ខេត្តកំពង់ធំ ៖ ឧប្បត្តិហេតុគ្រោះថ្នាក់ចរាចរខាងលើមួយបានកើតឡើងកាលពីវេលាម៉ោងជិត១២ថ្ងៃត្រង់ ថ្ងៃទី២២ ខែមេសា ឆ្នាំ២០១៨ នៅតាមបណ្ដោយផ្លូវជាតិ៦ ស្ថិតក្នុងភូមិត្រាច ឃុំកំពង់ចិនជើង ស្រុកស្ទោង…
ខេត្តកំពង់ធំ ៖ ឧប្បត្តិហេតុគ្រោះថ្នាក់ចរាចរខាងលើមួយបានកើតឡើងកាលពីវេលាម៉ោងជិត១២ថ្ងៃត្រង់ ថ្ងៃទី២២ ខែមេសា ឆ្នាំ២០១៨ នៅតាមបណ្ដោយផ្លូវជាតិ៦ ស្ថិតក្នុងភូមិត្រាច ឃុំកំពង់ចិនជើង ស្រុកស្ទោង ខេត្តកំពង់ធំ ។
ប្រភពព័ត៌មានពីសមត្ថកិច្ចបានឲ្យដឹងថា ករណីគ្រោះថ្នាក់ចរចរាខាងលើបានបង្កឡើងដោយជនរងគ្រោះអ្នកបើកម៉ូតូសេ១២៥ ពណ៌ខ្មៅ គ្មានផ្លាកស្លាកលេខ បើកបរដោយឈ្មោះ អ៊ុ ស្រីឌីន ភេទស្រី អាយុ២៨ឆ្នាំ នៅភូមិដូង ឃុំបល្ល័ង្ក ស្រុកបារាយណ៍ ខេត្តកំពង់ធំ ស្លាប់នៅកន្លែងកើតហេតុ (មិនពាក់មួកសុវត្តិភាព) និងអ្នករួមដំណើរជាមួយឈ្មោះ យី បូឡន់ ភេទស្រី អាយុ២៤ឆ្នាំ នៅភូមិចំបក់ផ្អែម ឃុំរស្មី ស្រុករវៀង ខេត្តព្រះវិហារ របួសធ្ងន់ (មិនពាក់មួកសុវត្ថិភាពដូចគ្នា) បើយោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញជនរងគ្រោះជិះម៉ូតូឌុបគ្នានៅក្នុងទិសដៅពីជើងទៅត្បូងស្របទិសគ្នាជាមួយនឹងរថយន្តសាំយ៉ុង ពណ៌ស ពាក់ផ្លាកលេខ ភ្នំពេញ ២U-៦៥៦២ លុះមកដល់កន្លែងកើតហេតុខាងលើ អ្នកជិះម៉ូតូក៏បានបើកបត់ឆ្វេងដោយខ្វះការប្រុងប្រយ័ត្ន រថយន្តជាន់ហ្វ្រាំងមិនជាប់ក៏បុកពេញទំហឹង បណ្ដាលឱ្យស្លាប់ម្នាក់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ ឃើញដូច្នេះអ្នកបើកបររថយន្តក៏បានចុះរត់គេចខ្លួនបាត់ ។ សមត្ថកិច្ចប្រាប់ថា ករណីគ្រោះថ្នាក់ចរាចរនេះ គឺបណ្ដាលមកពីម៉ូតូបើកបត់ឆ្វេងខ្វះការប្រុងប្រយ័ត្ន គួបផ្សំជាមួយនឹងរថយន្តសាំយ៉ុងបើកលឿន ។
បន្ទាប់ពីសមត្ថកិច្ចវាស់វែងរួច សាកសពជនរងគ្រោះត្រូវបានសាច់ញាតិយកទៅធ្វើបុណ្យតាមប្រពៃណី អ្នករងគ្រោះបញ្ជូនទៅសង្គ្រោះ ចំណែករថយន្ត និងម៉ូតូយកទៅរក្សារទុកនៅអធិការដ្ឋាននគរបាលស្រុកដើម្បីស្រាវជ្រាវរកម្ចាស់រថយន្តមកដោះស្រាយទៅតាមនីតិវិធី ៕
ចែករំលែកព័តមាននេះ