ទីក្រុងហាណូយ ៖ ការដឹកជញ្ជូនតាមផ្លូវសមុទ្រ និងផ្លូវទឹកផ្សេងៗរបស់ប្រទេសវៀតណាមបន្តជួបប្រទះបញ្ហាកង្វះខាតកំពង់ផែដែលមានចីរភាព និងការរៀបចំផែនការសម្រាប់ឃ្លាំងកុងតឺន័រផងដែរ ។ លើសពីនេះ បញ្ហាផ្សេងទៀតដូចជា ការតភ្ជាប់ការដឹកជញ្ជូននៅមានកម្រិត និងការចំណាយខ្ពស់ក្នុងផ្នែកដឹកជញ្ជូនផងដែរ…
ទីក្រុងហាណូយ ៖ ការដឹកជញ្ជូនតាមផ្លូវសមុទ្រ និងផ្លូវទឹកផ្សេងៗរបស់ប្រទេសវៀតណាមបន្តជួបប្រទះបញ្ហាកង្វះខាតកំពង់ផែដែលមានចីរភាព និងការរៀបចំផែនការសម្រាប់ឃ្លាំងកុងតឺន័រផងដែរ ។ លើសពីនេះ បញ្ហាផ្សេងទៀតដូចជា ការតភ្ជាប់ការដឹកជញ្ជូននៅមានកម្រិត និងការចំណាយខ្ពស់ក្នុងផ្នែកដឹកជញ្ជូនផងដែរ ។
នាពេលថ្មីៗនេះ លោកអនុរដ្ឋមន្ត្រីដឹកជញ្ជូន Nguyen Nhat បានទទួលស្គាល់ថា ប្រព័ន្ធដឹកជញ្ជូនតាមផ្លូវទឹកនៅក្នុងប្រទេស គឺនៅតែពឹងផ្អែកខ្លាំងទៅលើផ្លូវទឹកធម្មជាតិ ខណៈរដ្ឋាភិបាលវៀតណាមមានថវិកាមិនគ្រប់គ្រាន់សម្រាប់ធ្វើឲ្យផ្លូវទឹកទាំងនោះផ្តល់សេវាកម្មដល់នាវាធំៗឡើយ ។
លោកបានមានប្រសាសន៍កាលពីសប្តាហ៍មុនថា ៖« ជារៀងរាល់ឆ្នាំ ប្រទេសវៀតណាមបានចំណាយទឹកប្រាក់អស់រាប់លានដុល្លារក្នុងការបូមខ្សាច់ទន្លេ និងមាត់សមុទ្រ ។ ដូច្នេះ ពួកគេគ្មានធនធានគ្រប់គ្រាន់ដើម្បីស្វែងរកជម្រើសថ្មីទេ » ។
លោក Nguyen Nhat ទទួលស្គាល់ថា ហេដ្ឋារចនាសម្ព័ន្ធផ្លូវទឹករបស់ខេត្ត-ក្រុងទាំង៦៣ នៅមិនទាន់អភិវឌ្ឍន៍ឡើយ ។ លើសពីនេះ ប្រទេសវៀតណាមមានប្រព័ន្ធផ្លូវទឹកតាមគម្រោងតែ១៥ប៉ុណ្ណោះ មានន័យថា ផ្លូវទឹកតាមទន្លេ និងសមុទ្រផ្សេងទៀត នៅមានភាពច្របូកច្របល់នៅឡើយ ។
បញ្ហាធំមួយទៀតដែលក្រុមហ៊ុនដឹកជញ្ជូនជាច្រើនជួបប្រទះនោះ គឺកំពង់ផែសុទ្ធតែស្ថិតនៅក្រោមការគ្រប់គ្រងរបស់អាជ្ញាធរកណ្តាល និងក្នុងតំបន់ ដែលធ្វើឲ្យក្រុមហ៊ុនទាំងនេះត្រូវចំណាយពេល និងថវិកាកាន់តែច្រើនឡើង ។
លោក Mai Le Loi នាយកគ្រប់គ្រងក្រុមហ៊ុន Vinalines Logistics Vietnam បានមានប្រសាសន៍ថា បញ្ហាធំមួយទៀត គឺវិស័យដឹកជញ្ជូននេះមិនអាចតភ្ជាប់ជាមួយផ្លូវគោកបានឡើយ ។ លើសពីនេះ ផ្លូវទឹករបស់វៀតណាមភាគច្រើនបានជួបប្រទះនឹងការកម្រិតកម្ពស់សម្រាប់ស្ពាន ជាដើម ៕
ចែករំលែកព័តមាននេះ