ខេត្តបាត់ដំបង ៖ សេចក្ដីរាយការណ៍បានឱ្យដឹងថា ជនមិនស្គាល់មុខបានធ្វើសកម្មភាពកាច់សោ.កលួចយកម៉ូតូ១គ្រឿង កាលពីវេលាម៉ោង០៧ និង៤០នាទីព្រឹកថ្ងៃទី២៣ មេសា នេះ ស្ថិតនៅចំណុចខាងមុខវត្តបាយដំរាំ ក្នុងភូមិបាយដំរាំ ឃុំបាយដំរាំ ស្រុកបាណន់ រួចជិះគេចខ្លួនដោយសុវត្ថិភាព ។
សេចក្ដីរាយការណ៍បន្តថា គេមិនទាន់ដឹងថា ជនមិនស្គាល់មុខនោះមានប៉ុន្មាននាក់ទេ ដែលបានកាច់សោ.កលួចយកម៉ូតូ១គ្រឿងម៉ាកហុងដាC125 ស៊េរីឆ្នាំ២០១៧ ពណ៌ខ្មៅ ពាក់ផ្លាកលេខបាត់ដំបង 1AC-8220 របស់ជនរងគ្រោះឈ្មោះលួម ណារ៉ុង ភេទប្រុស អាយុ៣១ឆ្នាំ រស់នៅភូមិបត់សាលា ឃុំឈើទាល ស្រុកបាណន់។
បើតាមព័ត៌មាន គឺជនដៃដល់បានធ្វើសកម្មភាពលួចយកម៉ូតូនោះនៅពេលម្ចាស់ជិះទៅឈប់នៅក្បែរវត្តរួចដើររកទិញទំនិញក្នុងផ្សារ។ ព្រោះនៅខាងមុខវត្តបាយដំរាំ មានអ្នកលក់ដូរពេលព្រឹក។ លុះត្រឡប់មកយកម៉ូតូវិញមិនឃើញក៏មានការភ្ញាក់ផ្អើលពេញផ្សារតែម្ដង។
ករណីចោរកាច់សោរ.កលួចយកម៉ូតូនៅតាមបណ្ដាស្រុកនានា និងនៅក្នុងក្រុងបាត់ដំបង ហាក់មានការស្ងប់ស្ងាត់បន្តិច ក្នុងរយៈពេលប្រហែល២សប្ដាហ៍កន្លងទៅនេះ ក្រោយពីសមត្ថកិច្ចបង្ក្រាបបានក្រុមជនដៃដល់បានមួយចំនួន កាលពីជាងកន្លះខែមុននេះ ។ នេះបើតាមការកត់សម្គាល់ជាក់ស្ដែង តែពេលនេះចាប់ផ្ដើមកម្រើកទៀតហើយនៅស្រុកបាណន់ ដែលបានបង្ហាញថា ក្រុមជនសង្គមងងឹតនៅតែធ្វើសកម្មភាព បើទោះជាបង្ក្រាបបានមួយចំនួនក្ដី ។
ពេលនេះ សមត្ថកិច្ចកំពុងធ្វើការស្រាវជ្រាវរកមុខសញ្ញាជនដៃដល់នោះហើយ ប៉ុន្តែប្រជាពលរដ្ឋគួរតែមានការប្រុងប្រយ័ត្នផង ចំពោះការទុកដាក់យានយន្តរបស់ខ្លួន៕
ចែករំលែកព័តមាននេះ