ្លើងនៅទូទាំង៣សង្កាត់ ក្នុងក្រុងប៉ោយប៉ែតមានចំនួន៣៤ខ្សែ(ផ្លូវលំ៣៣និងផ្លូវជាតិ១) ។
តើអាជ្ញាធរមានវិធានការយ៉ាងណាដើម្បីកាត់បន្ថយគ្រោះថ្នាក់ចរាចរណ៍រថភ្លើងបុករថយន្តនៅក្នុងខេត្តបន្ទាយមានជ័យ ។ លោកឧត្តមសេនីយ៍ត្រី អ៊ុំ សុផល ស្នងការរងនគរបាលខេត្តទទួលបន្ទុកចរាចរណ៍ផ្លូវគោកប្រាប់តាមទូរស័ព្ទថា ខាងសមត្ថកិច្ចគ្រាន់តែជាផ្នែកមួយខាងប្រតិបត្តិការតែប៉ុណ្ណោះ មិនអាចដឹងរឿងផ្សេងបានទេ ។ ដោយឡែកលោក គឹម សុវណ្ណ ប្រធានមន្ទីរសាធារណការ និងដឹកជញ្ជូនខេត្តបែរជានិយាយថា បើចង់ដឹងច្បាស់គួរសាកសួរទៅលោកឧកញ៉ា គិត ម៉េង ព្រោះពាក់ព័ន្ធនិងក្រុមហ៊ុនរ៉ូយ៉ាល់រែលវេ ហើយថាខាងលោកមិនដឹងទេបញ្ហាហ្នឹង ។
គួរកត់សម្គាល់ថា ក្នុងរយៈពេលមិនទាន់បាន១ខែផង ក្រោយរថភ្លើងដំណើរការពីក្រុងប៉ោយប៉ែត ទៅកាន់ក្រុងសិរីសោភ័ណ និងពីក្រុងសិរីសោភ័ណទៅក្រុងប៉ោយប៉ែត លើកំណាត់ផ្លូវប្រវែង៣០គីឡូម៉ែត្រ បានកើតមានហេតុការណ៍បុករថយន្តបន្តបន្ទាប់ ។ ប្រភពនានាពីប្រជាពលរដ្ឋជាច្រើននាក់ បានសំណូមពរសុំឱ្យអាជ្ញាធរផ្លូវដែកកម្ពុជា មេត្តាធ្វើបារ៉ាស់តាមចំណុចនីមួយៗ និងមានអ្នកចាំធ្វើចរាចរ មុនពេលរថភ្លើងដល់ទីប្រជុំជនក្រុងខេត្តទាំងមូល ដើម្បីបញ្ចៀសហានិភ័យដែលកើតឡើងជាយថាហេតុ ៕
ចែករំលែកព័តមាននេះ