ខេត្តព្រះវិហារ ៖ ប្រតិភូអនុព័ន្ធយោធា១៣ប្រទេសដែលមានសមាជិកចំនួន១៧រូប បានថ្លែងថា អ្វីដែលជាការពិតពួកគេបានឃើញហើយ ពួកអស់លោកទាំងអស់គ្នាសូមគាំទ្ររដ្ឋាភិបាលកម្ពុជាក្នុងការថែទាំ និងគ្រប់គ្រង ប្រាសាទព្រះវិហារឱ្យបានល្អ ។ នេះជាការអះអាងដោយចំហកាលពីព្រឹកថ្ងៃទី៣ មីនា នៅលើប្រាសាទព្រះវិហារ ខណៈពេលប្រតិភូអនុព័ន្ធយោធាបានធ្វើទស្សនកិច្ចមួយដើម្បីពិនិត្យមើលគ្រោះមហន្តរាយនៅតំបន់ប្រាសាទព្រះវិហារដែលសៀមបានផ្លោងដាក់ចំនួនជាង៤០០គ្រាប់ក្នុងសង្គ្រាមឈ្លានពានពីថ្ងៃទី៤ដល់ទី៧ កុម្ភៈ ។
ការធ្វើទស្សនកិច្ចរបស់អនុព័ន្ធយោធាប្រទេសជាមិត្តចំនួន១៣ ប្រទេសនេះ បានធ្វើឡើងក្រោមក្រសែភ្នែកក្តៅក្រហាយពីរាជរដ្ឋាភិបាលក្រុងបាងកក និងមេទ័ពសៀមផងដែរ បន្ទាប់ពីបានធ្វើការរារាំងមុនពេលមានដំណើរទស្សនកិច្ចនេះ ដោយបានធ្វើការតវ៉ាតាមរយៈស្ថានទូតកម្ពុជាប្រចាំក្រុងបាងកក តវ៉ាតាមរយៈក្រសួងការពារជាតិ និងតាមរយៈបញ្ជាការជួរមុខតំបន់ប្រាសាទព្រះវិហារ ។ ទោះបីជាបែបណា ការតវ៉ាដោយសំអាងថា អនុព័ន្ធយោធាមិនអាចធ្វើដំណើរលើតំបន់៤,៦ ស្អីណានោះមិនមានប្រសិទ្ធភាពទេ ផ្ទុយទៅវិញក្បួនរថយន្តជាច្រើនគ្រឿងរបស់ប្រតិភូអនុព័ន្ធយោធាបានធ្វើដំណើរឡើងដល់ប្រាសាទព្រះវិហារដោយមានការជូនដំណើរពីមន្ត្រីយោធាជាន់ខ្ពស់កម្ពុជាផងដែរ ។
តាមសេចក្តីរាយការណ៍បានឱ្យដឹងថា លោកនាយឧត្តមសេនីយ៍នាង ផាត រដ្ឋលេខាធិការក្រសួងការពារជាតិ និងលោកឧត្តមសេនីយ៍ទោ ហ៊ុន ម៉ាណែត មេបញ្ជាការរងកងទ័ពជើងគោក បានដឹកនាំប្រតិភូអនុព័ន្ធយោធា១៣ប្រទេសប្រចាំកម្ពុជា ទៅធ្វើទស្សនកិច្ចនៅតំបន់ប្រាសាទព្រះវិហារ និងត្រួតពិនិត្យការខូចខាតសំណង់ប្រាសាទព្រះវិហារដែលជាបេតិកភណ្ឌពិភពលោក ទទួលរងនូវមហន្តរាយដ៏ធ្ងន់ធ្ងរពីសំណាក់ទាហានសៀមឈ្លានពាន ដែលបានបាញ់ផ្លោងអាវុធធុនធ្ងន់ដាក់កាលពីដើមខែ កុម្ភៈ ។ ការអញ្ជើញដល់នៃប្រតិភូអនុព័ន្ធយោធា១៣ប្រទេសមានសមាសភាព១៧រូបនេះ ក្រោមការទទួលបដិសណ្ឋារកិច្ចពីសំណាក់លោកនាយឧត្តមសេនីយ៍ជា តារា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការឯកភាពសមរភូមិមុខ ទិសយោធភូមិភាគទី៤ ប្រចាំតំបន់ប្រាសាទព្រះវិហារ ។
