ខេត្តព្រៃវែង ៖ គិតមកទល់ព្រឹកថ្ងៃទី២៤ មេសា នេះ គឺនៅមិនទាន់រកឃើញសាកសពជនសង្ស័យដែលបានលោតពីលើស្ពានត្សឹបាសានៅឡើយ គិតចាប់តាំងពីថ្ងៃកើតហេតុនៃអំពើឃាតកម្មដ៏សាហាវឃោរឃៅមួយក្នុងបរិវេណសាលាបឋមសិក្សា និងអនុវិទ្យាល័យ ហ៊ុន សែន…
ខេត្តព្រៃវែង ៖ គិតមកទល់ព្រឹកថ្ងៃទី២៤ មេសា នេះ គឺនៅមិនទាន់រកឃើញសាកសពជនសង្ស័យដែលបានលោតពីលើស្ពានត្សឹបាសានៅឡើយ គិតចាប់តាំងពីថ្ងៃកើតហេតុនៃអំពើឃាតកម្មដ៏សាហាវឃោរឃៅមួយក្នុងបរិវេណសាលាបឋមសិក្សា និងអនុវិទ្យាល័យ ហ៊ុន សែន កំពង់ចម្លង កាលពីរសៀលថ្ងៃទី១៩ មេសា កន្លងមក ដែលជនសង្ស័យជាឃាតករ ឈ្មោះឥន ដារ៉ាឆៃរ៉ាត់ បានកាប់ប្រហារទៅលើអតីតប្រពន្ធស្លាប់ភ្លាមៗក្នុងថ្លុកឈាម រួចបានរត់ទៅលោតពីលើស្ពានត្សឹបាសាចូលទឹកទន្លេ ដើម្បីសម្លាប់ខ្លួន ។
ដោយសារតែរឿងឃាតកម្មនេះ គួរឱ្យរន្ធត់និងសាហាវខ្លាំងពេក បានធ្វើឱ្យដក់ជាប់នៅក្នុងអារម្មណ៍របស់មហាជន ហើយគ្រប់គ្នាសុទ្ធតែចង់ដឹងថា តើជនល្មើស ឥន ដារ៉ាឆៃរ៉ាត់ នៅរស់ ឬក៏ស្លាប់? ប៉ុន្តែសំណួរមួយនេះ រហូតមកទល់ពេលនេះ នៅមិនទាន់មានចម្លើយនៅឡើយទេ ។ ផ្ទុយទៅវិញ បែរជាលេចឮនូវពាក្យចរចាមអារ៉ាមជាច្រើន ដែលសុទ្ធតែគ្មានមូលដ្ឋានច្បាស់លាស់ ដោយខ្លះនិយាយថា ជនសង្ស័យមិនទាន់ស្លាប់ទេ ហើយបានរត់គេចខ្លួនទៅប្រទេសថៃបាត់ហើយ ។ ចំណែកខ្លះទៀតនិយាយថា ជនសង្ស័យស្លាប់ហើយ ឯសាកសពបានអណ្តែតតាមទឹកចូលទៅក្នុងប្រទេសហើយ ។
ចុងក្រោយថ្មីៗនេះ ក៏លេចចេញនូវពាក្យចរចាមអារ៉ាមមួយថ្មីទៀត ធ្វើឱ្យភ្ញាក់ផ្អើលដល់មហាជនសាជាថ្មី ដោយមានអ្នកខ្លះអះអាងថា ជនសង្ស័យត្រូវបានសមត្ថកិច្ចចាប់បាន កាលពីរសៀលថ្ងៃទី២១ មេសា នៅលើកោះតាជោ ក្នុងទន្លេមេគង្គ ក្នុងស្រុកលើកដែក ខេត្តកណ្តាល ព្រមទាំងមានអ្នកថតពីសកម្មភាពដែលសមត្ថកិច្ចចាប់បានជនសង្ស័យបង្ហោះក្នុងហ្វេសបុកថែមទៀតផង។
ជុំវិញការភ្ញាក់ផ្អើលលើពាក្យចរចាមអារ៉ាមទាំងនេះ ត្រូវបានសមត្ថកិច្ចស្រុកលើកដែកបញ្ជាក់ឱ្យដឹងថា មកដល់ពេលនេះ ជនសង្ស័យ ឥន ដារ៉ាឆៃរ៉ាត់ ស្លាប់ឬរស់ នៅមិនទាន់អាច់កំណត់បាននោះទេ ព្រោះរកមិនទាន់ឃើញទាំងមនុស្សនិងសាកសព ។ ប៉ុន្តែសមត្ថកិច្ចនៅតែបន្តជួលអ្នកជំនាញមុជទឹក ចុះរាវរកនៅក្រោមស្ពានត្សឹបាសា ត្រង់បរិវេណទីតាំងដែលជននោះលោតធ្លាក់ចុះ ។
គួររំលឹកថា កាលពីវេលាម៉ោង០២ និង១០នាទីរសៀលថ្ងៃទី១៩ មេសា ជនសង្ស័យ ឥន ដារ៉ាឆៃរ៉ាត់ អាយុ២១ឆ្នាំ បានស្ទាក់កាប់ប្រហារទៅលើនារីរងគ្រោះដែលត្រូវជាអតីតប្រពន្ធឈ្មោះ ទន់ ស្រីណយ អាយុ២០ឆ្នាំ កាប់ត្រូវចំផ្ទៃមុខចំនួន៣កាំបិតផ្គាក់ បណ្តាលអោយស្ត្រីរងគ្រោះស្លាប់បាត់បង់ជីវិតភ្លាមៗនៅក្នុងថ្លុកឈាម ដោយសារតែខឹងសុំប្រពន្ធផ្សះផ្សារជាគ្នាវិញមិនបាន ។ ហើយក្រោយពីកាប់សម្លាប់ប្រពន្ធរួច ជនល្មើសបានរត់ទៅលោតសម្លាប់ខ្លួនពីលើស្ពានត្សឹបាសា ធ្លាក់ចូលទៅក្នុងទឹកទន្លេបាត់ស្រមោលឈឹង ហើយរហូតមកដល់ពេលនេះ គេនៅមិនទាន់រកឃើញសាកសពនៅឡើយទេ ។
ព័ត៌មានលម្អឹតនឹងមានផ្សាយជូនលើទំព័រកាសែតកោះសន្តិភាព ។
គួររំលឹកថា ៖
https://kohsantepheapdaily.com.kh/article/625052.html
ចែករំលែកព័តមាននេះ