រាជធានីភ្នំពេញ ៖ ទីតាំងលួចលាក់ធ្វើសកម្មភាពជំរិតទារប្រាក់ និងឆបោកឆ្លងដែនតាមប្រព័ន្ធ Internet (VOIP) ចំនួន២កន្លែងនៅក្នុងខណ្ឌទួលគោកមួយកន្លែង និងនៅក្នុងខណ្ឌសែនសុខមួយកន្លែង ត្រូវបានកម្លាំងនគរបាលអន្តោប្រវេសន៍ចុះបង្ក្រាប ដោយឃាត់ខ្លួនជនជាតិចិន…
រាជធានីភ្នំពេញ ៖ ទីតាំងលួចលាក់ធ្វើសកម្មភាពជំរិតទារប្រាក់ និងឆបោកឆ្លងដែនតាមប្រព័ន្ធ Internet (VOIP) ចំនួន២កន្លែងនៅក្នុងខណ្ឌទួលគោកមួយកន្លែង និងនៅក្នុងខណ្ឌសែនសុខមួយកន្លែង ត្រូវបានកម្លាំងនគរបាលអន្តោប្រវេសន៍ចុះបង្ក្រាប ដោយឃាត់ខ្លួនជនជាតិចិន ប្រុស-ស្រីចំនួន១១៩នាក់ ព្រមទាំងដកហូតបានឧបករណ៍ជាមធ្យោបាយប្រព្រឹត្តបទល្មើសមួយចំនួនធំ ។
ប្រតិបត្តិការបង្ក្រាបក្រុមចាប់ជំរិតនេះ ធ្វើឡើងកាលពីល្ងាចថ្ងៃទី២២ មេសា ដឹកនាំដោយលោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តន៍នីតិវិធីនៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ និងមានការសម្របសម្រួលពីលោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានី និងមានការចូលរួមសហការពីសមត្ថកិច្ចនិងអាជ្ញាធរមូលដ្ឋានផងដែរ ។
តាមព័ត៌មានឱ្យដឹងថា ទីតាំងទី១ដែលសមត្ថកិច្ចចុះបង្ក្រាបស្ថិតនៅចំណុចផ្ទះលេខ៣៨ ផ្លូវលេខ៦០៦ ក្រុម៤២ ភូមិ៩ សង្កាត់បឹងកក់ទី២ ខណ្ឌទួលគោក ។ មុនការឆ្មក់ចូលទីតាំងនេះសមត្ថកិច្ចបានឡោមព័ទ្ធ និងឆែកឆេរនៅវេលាម៉ោងប្រមាណ៥និង៣០នាទីល្ងាច ដោយរកឃើញជនជាតិចិនចំនួន៧០នាក់ ក្នុងនោះស្រី៤នាក់ដែលកំពុងតែប្រព្រឹត្តបទល្មើស ហើយសមត្ថកិច្ចឃាត់ខ្លួន ព្រមទាំងដកហូតយកម៉ាស៊ីនឧបករណ៍បំលែងពីInternetជាមធ្យោបាយសម្រាប់គម្រាមទារប្រាក់ និងឆបោកទៅក្រៅប្រទេសមួយចំនួន ។ដោយឡែក ទីតាំងទី២ស្ថិតនៅភូមិគ្រឹះមួយកន្លែងគ្មានលេខ ស្ថិតនៅតាមផ្លូវលេខ១៩៧២ ក្នុងភូមិពោងពាយ សង្កាត់ភ្នំពេញថ្មី ក្បែរសាលាសង្កាត់ ក្នុងខណ្ឌសែនសុខ ។
តាមព័ត៌មានឱ្យដឹងថា សមត្ថកិច្ចបានធ្វើការឡោមព័ទ្ធ និងឆែកឆេរនៅវេលាម៉ោងប្រមាណ៦ល្ងាចថ្ងៃដដែល ដោយរកឃើញជនជាតិចិនចំនួន១២៨នាក់ ដែលបានមកជួលភូមិគ្រឹះខាងលើស្នាក់នៅក្នុងតម្លៃ១ខែ៨ពាន់ដុល្លារ ដោយកុងត្រារយៈពេល៦ឆ្នាំ ។ ប្រតិបត្តិការបានបញ្ចប់នៅវេលាម៉ោងប្រមាណ៩យប់ដោយឃាត់ខ្លួនជនជាតិចិនចំនួន៤៩នាក់ ក្នុងនោះមានស្រី១៥នាក់ ។ នៅក្នុងប្រតិបត្តិការបង្ក្រាបក្រុមចាប់ជំរិតទាំង ២ទីតាំង សមត្ថកិច្ចឃាត់ខ្លួនជនសង្ស័យចំនួន១១៩នាក់ ក្នុងនោះមានស្រី១៩នាក់។ជនសង្ស័យជាជនជាតិចិនទាំងនេះត្រូវបានបញ្ជូនទៅអគ្គនាយកដ្ឋានអន្តោប្រវេសន៍ដើម្បីចាត់ការតាមនីតិវិធី ។
គួរបញ្ជាក់ថា ប្រទេសកម្ពុជាត្រូវបានក្រុមជនជំរិតទារប្រាក់ឆ្លងដែនជាជនជាតិចិនបានជ្រើសរើសយកសម្រាប់ជាសំបុកលាក់ខ្លួនរបស់ពួកគេ ដោយបានមកជួលភូមិគ្រឹះនិងផ្ទះវីឡាក្នុងតម្លៃខ្ពស់និងបានសម្ងំ ធ្វើសកម្មភាពចាប់ជំរិតតាមប្រព័ន្ធអុីនធើណេតឆ្លងដែនទៅក្រៅប្រទេស ហើយត្រូវបានសមត្ថកិច្ចកម្ពុជាបង្ក្រាបជាបន្តបន្ទាប់ ។
ទោះបីជាយ៉ាងណាជនជាតិចិននៅតែជាមុខសញ្ញាប្រព្រឹត្តបទល្មើសទនិងនៅតែបន្តប្រព្រឹត្តដោយមិនខ្លាចញញើតពីច្បាប់ឡើយ ។ កាលពីប៉ុន្មានថ្ងៃមុននេះជនជាតិចិនចំនួន៦០នាក់ត្រូវបានបណ្តេញចេញតាមជើងយន្តហោះពិសេសរបស់ប៉ូលិសចិន ដែលពួកគេលើកមុននេះក៏មិនខុសពីក្រុមជនជាតិចិនលើកនេះដែរ គឺបាននាំគ្នាយករបរម៉ាហ្វីយ៉ាជាត្រីមុខនៅកម្ពុជា ៕
ចែករំលែកព័តមាននេះ