នាឱកាសនោះ លោកនាយឧត្តមសេនីយ៍ ជាតារា បានមានប្រសាសន៍ស្វាគមន៍ និងពន្យល់ដល់ប្រតិភូ ឱ្យបានដឹងពីស្ថានការណ៍យោធាក្នុងតំបន់ប្រាសាទព្រះវិហារ ដែលបង្កឡើងពីសំណាក់យោធាសៀមឈ្លានពានកន្លងមកលើអធិបតេយ្យភាពរបស់កម្ពុជា ។ មិនតែប៉ុណ្ណោះ នៅពេលថ្មីៗកន្លងទៅ សៀមបានបាញ់ផ្លោងអាវុធធុនធ្ងន់បំផ្លិចបំផ្លាញប្រាង្គប្រាសាទព្រះវិហារដែលជាបេតិកភណ្ឌពិភពលោក ធ្វើឱ្យទទួលរងការខូចខាតយ៉ាងធ្ងន់ធ្ងរទៀតផង ។
ប្រតិភូបានឡើងទៅទស្សនាប្រាង្គប្រាសាទនិងពិនិត្យមើលស្លាកស្នាមនៃមហន្តរាយនៅប្រាង្គប្រាសាទហើយប្រតិភូទាំងអស់ក៏បានចូលរួមសោកស្តាយយ៉ាងក្រៃលែងនិងបានចូលទៅពិនិត្យមើលវត្តកែវសិក្ខាគិរីស្វារៈ ដែលទទួលរងនូវការខូចខាតយ៉ាងធ្ងន់ធ្ងរផងដែរ ។
មុននេះ១ថ្ងៃ អ្នកនាំពាក្យក្រសួងការពារជាតិ លោកឧត្តមសេនីយ៍ឯក ឈុំ សុជាតិ ប្រាប់ឱ្យដឹងថា គណៈប្រតិភូអនុព័ន្ធយោធាបរទេសមានចំនួន១៧រូប មកពីស្ថានទូតចំនួន១៣ ប្រចាំកម្ពុជា នឹងចេញដំណើរតាមក្បួនរថយន្តដែលរៀបចំដោយក្រសួងការពារជាតិ ។ ក្នុងចំណោមគណៈប្រតិភូអនុព័ន្ធយោធាទាំងនោះ មានវត្តមានមន្ត្រីយោធានៃប្រទេសមហាអំណាចធំៗ ដូចជា បារាំង ចិន អាមេរិក រុស្ស៊ី អង់គ្លេស កាណាដា ជប៉ុន សិង្ហបុរីជាដើម ។ ការដឹកនាំអនុព័ន្ធយោធាបរទេសទៅពិនិត្យមើលសមរភូមិជួរមុខនៅតំបន់ព្រំដែនប្រាសាទព្រះវិហារ ត្រូវបានរៀបចំឡើងដូចគ្នានឹងប្រទេសថៃដែរ ។
លោកឧត្តមសេនីយ៍ឯក ឈុំ សុជាតិ បានពន្យល់អំពីគោលបំណងដែលក្រសួងការពារជាតិកម្ពុជារៀបចំដំណើរទស្សនកិច្ចសម្រាប់យោធាបរទេសប្រចាំកម្ពុជានេះថា គឺដើម្បីបង្ហាញពីការខូចខាតខ្ទេចខ្ទាំនៃតំបន់បេតិកភណ្ឌពិភពលោក ដោយសារគ្រាប់ផ្លោងរបស់កងទ័ពថៃកន្លងមក។ លោកឈុំ សុជាតិ បន្តថា