រាជធានីភ្នំពេញ ៖ ខណៈពេលចេញបញ្ជាផ្ទាល់មាត់ភ្លាមៗជូនរដ្ឋមន្ត្រីក្រសួងដែនដី នគររូបនីយកម្ម និងសំណង់ឲ្យដោះសារបញ្ហាដីធ្លីកំពុងមានទំនាស់នៅកោះរ៉ុង សម្តេចនាយករដ្ឋមន្ត្រីហ៊ុន សែន បានបញ្ជាក់នៅព្រឹកថ្ងៃទី២៣ ខែមេសានេះថា សម្តេចមិនមែនជានាយករដ្ឋមន្ត្រីលោភលន់ទេ ហើយសម្តេចក៏គ្មានដីនៅលើកោះរ៉ុង និងក្រុងភ្នំពេញដែរ ហើយសម្តេចក៏បានប្រមានដល់អ្នកមានអំណាច និងមានលុយដែលនៅពីក្រោយទំនាស់ដីនៅកោះរ៉ុងឲ្យដកខ្លូនចេញផងដែរ ។
សម្តេចនាយរដ្ឋមន្ត្រីមានប្រសាសន៍នាឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឲ្យប្រើប្រាស់នូវសណ្ឋាគារលំដាប់ផ្កាយ ៥ « The Royal Sands Koh Rong » ដែលមានទីតាំងស្ថិតនៅភូមិសុខសាន្ដ សង្កាត់កោះរ៉ុង ក្រុងព្រះសីហនុថា សម្តេចបានចេញអនុក្រឹត្យកន្លងមកឲ្យមានការដោះស្រាយបញ្ហាដីធ្លីនៅកោះរ៉ុងដែលកន្លងមក គឺមាន១២២១ ក្បាលដី ដែលរាជរដ្ឋាភិបាលបានរៀបចំ ហើយក្នុងនោះបានប្រគល់សម្រាប់៦៣៧ ក្បាលដី ដែលមានទំហំ៥២៥,៣៧ ហិកតា ពាក់ព័ន្ធជាមួយនឹងប្រជាជន២០៤ គ្រួសារ ដែលរស់នៅអចិន្ត្រៃយ៍នៅលើកោះនេះ ត្រូវបានផ្តល់រួចមកហើយ ។ ប៉ុន្តែនៅសល់ចំនួន ៥៨៤ ក្បាលដីទៀត ពុំទាន់បានចេញប័ណ្ណកម្មសិទ្ធជូនបាន ដោយសារក្បាលដីខ្លះនៅមានវិវាទ ក្បាលដីខ្លះកំពុងបន្តពិនិត្យអត្តសញ្ញាណ ។
សម្តេចតេជោ បានបញ្ជាឯកឧត្តម ជា សុផារ៉ា រដ្ឋមន្ត្រីក្រសួងដែនដី នគររូបនីយកម្ម និងសំណង់ឲ្យពិនិត្យមើល និងកំណត់អត្តសញ្ញាណអ្នកដែលអះអាងកាន់កាប់ដីនៅកោះរ៉ុង ព្រោះសម្តេចបញ្ជារកឲ្យឃើញថា មុនឆ្នាំ២០០៨ មានប្រជាជនប៉ុន្មានគ្រួសាររស់នៅ និងកាន់កាប់ពិតប្រាកដលើដីកោះរ៉ុង ហើយតើអ្នកកាន់កាប់ដីធ្លីលើកោះនេះមានប៉ុន្មានពិតប្រាកដ ។
សម្តេចតេជោ ហ៊ុន សែនបញ្ជាក់ថា ៖ «ការពិត រឿងនេះ គឺជារឿងនៃការទន្ទ្រានកាន់កាប់ ដោយប្រជាពលរដ្ឋ ។ ហើយអ្នកខ្លះមកពីចំងាយឯណោះទេ យកនាមប្រជាជននៅលើកោះ តែខ្លួននៅរាជធានីភ្នំពេញ និងតំបន់ផ្សេងៗ ហើយបោះទុន នោះហើយជាបញ្ហា ។ ខ្ញុំមិនជឿថាប្រជាពលរដ្ឋនៅកោះរ៉ុងនេះ គឺមានដីធ្លីច្រើនដល់កម្រិតប៉ុណ្ណឹងទេ […] អញ្ចឹងទេបញ្ហានេះត្រូវតែបញ្ឈប់ បញ្ឈប់ការទន្ទ្រានកាន់កាប់ កាប់យកដី បំផ្លាញឆ្នេរ នេះជាស្ថានភាពដែលបានកើតឡើងមិនត្រឹមតែនៅកោះរ៉ុងទេ តែនៅបណ្តាកោះផ្សេងទៀត ក៏បានកើត តែកោះរ៉ុងនេះ កើតច្រើនជាងគេ ។ ព្រោះបញ្ហាដីនៅកោះរ៉ុង មិនមែនកើតតែជាមួយនឹងក្រុមហ៊ុនលោក គិត ម៉េងទេ តែជាមួយកងទ័ពក៏ទើបមានបញ្ហាថ្មីៗថែមទៀត ។
