រាជធានីភ្នំពេញ ៖ សំណុំរឿងបណ្តឹងឧទ្ធរណ៍របស់លោកមាជ សុវណ្ណារ៉ា អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ និងបក្ខពួកចំនួន១០នាក់ផ្សេងទៀត ត្រូវសាលាឧទ្ធរណ៍នឹងបើកសវនាការបីថ្ងៃជាប់គ្នា គិតចាប់ពីថ្ងៃទី២៣ ខែមេសា ដល់ថ្ងៃទី២៥ ខែមេសា ឆ្នាំ២០១៨ ករណីហិង្សានៅទីលានប្រជាធិបតេយ្យកាលពីឆ្នាំ២០១៤ កន្លងទៅ ។នេះបើតាមការបញ្ជាក់របស់មន្ត្រីសាលាឧទ្ធរណ៍ ។
គួរបញ្ជាក់ថា កាលពីពាក់កណ្តាល ខែកក្កដា ឆ្នាំ២០១៥ កន្លងទៅសាលាដំបូងរាជធានីភ្នំពេញបានផ្តន្ទាទោសសកម្មជន និងមន្ត្រីគណបក្សសង្គ្រោះជាតិចំនួន១១រូប ចន្លោះពី៧ឆ្នាំទៅ២០ឆ្នាំក្រោមការចោទប្រកាន់ពីបទចូលរួមក្នុងចលនាកុបកម្ម ។ តាមមាត្រា៤៥៧នៃក្រមព្រហ្មទណ្ឌនិងបទដឹកនាំកុបកម្មតាមមាត្រា៤៥៩ នៃក្រមព្រហ្មទណ្ឌប្រព្រឹត្តកាលពីថ្ងៃទី១៥ ខែកក្កដា ឆ្នាំ២០១៤ នៅលើស្ពាននាគក្បែរទីលានប្រជាធិបតេយ្យ ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។ តុលាការបានបញ្ជាក់ថា ជនជាប់ចោទចំនួន១១នាក់ គឺ១- លោក មាជ សុវណ្ណារ៉ា ២- លោក ឃិន រឿន ៣- លោក អាន បឋម ៤- លោក អ៊ុក ពេជ្រសំណាង ៥- លោក ស៊ុំ ពុទ្ធី ៦- លោក នាង សុឃុន ៧- លោកកែ ឃីម ៨- លោកសាន សីហៈ ៩- លោក អឿ ណារិត ១០- លោក ទេព ណារិន និង១១ – លោកសាន គឹមហេង ។
ជនជាប់ចោទត្រូវបានចាប់ខ្លួនបន្តបន្ទាប់កាលពីកំឡុងខែកក្កដា និងខែវិច្ឆិកា ឆ្នាំ២០១៤ ។ សវនាការរយៈពេលពេញមួយ ថ្ងៃទី២៣ ខែមេសា ឆ្នាំ២០១៨ នៅសាលាឧទ្ធរណ៍សម្រាប់ជនជាប់១១នាក់ នៅមិនទាន់ចប់នៅឡើយទេ គិតត្រឹមម៉ោង៤រសៀលថ្ងៃដដែល ។ គេមានការកត់សម្គាល់ថា នៅព្រឹកថ្ងៃទី២៣ ខែមេសា ឆ្នាំ២០១៨ អនុរក្សពន្ធនាគារបាននាំខ្លួនជនជាប់ទាំង១១នាក់មកដល់សាលាឧទ្ធរណ៍ កាលពីវេលាម៉ោង៦ព្រឹក ដើម្បីចូលរួមសវនាការជំនុំជម្រះលើបណ្តឹងឧទ្ធរណ៍របស់ពួកគាត់ប្រឆាំងនឹងការសម្រេចរបស់សាលាដំបូងរាជធានីភ្នំពេញដែលបានផ្តន្ទាទោសពួកគាត់ពី៧ ដល់២០ឆ្នាំ ដែលពួកគាត់ថា មិនអាចទទួលយកបាន ។
ជនជាប់ចោទទាំងអស់ត្រូវបានចំណាយពេលពេញមួយថ្ងៃនៅក្នុងបរិវេណសាលាឧទ្ធរណ៍តាំងពីព្រឹកដល់រសៀលសម្រាប់ចូលរួមសវនាការដោយមានវត្តមានមេធាវីការពារក្តីរបស់ពួកគាត់ផងដែរ ។ គេមានការកត់សម្គាល់ទៀតថា កាលពីសវនាការនៅសាលាដំបូងរាជធានីភ្នំពេញមានជនរងគ្រោះចំនួនជាង៣០នាក់ បានដាក់ពាក្យប្តឹងជនជាប់ចោទក្នុងប្រព្រឹត្តិការណ៍ហិង្សានៅទីលានប្រជាធិបតេយ្យចាស់ក្បែរវត្តភ្នំ ដែលបណ្តាលឲ្យពួកគាត់ជាក្រុមសន្តិសុខសាលាខណ្ឌដូនពេញរងរបួសធ្ងន់ និងស្រាល ។