កម្ពុជាចង់បង្ហាញការពិតដល់អន្តរជាតិតែប៉ុណ្ណោះ ។ ចាប់តាំងពីមានការចរចាគ្នាថ្នាក់ខ្ពស់ក្នុងក្របខណ្ឌយោធាកាលពីថ្ងៃទី១៩ កុម្ភៈ ដើម្បីកុំឱ្យមានការផ្ទុះអាវុធ ស្ថានភាពនៅតាមព្រំដែនមានសភាពស្ងប់ស្ងាត់ ។ ទោះបីយ៉ាងណាក្តី មន្ត្រីយោធានានាបញ្ជាក់ថា កម្ពុជាប្រុងប្រយ័ត្នជានិច្ច ។ នៅឯសមរភូមិជួរមុខ សប្បុរសជន សមាជិករដ្ឋាភិបាល មន្ត្រីរាជការនៅបន្តដឹកជញ្ជូនអំណោយនិងស្បៀងអាហារជារៀងរាល់ថ្ងៃទៅផ្តល់ជូនយោធាជួរមុខ។
ក្រុមអ្នកតាមដានស្ថានការណ៍នយោបាយ កម្ពុជា-ថៃ គេបានដឹងច្បាស់ពីក្រយៅបោកប្រាស់របស់នាយករដ្ឋមន្ត្រីថៃ អាប់ភីស៊ីត តាមរយៈការស្រេកឃ្លានចង់តែធ្វើសង្គ្រាម ក្នុងកាលៈទេសៈ ដែលពិភពលោកអង្វរករឱ្យបញ្ឈប់ជាបន្ទាន់នូវយុទ្ធវិធីដ៏៏លាមកនេះ ។ ជាលទ្ធផលក៏បានបង្ហាញចេញមកមែន គឺរដ្ឋាភិបាលអាប់ភីស៊ីត ត្រូវអស់លក្ខណ៍ ដោយផែនការប៉ុនប៉ងបិទទ្វារ វាយកម្ពុជាត្រូវបរាជ័យ ដោយសារភាពឈ្លាសវៃរបស់ថ្នាក់ដឹកនាំកម្ពុជាបានរាយការណ៍ទាន់ពេលវេលាទៅក្រុមប្រឹក្សាសន្តិសុខអង្គការសហប្រជាជាតិ និងសហគមន៍អន្តរជាតិនានា ហើយទ្វារត្រូវបានបើកចំហនៅលើទីលានអន្តរជាតិ គឺ អ.ស.ប ក៏ដូចជាអាស៊ាន និងអង្គការយូេណស្កូ គ្រប់គ្នាបានងាកមកគាំទ្រនូវជំហររបស់កម្ពុជា ដោយឥតលក្ខខណ្ឌ ។
ការភ័យខ្លាចយន្តការអន្តរជាតិដោយភាគីថៃ ត្រូវបានលោកអាប់ភីស៊ីត បន្តបង្វិលសភាពការណ៍ក្រោមលេសផ្សេងៗ ក្នុងបំណងរារាំងមិនចង់ឱ្យមានវត្តមានអ្នកសង្កេតការណ៍របស់ឥណ្ឌូណេស៊ី ទៅពិនិត្យតំបន់ប្រាសាទព្រះវិហារ ដែលថៃបានបាញ់បំផ្លាញនោះទេ ។ ប៉ុន្តែសញ្ញាល្អ និងជាជោគជ័យថ្មីបន្ថែមទៀតរបស់កម្ពុជា គឺវត្តមាននៃក្រុមអនុព័ន្ធយោធា១៧រូប តំណាងឱ្យ១៣ប្រទេស នៅថ្ងៃទី៣ មីនា ឆ្នាំ២០១១ គេបានទៅពិនិត្យឃើញដោយផ្ទាល់ភ្នែក នូវការបែកបាក់នៃប្រាសាទព្រះវិហារ ដោយកាំភ្លើងថៃ ដោយក្នុងនោះមានទាំងវត្ថុតាងមួយចំនួនត្រូវបង្ហាញដោយភាគីកម្ពុជា ប្រាប់ដល់អនុព័ន្ធយោធាទាំងនោះ ដើម្បីជារបាយការណ៍ពិតនៅក្នុងការពិចារណារកហេតុផលថា សង្គ្រាមនេះអ្នកណាជាអ្នកឈ្លានពាន និងបង្កឡើង ។
