ខេត្តបន្ទាយមានជ័យ ៖ ជនសង្ស័យចំនួន៣នាក់ និងអ្នកប្រើប្រាស់ចំនួន៦នាក់ ត្រូវបានកម្លាំងនគរបាល ក្រុងប៉ោយប៉ែត ល្បាតនៅចំណុចឡាក់គី ស្ថិតក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត…
ខេត្តបន្ទាយមានជ័យ ៖ ជនសង្ស័យចំនួន៣នាក់ និងអ្នកប្រើប្រាស់ចំនួន៦នាក់ ត្រូវបានកម្លាំងនគរបាល ក្រុងប៉ោយប៉ែត ល្បាតនៅចំណុចឡាក់គី ស្ថិតក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ប្រទះឃើញ និងធ្វើឃាត់ឆែកឆេររកឃើញថ្នាំញៀន និងសម្ភារសម្រាប់ជក់មួយចំនួន នៅវេលាម៉ោង៣ និង៣០នាទីរសៀល ថ្ងៃទី២២ ខែមេសា ឆ្នាំ២០១៨។ សម្ភារ និងជនសង្ស័យត្រូវបានបញ្ជូនមកកាន់ការិយាល័យនគរបាលជំនាញ នៅស្នងការដ្ឋាន នគរបាលខេត្តបន្ទាយមានជ័យ ដើម្បីចាត់ការបន្ត។
លោកវរសេនីយ៍ឯក ធិន ស៊ិនដេត អធិការនគរបាល ក្រុងប៉ោយប៉ែតបានឲ្យដឹងថា៖ មុខសញ្ញាសង្ស័យជួញដូរគ្រឿងញៀនចំនួន៣នាក់ មានឈ្មោះ នៅ ចាន់ហ៊ាង ភេទប្រុស អាយុ២៤ឆ្នាំ នៅភូមិសាមគ្គីមានជ័យ សង្កាត់ និងក្រុងប៉ោយប៉ែត,២/-ឈ្មោះ ភិន ប្រុស អាយុ៣២ឆ្នាំ នៅភូមិបាលិលេយ្យ១ សង្កាត់ប៉ោយប៉ែត,៣/-ឈ្មោះ ហេង សិលា ភេទប្រុស អាយុ១៩ឆ្នាំ នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត និងចាប់ឃាប់ឃាត់ខ្លួនអ្នកប្រើប្រាស់ចំនួន៦នាក់ផ្សេងទៀតផងដែរ។ ជាមួយនឹងការចុះបង្ក្រាបនេះសមត្ថកិច្ចបានធ្វើការដកហូតបានវត្ថុតាងសង្ស័យជាថ្នាំញៀន ម្សៅពណ៌ក្រាម ចំនួន៣ង់តូច និង១ថង់ធំ,ទូរស័ព្ទ៤គ្រឿង ម៉ូតូ១គ្រឿង រួមទាំងសម្ភារសម្រាប់ជក់មួយចំនួន។
ចំពោះលទ្ធផល ដែលទទួលបាននេះ ដោយអនុវត្តតាមបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ទោ អាត់ ខែម ស្នងការនគរបាលខេត្ត និងមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត បន្ទាយមានជ័យ។ លោកឧត្តមសេនីយ៍ត្រី ចាប សុផារិទ្ធ ស្នងការរង ទទួលផែនប្រឆាំងបទល្មើស បានបញ្ជាក់ថា៖ នៅចំពោះមុខសមត្ថកិច្ចជនសង្ស័យជាមុខសញ្ញាជួញដូរទាំង៣នាក់ បានសារភាពថា ពួកគេធ្លាប់ធ្វើសកម្មភាពជួញដូរនេះ២ទៅ៣ដងហើយ ចំណែកអ្នកប្រើប្រាស់ទាំង៦នាក់ ក៏បានសារភាពផងដែរ ថាពួកគេធ្លាប់ប្រើប្រាស់ថ្នាំញៀនជាយូរឆ្នាំហើយដែរ។ បច្ចុប្បន្នជនសង្ស័យជាអ្នកជួញដូរ និងអ្នកប្រើប្រាស់សរុបចំនួន៩នាក់ កម្លាំងជំនាញកំពុងកសាងសំណុំរឿងទាំងវត្ថុតាងទៅសាលាដំបូងខេត្ត ដើម្បីចាត់ការតាមនីតិវិធី៕
ចែករំលែកព័តមាននេះ