សម្តេចបានបញ្ជាក់ថា «បើតាមខ្ញុំទទួលបានព័ត៌មាន មូលដ្ឋានកងទ័ពជើងទឹក ក៏ត្រូវប្រជាពលរដ្ឋទៅអះអាងថា ជាកម្មសិទ្ធរបស់គាត់» ។ «ប៉ុន្តែឥឡូវគួរតែត្រូវឲ្យឯកឧត្តម ជា សុផារ៉ា ដោះស្រាយមួយកោះនេះតែម្តង មិនមែនដោះស្រាយត្រឹមមួយកន្លែងនេះទេ […] ពិនិត្យមើលអ្នកណាមកមុន អត្តសញ្ញាណរបស់មនុស្សនិងពិតប្រាកដនៅឯណាពិតប្រាកដ មកពីកន្លែងណា ។ បើមិនអញ្ចឹងទេ យើងអង្គុយបក់ផ្សែង ។ យើងត្រូវពន្លត់ភ្លើង តែមិនត្រូវអង្គុយបក់ផ្សែងនោះទេ» ។ សម្តេចមានប្រសាសន៍ថា ៖ «ខ្ញុំមកកោះរ៉ុងថ្ងៃនេះ ក្រៅពីមកសម្ពោធ ខ្ញុំចង់មកពន្លត់ភ្លើងនៅលើកោះរ៉ុង ។ បើមិនដូច្នោះទេ កោះរ៉ុងនៅតែមានភ្លើងឆាបឆេះ ។ ហើយខ្ញុំក៏ចង់មើលមុខមន្ត្រីដែលមានអំណាច មួយចំនួននៅពីក្រោយខ្នង ហើយក៏ខ្ញុំចង់ឃើញអ្នកដែលមានប្រាក់កាសមួយចំនួនដែលនៅពីក្រោយខ្នងដែរ បានជាខ្ញុំមកកាន់ទីនេះ » ។ ហើយនិយាយគ្នាឲ្យច្បាស់ៗ ។ ល្មមគ្រប់គ្រាន់ហើយអស់លោក ទ្រព្យសម្បត្តិរបស់ជាតិ គឺត្រូវបានយកកន្លែងនេះម្នាក់ៗមានដីរាប់រយ រាប់ពាន់ហិកតាច្រើនណាស់ហើយ ច្រើនជាងនាយករដ្ឋមន្ត្រី ដែលនាយករដ្ឋមន្ត្រីឥតមានដីនៅភ្នំពេញ … ឥតមានដីធ្វើផ្ទះផង» ។
សម្តេចបញ្ជាក់ថា ៖ «ប៉ុន្តែធ្វើជានាយករដ្ឋមន្ត្រី ខ្ញុំមិនលោភលន់ ។ ដោយសារខ្ញុំមិនលោភលន់នឹងហើយ បានជាខ្ញុំនៅមានសម្តី នៅមានទឹកមាត់ប្រៃ ដើម្បីនឹងចង្អុលអ្នកដែលទន្ទ្រានកាន់កាប់ដីរបស់គេ» ។ សម្តេចបន្ថែមថា ដីណាដែលពាក់ព័ន្ធនឹងការសាង់សង់រួចហើយ យើងអាចសម្របសម្រួលរកដីផ្សេង ។ ចំណែកដីណាពាក់ព័ន្ធនឹងទីតាំងយោធាត្រូវរក្សាទីតាំងយោធា ដើម្បីការពារនូវទីតាំងយោធានោះ ប៉ុន្តែក្នុងករណីប្រជាពលរដ្ឋកាន់កាប់មុនពេលយើងកំណត់ឲ្យទីតាំងយោធា យើងក៏ត្រូវរកដីធ្លីទីតាំងផ្សេងឲ្យសមរម្យ ។ ប្រមុខដឹកនាំរាជរដ្ឋាភិបាលក៏បានបញ្ជាក់ជាថ្មីថា «បើនិយាយរឿងដីធ្លី កោះរ៉ុងជាកោះក្តៅជាងគេ» ហើយសម្តេចក៏បានប្រមានដល់មន្ត្រីអសកម្មផងដែរ ។
សម្តេចបញ្ជាក់ថា ៖ «បើអស់លោកបោះដំឡូងក្តៅឲ្យខ្ញុំកាន់ ខ្ញុំសុខចិត្តកាន់មួយសន្ទុះ រួចហើយខ្ញុំអាចស៊ីបាន ។ ប៉ុន្តែអស់លោក ដំឡូងក្តៅអស់លោកមិនដែលបោះឲ្យខ្ញុំកាន់ទេ អស់លោកតែងតែបោះដុំថ្មក្តៅ ឲ្យខ្ញុំកាន់ជានិច្ច ។ ខ្ញុំមិនល្ងង់តទៅទៀតទេ ។ ច្បាប់បានកំណត់ឲ្យអស់លោកបានធ្វើអី អស់លោកត្រូវធ្វើអានុង» ។ ខ្ញុំបានបញ្ជាក់ហើយ មិនត្រូវធ្វើតាមបទបញ្ជាទេ ។ ត្រូវអនុវត្តតាមច្បាប់ មិនត្រូវអនុវត្តតាមបទបញ្ជាទេ ព្រោះបើមិនអញ្ចឹងស្អីឡើងក៏នាយករដ្ឋមន្ត្រីបញ្ជា ស្អីឡើងក៏នាយករដ្ឋមន្ត្រីបញ្ជា តើអស់លោកធ្វើរដ្ឋមន្ត្រីធ្វើអី អស់លោកធ្វើចៅហ្វាយខេត្តធ្វើអី ?» ៕
ចែករំលែកព័តមាននេះ