នៅសល់៥ថ្ងៃទៀតទេ បើនៅមិនគោរពកិច្ចសន្យាគឺរឹបអូសហើយ
- ភ្នំពេញ
រាជធានីភ្នំពេញ ៖ នៅវេលាព្រឹកថ្ងៃទី២៣ ខែមេសា ឆ្នាំ២០១៨នេះ កម្លាំងអាជ្ញាធរចម្រុះខណ្ឌមានជ័យ ដឹកនាំដោយលោក ឌី រ័ត្នខេមរុណ បានចុះពិនិត្យ…
រាជធានីភ្នំពេញ ៖ នៅវេលាព្រឹកថ្ងៃទី២៣ ខែមេសា ឆ្នាំ២០១៨នេះ កម្លាំងអាជ្ញាធរចម្រុះខណ្ឌមានជ័យ ដឹកនាំដោយលោក ឌី រ័ត្នខេមរុណ បានចុះពិនិត្យ និងធ្វើកំណត់ហេតុកិច្ចសន្យាមួយតម្រូវឲ្យម្ចាស់ទីតាំងផលិតទឹកទឹកម្ទេស ទឹកសៀង និងគ្រឿងបរិភោគមួយចំនួនទៀត ស្ថិតតាមបណ្តោយផ្លូវបេតុង ក្នុងក្រុមទី៧ ភូមិឫស្សី៣ សង្កាត់ស្ទឹងមានជ័យទី២ ខណ្ឌមានជ័យ រុះរើទីតាំងរបស់ខ្លួនចេញ ក្រោយពីអាជ្ញាធររកឃើញថា មានផលប៉ពាល់ច្រើនដល់ការរស់នៅ របស់ពលរដ្ឋក្បែរខាង។ ការចុះពិនិត្យ និងតម្រូវឲ្យម្ចាស់អាជីវកម្មរុះរើ ឬប្តូរទីតាំងចេញដោយខ្លួនឯងខាងលើនេះ គឺធ្វើឡើងជាលើកទី២ហើយ ខណៈដែលលើកទី១ អាជ្ញាធរទុករយៈពេល២ខែឲ្យម្ចាស់ទីតាំងរុះរើសម្ភារចេញ ឬប្តូរទីតាំងអាជីវកម្មទៅកាន់កន្លែងផ្សេង។ ប៉ុន្តែគិតតាំងពីពាក់កណ្តាលខែធ្នូ ឆ្នាំ២០១៧ មកទល់នឹងបច្ចុប្បន្ន ម្ចាស់ទីតាំងមិនបានគោរពតាមការណែនាំរបស់អាជ្ញាធរឡើយ ពិសេសនោះ មិនគោរពទៅតាមកិច្ចសន្យាដែលខ្លួន បានយល់ព្រមថានឹងបញ្ឈប់សង្វាក់អាជីវកម្មនេះដោយខ្លួនឯងក្រោយអាជីវកម្មមានផលប៉ះពាល់ច្រើនដល់បងប្អូនពលរដ្ឋរស់នៅក្បែរខាង។
អភិបាលរងខណ្ឌមានជ័យ លោក ឌី រ័ត្នខេមរុណ បានឲ្យដឹងថា ផលប៉ះពាល់ទាំង៦ចំណុច ដែលពលរដ្ឋប្តឹងនោះរួមមាន៖ ១.ចំហាយម្ទេសចេញពីឡចំហុយ បង្កជាក្លិនឆួលខ្លាំង ស្ទើរទ្រាំពុំបានដល់អ្នករស់នៅ ជិតខាង រហូតកន្លងមកធ្លាប់មានអ្នកឈឺជាបន្តបន្ទាប់ ព្រោះតែសុខភាពខ្សោយមិនអាចទ្រាំទ្រក្លិនឆួលនេះបាន ២. ម្រែងភ្លើងហ៊ុយចេញពីឡចំហុយ ហុយចូលផ្ទះបងប្អូនប្រជាពលរដ្ឋ។ ៣.សំឡេរ៉ឺម៉កម៉ូតូដឹកអីវ៉ាន់ ដែលពុំមាន សឺម៉ាំងត្រឹមត្រូវ ៤.សំឡេងលើកដាក់ឥវ៉ាន់ ៥.សំឡេងកម្មករ ស្រែកឡូឡា ទាំងថ្ងៃទាំងយប់ ៦.រ៉ឺម៉កម៉ូតូដឹកអីវ៉ាន់ ចតពាសពេញផ្លូវ។ យ៉ាងណាមិញ ការចុះពិនិត្យលើកទី២នេះ អាជ្ញាធរសម្រេចទុករយៈពេល៥ថ្ងៃ ឲ្យម្ចាស់ទីតាំងរុះរើរសម្ភារ និងអីវ៉ាន់ទាំងអស់ដែលមានក្នុងទីតាំងរបស់ខ្លួន។ បើពុំដូច្នោះទេ កម្លាំងអាជ្ញាធរ នឹងចុះមករឹបអូសរាល់សម្ភារ ឬទំនិញទាំងអស់ដែលនៅសល់យកទៅរក្សាទុកនៅសាលាខណ្ឌជាក់ជាមិនខាន។ ក្រោយការធ្វើកំណត់ហេតុរួចមក ម្ចាស់អាជីវកម្មយល់ព្រមធ្វើតាមការពន្យល់ណែនាំរបស់អាជ្ញាធរ ដោយមានស្នាមមេដៃលើកំណត់ហេតុកិច្ចសន្យាជាភស្តុតាង។