សម្រាប់ប្រជាជនកម្ពុជា គឺមានមោទនភាពដ៏ក្រៃលែង និងស្វាគមន៍វត្តមានរបស់អនុព័ន្ធយោធាទាំង១៧រូប ដែលកំពុងមានវត្តមាននៅ លើទឹកដីកម្ពុជាដើម្បីស្វែងរកការពិត ដែលជាការឆ្លុះបញ្ចាំងពីការយកចិត្តទុកដាក់ខ្ពស់ របស់បណ្តាប្រទេសដែលស្រឡាញ់សន្តិភាព និងលើកស្ទួយតម្លៃនៃវប្បធម៌ និងព្រះពុទ្ធសាសនាដែលខុសពីរដ្ឋាភិបាលអាប់ភីស៊ីត មានតែការបំផ្លាញសាសនា និងវប្បធម៌ដែលគួរត្រូវបានថ្កោលទោស ។
ម្យ៉ាងទៀត បើនិយាយអំពីពុតត្បុតអាក្រក់របស់ថៃ គឺគេអាចនិយាយស្តីបន្ទោសដល់រដ្ឋាភិបាលមួយនេះបានច្រើនរូបភាពណាស់ ប៉ុន្តែយើងសូមទាញយកតែការលើកឡើងចុងក្រោយនៃមន្ត្រីថៃ ដែលជាមេបញ្ជាការកងទ័ពជើងគោកមួយរូប គឺលោកប្រាយុទ្ធ ចាន់អ៊ូចា ដែលបានថ្លែងថា «ប្រទេសថៃនឹងមិនអនុញ្ញាតឱ្យអ្នកសង្កេតការណ៍ចូលទៅកាន់តំបន់ព្រំដែនដែលមានជម្លោះនៅជិតប្រាសាទព្រះវិហារនោះឡើយ ហើយគួរតែអនុញ្ញាតឱ្យពួកអ្នកសង្កេតការណ៍ទៅត្រួតពិនិត្យតែខាងក្រៅតំបន់ជម្លោះតែប៉ុណ្ណោះ»។ នេះគឺជាការបញ្ជាក់យ៉ាងច្បាស់ថា រដ្ឋាភិបាលថៃមានតែលាក់លៀម ខ្លាចការពិត និងបន្តអូសបន្លាយពេលវេលាជានិច្ច ដើម្បីទុកជាប្រយោជន៍សម្រាប់ការបោកប្រាស់មហាជន ដែលទង្វើបែបនេះ មិនមែនជាបំណងនៃការចង់បានរបស់ប្រជាជាតិទាំងពីរកម្ពុជា-ថៃ និងសហគមន៍អន្តរជាតិនោះឡើយ ។ ផ្ទុយទៅវិញ សម្រាប់កម្ពុជា គឺមានសេចក្តីក្លាហានដោយហ៊ានបើកទ្វារជជែកពិភាក្សាគ្នានៅលើទីភ្លឺ បើកទ្វារចំហ ដោយផ្អែកទៅលើតែភាពស្របច្បាប់ដែលកម្ពុជាមានតែប៉ុណ្ណោះ ហើយកម្ពុជា នឹងបន្តតស៊ូគ្រប់ដំណាក់កាលក្នុងយន្តការត្រីភាគី ដើម្បីការពារជានិច្ចនូវអធិបតេយ្យភាព បូរណភាពទឹកដី និងវប្បធម៌ និងប្រឆាំងដាច់ខាតនូវបរទេសឈ្លានពាន ។
ប្រតិភូអនុព័ន្ធយោធា១៧រូប បានវិលត្រឡប់មករាជធានីភ្នំពេញវិញក្នុងថ្ងៃដដែលនោះប្រកបដោយសុវត្ថិភាព ៕
ចែករំលែកព័តមាននេះ