ទោះបីយ៉ាងណានៅពេលសវនាការក្រុមជនជាប់បានបដិសេធថា ពួកគាត់មិនបានប្រើហិង្សាវាយទៅលើកជនរងគ្រោះទេ ។ ជនជាប់ចោទថា ក្នុងពេលតវ៉ានោះក៏មានហិង្សាកើតឡើងទោះជាពួកគាត់តវ៉ាដោយអហិង្សាទាមទារឲ្យមានការដោះលែងទីលានប្រជាធិបតេយ្យដែលត្រូវបានគេហ៊ុមព័ទ្ធដោយបន្លាលួស ។ កាលពីមុនពេលបុណ្យចូលឆ្នាំខែ្មរកន្លងទៅអតីតតំណាងរាស្ត្រគណបក្សប្រឆាំងលោកអ៊ូ ច័ន្ទរ័ត្ន បានស្នើសុំឲ្យមានការដោះលែងជនជាប់ចោទទាំង១១នាក់ និងអ្នកទោសមួយចំនួនទៀត កំពុងជាប់ឃុំឃាំង នៅពន្ធនាគារព្រៃស ។
លោកអ៊ូ ច័ន្ទរ័ត្នបានហៅអ្នកទោសអតីតសកម្មជន និងមន្ត្រីគណបក្សប្រឆាំងទាំងនោះថា ជាអ្នកទោស«មនសិកា» ។ លោកអ៊ូ ច័ន្ទរ័ត្នធ្លាប់ប្រាប់អ្នកសារព័ត៌មាននៅក្រៅពន្ធនាគារថា អ្នកទោសទាំងនោះមិនបានប្រព្រឹត្តបទឧក្រិដ្ឋ ឬគ្រឿងញៀនធ្ងន់ធ្ងរទេ ។ លោកថា « ការឃុំខ្លួនពួកគាត់ប៉ះពាល់ដល់អនាគត និងជីវភាពគ្រួសារពួកគាត់ខ្លាំងណាស់ ។ ពួកគាត់គួរត្រូវបានដោះលែងជួបគ្រួសារ ព្រោះបានអនុវត្តទោសច្រើន និងមានការកែប្រែខ្លួន» ផងដែរ ។
ក្រសួងយុត្តិធម៌កាលពីកំឡុងពេលបុណ្យចូលឆ្នាំខ្មែរបានប្រជុំគណៈកម្មការត្រួតពិនិត្យបញ្ជីអ្នកទោសស្នើសុំបន្ថយ និងលើកលែងទោសមិនមានឈ្មោះអ្នកទោសអតីតសកម្មជន និងអតីតមន្ត្រីគណបក្សប្រឆាំងណាម្នាក់ទេ ។ ក្រោយមកមានអ្នកទោស៥០នាក់ ត្រូវបានបន្ថយទោស៤២នាក់ និងលើកលែងទោស៨នាក់ ។
លោក សុច សុផាន់ណា អគ្គនាយករងព្រហ្មទណ្ឌនៃក្រសួងយុត្តិធម៌បានថ្លែងប្រាប់អ្នកសារព័ត៌មាននៅរសៀលថ្ងៃទី២៣ ខែមេសា ឆ្នាំ២០១៨នេះថា ក្នុងកិច្ចប្រជុំ ដើម្បីពិនិត្យមើលលើបញ្ជីស្នើសុំបន្ថយទោស និងលើកលែងទោសដល់ទណ្ឌិតសម្រាប់ពិធីបុណ្យពិសាខបូជាមិនមានឈ្មោះអតីតសកម្មជន និងអតីតតំណាងរាស្ត្របក្សប្រឆាំងណាម្នាក់ទេ ។
លោកថ្លែងបញ្ជាក់ថា« មិនមែនឈ្មោះ សកម្មជនបក្សប្រឆាំង និងសកម្មជនដីធ្លីក្នុងបញ្ជីស្នើសុំនេះទេ»។ លោកថា អ្នកទោសអនុវត្តទោសបានពីរភាគបី(២/៣) អាចលើកលែងទោស និងអ្នកទោសណាអនុវត្តទោសបានមួយភាគបី(១/៣)អាចសុំបន្ថយទោស ៕
ចែករំលែកព័តមាននេះ