ខេត្តកំពត ៖ ស្ត្រីវ័យចំណាស់ម្នាក់បានចង.កធ្វើអត្តឃាតមួយបានបង្កឲ្យមានការភ្ញាក់ផ្អើលកាលពីវេលាម៉ោង៦និង៣០នាទីព្រឹក ថ្ងៃទី២៤ ខែមេសា ឆ្នាំ២០១៨ នៅចំណុចរោងយានដ្ឋានជួសជុលរថយន្តមួយកន្លែង ស្ថិតក្នុងភូមិសំរោង ឃុំជុំគ្រៀល ស្រុកទឹកឈូ ខេត្តកំពត ដែលបង្កឡើងដោយស្ត្រីវ័យចំណាស់ម្នាក់ ជាម្ចាស់យានដ្ឋាន ។
ប្រភពព័ត៌មានបាននិយាយថា លុះកូនជាងធ្វើរថយន្តមកធ្វើរថយន្តក៏បានប្រទះឃើញស្ត្រីរងគ្រោះចង.កនឹងធ្នឹមស្លាប់បាត់ទៅហើយ ទើបបង្កឲ្យមានការភ្ញាក់ផ្អើលដល់ប្តីស្ត្រីរងគ្រោះដែលកំពុងដេកនៅក្នុងផ្ទះម្នាក់ឯង ដែលមិនទាន់ក្រោកពីដំណេកផងនោះ ។
ប្រភពពីសមត្ថកិច្ចដែលចុះទៅពិនិត្យសពបានឲ្យដឹងថា តាមការសន្និដ្ឋានថា ជនរងគ្រោះអាចចង.កធ្វើអត្តឃាតនេះនៅចន្លោះពីម៉ោង៥ទៅម៉ោង៥និង៣០នាទីទៀបភ្លឺ ថ្ងៃទី២៤ ខែមេសានេះ ។ ប្រភពពីសមត្ថកិច្ចដដែលបានឲ្យដឹងទៀតថា ស្ត្រីរងគ្រោះមានឈ្មោះ គា ណា អាយុ៥៤ឆ្នាំ មានទីលំនៅកន្លែងកើតហេតុខាងលើ ហើយប្តីឈ្មោះ គឹម សុវណ្ណ អាយុ៥៣ឆ្នាំ មានកូនប្រុសម្នាក់ នៅក្នុងបន្ទុក ដែលអាយុ២៧ឆ្នាំ ។
ប្រភពពីបុរសជាប្តីបានឲ្យដឹងថា នៅមុនថ្ងៃកើតហេតុប៉ុន្មានថ្ងៃមុននេះប្រពន្ធរបស់គាត់ចេះតែត្អូញត្អែរប្រាប់បងប្អូនសាច់ញាតិរបស់ខ្លួនថា គាត់ពិបាកចិត្តណាស់រាល់ថ្ងៃនេះ រូបគាត់ជាប្តីក៏បាននិយាយថា កុំពិបាកអីយើងរួចគ្រោះអស់ទៅហើយពីព្រោះ កាលពីបីខែមុននេះស្ត្រីរងគ្រោះបានបើករថយន្តបុកគេម្តង នៅភូមិត្រសេកកោង ឃុំថ្មី ស្រុកទឹកឈូ ហើយបានសងថ្លៃម៉ូតូជនរងគ្រោះអស់ជាង២០០០ដុល្លារ តាំងពីពេលនោះមកស្ត្រីរងគ្រោះចេះតែត្អូញប្រាប់ប្តី និងបងប្អូនសាច់ញាតិរបស់ខ្លួនថា ពិបាកចិត្តរហូត ។ ប៉ុន្តែគ្មានអ្នកណាម្នាក់ចាប់អារម្មណ៍ថាមានកម្រោលនោះទេ ទើបតែពេលស្ត្រីរូបនេះចង.កសម្លាប់ខ្លួន ទើបមានបងប្អូនសាច់ញាតិសន្និដ្ឋានថា មកពីកម្រោល ។
សមត្ថកិច្ចដែលពិនិត្យសពបានឲ្យដឹងថា សពពិតជាចង.កធ្វើអត្តឃាតដោយខ្លួនឯងពិតប្រាកដមែន ដោយនៅលើដងខ្លួនសពគ្មានស្លាកស្នាមអ្វីគួរឲ្យកត់សំគាល់ឡើយ ។ ក្រោពីពិនិត្យរួចរាល់ក៏បានប្រគល់សពជូនក្រុមគ្រួសាររៀបចំធ្វើបុណ្យតាមប្រពៃណី ៕
ចែករំលែកព័តមាននេះ