គួររំលឹកថា កាលពីរសៀលថ្ងៃទី១៥ ខែធ្នូ ឆ្នាំ២០១៧កន្លងទៅ គណៈកម្មាការចម្រុះ មានមន្ត្រីភូមិ សង្កាត់ ខណ្ឌ រួមជាមួយមន្ត្រីកាំកុងត្រូល ដឹកនាំដោយលោក ឌី រ័ត្នខេមរុណ អភិបាលរងខណ្ឌ បានចុះពិនិត្យម្តងរួចមកហើយ ដោយរកឃើញថា ទីតាំងផលិតទឹកសៀង ទឹកម្ទេស ទឹកត្រីកោះកុង ទឹកខ្មេះ និងទឹកប្រេងខ្យង នៅទីតាំងអាជីវកម្មមួយនេះ ពិតជាមានផលប្រឈមច្រើន ដូចពាក្យបណ្តឹងរបស់បងប្អូនពលរដ្ឋប្រាកដមែន។ កំឡុងការចុះពិនិត្យលើកទី១ដដែលនោះ លោក គង់ វុទ្ធី អនុប្រធានផែស្ងួតចុងទី នៃអគ្គនាយកដ្ឋានកាំកុងត្រូល បានប្រាប់ឲ្យដឹងថា បន្ទាប់ពីកម្លាំងមន្ត្រីជំនាញធ្វើការពិសោធន៍ លើទំនិញទាំង៥មុខ ដូចដែលមានរៀបរាប់ពីខាងលើរួចមក ឃើញថាទំនិញ២មុខ ក្នុងនោះមានទឹកត្រីកោះកុង និងទឹកខ្មេះ គឺពុំមាននូវសារធាតុខុសប្រក្រតីឡើយ គឺបានលាយឡំត្រឹមត្រូវតាមសារធាតុផ្សំ។ ដោយឡែក៣មុខផ្សេងទៀតមាន ទឹកម្ទេស ទឹកសៀង និងទឹកប្រេងខ្យង គឺមន្ត្រីជំនាញមិនអាចធ្វើការពិសោធនៅនឹងកន្លែងបានឡើយ មានតែយកទៅកាន់ឡាបូ ឬហៅថាមន្ទីរពិសោធន៍ទើបអាចពិនិត្យដឹងថា ទំនិញទាំង៣មុខនេះ មានលាយឡំសាធារតុគីមីអ្វីខ្លះ ហើយមានមេរោគច្រើនប៉ុណ្ណាក្នុងទំនិញ៣មុខនេះ។
ទន្ទឹមនឹងនោះលោក គង់ វុទ្ធី បញ្ជាក់ថា បើទោះបីជាទំនិញទាំង៣មុខខាងលើ មិនទាន់បានយកពិនិត្យនៅមន្ទីរពិសោធន៍ក៏ដោយ ប៉ុន្តែក្រុមជំនាញរបស់លោកអាចវាយតម្លៃបានថា ទំនិញទាំង៣មុខនេះ គឺគ្មានអនាម័យត្រឹមត្រូវឡើយ ព្រោះសង្វាក់ផលិតកម្ម គ្មានការវេចខ្ចប់ទុកដាក់ត្រឹមត្រូវតាមការណែនាំរបស់មន្ទីរ និងក្រសួងជំនាញពាក់ព័ន្ធឡើយ។ ជុំវិញចំណាត់ការរបស់មន្ត្រីអាជ្ញាធរខណ្ឌមានជ័យ បងប្អូនប្រជាពលរដ្ឋជាច្រើនគ្រួសារដែលរស់នៅជុំវិញ ទីតាំងផលិតទឹកសៀង និងទឹកម្ទេសខាងលើ មានការសាទរជាខ្លាំងលើចំណាត់ការនេះ ដែលកន្លងមកពួកគាត់ រស់នៅជាមួយបញ្ហាជាច្រើនខាងលើមកជាច្រើនឆ្នាំហើយ។
លោក ឌី រ័ត្នខេមរុណ មានប្រសាសន៍ថា ក្នុងនាមជាមន្ត្រីបម្រើរាស្ត្រ អាជ្ញាធរមូលដ្ឋាន មិនដែលមានគោការណ៍ និងគំនិតណាមួយទៅបិទអាជីវកម្មរកស៊ី របស់បងប្អូនពលរដ្ឋឡើយ ប៉ុន្តែសូមបងប្អូនដែលមានអាជីវកម្មផលិតទំនិញទាំងអស់ ក្នុងមូលដ្ឋានខណ្ឌមានជ័យ មេត្តាធ្វើអ្វីមួយឲ្យស្របតាមលក្ខណៈច្បាប់ដែលអាចធានាបានមិនមានជាការប៉ះពាល់ដល់អ្នកដទៃ។ បងប្អូនចង់ជំណេញបានប្រាក់កាក់ច្រើនចេញពីអាជីវកម្មរកស៊ីរបស់ខ្លួន តែភ្លេចគិតពីផលប៉ពាល់ដល់ពលរដ្ឋដទៃ ដូច្នេះហើយរាល់អាជីវកម្មទាំងឡាយណាដែលធ្វើខុសពីច្បាប់ និងបង្កជាផលប៉ះពាល់ច្រើនដល់ពលរដ្ឋទូទៅ ជាច្រើនក្នុងមូលដ្ឋាន អាជ្ញាធរនឹងប្រើវិធានការណ៍រុះរើ ក៏ដូចជាបិទទីតាំងអាជីវកម្មចោលតែម្តង ជាក់ស្តែងដូចករណីខាងលើ៕
ចែករំលែកព័តមាននេះ