ប្រទេសកូរ៉េទាំង២ ៖ កងទ័ពកូរ៉េខាងត្បូងកាលពីថ្ងៃទី២៣ មេសា បានបញ្ឈប់ការចាក់ផ្សាយតាមប្រដាប់បំពងសំឡេងធំៗ ដែលអំពាវនាវឱ្យកងទាហានកូរ៉េខាងជើងនៅតាមព្រំដែនរត់ចោលជួរ ។ កាយវិការនេះជាកាយវិការបង្រួបបង្រួមមួយមុនការជួបគ្នាកំពូលអន្តរកូរ៉េនាថ្ងៃទី២៧ មេសា ។…
ប្រទេសកូរ៉េទាំង២ ៖ កងទ័ពកូរ៉េខាងត្បូងកាលពីថ្ងៃទី២៣ មេសា បានបញ្ឈប់ការចាក់ផ្សាយតាមប្រដាប់បំពងសំឡេងធំៗ ដែលអំពាវនាវឱ្យកងទាហានកូរ៉េខាងជើងនៅតាមព្រំដែនរត់ចោលជួរ ។ កាយវិការនេះជាកាយវិការបង្រួបបង្រួមមួយមុនការជួបគ្នាកំពូលអន្តរកូរ៉េនាថ្ងៃទី២៧ មេសា ។
ក្រសួងការពារប្រទេសកូរ៉េខាងត្បូងថ្លែងនាថ្ងៃទី២៣ មេសា ថា យើងសង្ឃឹមថា ការសម្រេចនេះនឹងញ៉ាំងឱ្យកូរ៉េទាំង២ បញ្ឈប់ការរិះគន់វាយប្រហារគ្នាទៅវិញទៅមក ហើយវានឹងរួមចំណែកដល់ការបង្កើតបរិយាកាសសន្តិភាពមួយ ។
កូរ៉េខាងត្បូងបានចាក់ផ្សាយចាប់តាំងពីយូរមកហើយ បណ្តាព័ត៌មានលាយជាមួយបទចម្រៀង ព្រមទាំងសារឃោសនាទាំងឡាយដែលអំពាវនាវឱ្យកងទាហានកូរ៉េខាងជើងរត់ចោលជួរតាមរយៈប្រដាប់បំពងសំឡេងធំៗដាក់ផ្គុំគ្នានៅតាមបណ្តោយព្រំដែនកូរ៉េទាំង២ ។ ចំណែកកូរ៉េខាងជើងវិញក៏ដំឡើងការផ្សាយឃោសនារបស់ខ្លួនវិញដែរ ។
ការសម្រេចនេះ បង្ហាញពីការផ្លាស់ប្តូរខាងការទូតក្នុងតំបន់ចាប់តាំងពីការប្រកួតកីឡាអូឡាំពិករដូវរងានៅកូរ៉េខាងត្បូងមក ។ សញ្ញាធូរស្រាលចុងក្រោយគឺការប្រកាសនាថ្ងៃទី២១ មេសា របស់ទីភ្នាក់ងារព័ត៌មានផ្លូវការកូរ៉េខាងជើង KCNA ពីការលុបចោលចាប់ពីថ្ងៃទី២១ មេសា នោះទៅការសាកល្បងនុយក្លេអ៊ែរ និងមីស៊ីលបាលីស្ទិក ហើយបំផ្លាញចោលទីតាំងសាកល្បងនុយក្លេអ៊ែររបស់ខ្លួន ។ ក្រុងសេអ៊ូលសម្តែងការអបអរសាទរភ្លាមៗដោយសារនោះជាការរីកចម្រើនធំមួយសម្រាប់រំសាយនុយក្លេអ៊ែរនៅឧបទ្វីបកូរ៉េដែលពិភពលោករង់ចាំមើល ។
កាសែតវ៉ាស៊ីនតោនប៉ុស្តិ៍រាយការណ៍កាលពីថ្ងៃទី២២ មេសា ថា ប្រធានាធិបតីអាមេរិក
ពុំទាន់មានបំណងលុបចោលទណ្ឌកម្មសេដ្ឋកិច្ចណាមួយប្រឆាំងរបបកូរ៉េខាងជើងឡើយ បើដរាបណាប្រទេសនេះពុំទាន់ចាប់ផ្តើមរំលាយចោលកម្មវិធីនុយក្លេអ៊ែររបស់ខ្លួនទេនោះ ។
អ្នកទទួលខុសត្រូវអាមេរិកម្នាក់អះអាងប្រាប់កាសែតនេះថា ពេលដែលប្រធានាធិបតីនិយាយថា លោកនឹងពុំធ្វើការខុសឆ្គងនានាដូចកាលពីអតីតកាលមានន័យថា លោកនឹងពុំទាន់ធ្វើសម្បទានគួរឱ្យកត់សម្គាល់ដូចជាលុបចោលការដាក់ទណ្ឌកម្មជាដើម បើដរាបណាកូរ៉េខាងជើងនៅពុំទាន់បំផ្លាញចោលភាគច្រើននៃកម្មវិធីនុយក្លេអ៊ែររបស់គេទេនោះ ៕
ចែករំលែកព័តមាននេះ