រាជធានីភ្នំពេញ ៖ បន្ទាប់ពីរាជរដ្ឋាភិបាលកម្ពុជាបានធ្វើកំណែទម្រង់លើការគ្រប់គ្រងហិរញ្ញវត្ថុសាធារណៈក្នុងរយៈពេល៥ឆ្នាំចុងក្រោយនេះ ឃើញថា កម្ពុជាទទួលបានលទ្ធផលជាវិជ្ជមាន ពិសេសបានរុញច្រាននាវាកម្ពុជាឆ្ពោះទៅប្រទេសមានចំណូលមធ្យមកម្រិតទាប និងត្រូវបានចាត់ទុកថាជា«ខ្លាសេដ្ឋកិច្ចថ្មី»នៅអាស៊ី កាលពីឆ្នាំ២០១៦ និងកំពុងធ្វើដំណើរទៅកាន់ឋានៈជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍន៍នៅឆ្នាំ២០៥០ ។
បើតាមលោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា លទ្ធផលវិជ្ជមាននៃការកែទម្រង់លើការគ្រប់គ្រងហិរញ្ញវត្ថុសាធារណៈចំពោះការអភិវឌ្ឍសេដ្ឋកិច្ច សង្គម បានលេចឡើងជាបណ្តើរៗ និងកាន់តែច្បាស់ថែមទៀតនៅក្នុងរយៈពេល៥ឆ្នាំចុងក្រោយនេះ ហើយនៅពេលអនាគត កម្ពុជាត្រូវការប្រព័ន្ធគ្រប់គ្រងហិរញ្ញវត្ថុសាធារណៈដែលមានភាពទន់ភ្លន់ កាន់តែមានប្រសិទ្ធភាព និងស័ក្តិសិទ្ធភាពថែមទៀត ដើម្បីជំរុញដល់ដំណើរការនៃការអភិវឌ្ឍឲ្យមានចីរភាព និងបរិយាប័ន្ន ។
លោកបន្តថា កម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ សម្រេចបាននូវវឌ្ឍនភាពល្អប្រសើរនៅក្នុងការកសាងខឿនទាំងបីនៃប្រព័ន្ធគ្រប់គ្រង គឺភាពទុកចិត្តបាននៃថវិកា, គណនេយ្យភាពហិរញ្ញវត្ថុ និងការផ្សារភ្ជាប់ថវិកាទៅនឹងកម្មវិធី ទោះបីជាមានការងារសេសសល់ និងបញ្ហាប្រឈមមួយចំនួនដែលត្រូវបន្តដោះស្រាយថែមទៀតក្តី ។
លោកថា ៖« ការកែទម្រង់, ការគ្រប់គ្រងហិរញ្ញវត្ថុសាធារណៈ បានដាក់ចេញនូវទិសដៅអភិក្រម និងយន្តការអនុវត្តបានត្រឹមត្រូវ និងកាន់តែប្រសើរ ប៉ុន្តែទាមទារឲ្យមានភាពជាម្ចាស់កាន់តែខ្លាំងឡើង ទាំងសម្រាប់ក្រសួង ស្ថាប័ន និងសម្រាប់អង្គភាពក្រោមឱវាទក្រសួងសេដ្ឋកិច្ច និងហិរញ្ញវត្ថុ » ។
រយៈពេល៥ឆ្នាំចុងក្រោយនេះ រាជរដ្ឋាភិបាលសម្រេចបានតាមការគ្រោងទុកនូវកំណើនសេដ្ឋកិច្ចប្រចាំឆ្នាំក្នុងរង្វង់៧% ប្រកបដោយបរិយាប័ន្ន និងសមធម៌ ។ កម្ពុជាថែមទាំងសម្រេចបាននូវបង្គោលចរជាប្រវត្តិសាស្ត្រ គឺការឆ្លងផុតពីឋានៈប្រទេសមានចំណូលទាប ទៅជាប្រទេសមានចំណូលមធ្យមកម្រិតទាប ជាផ្លូវការក្នុងឆ្នាំ២០១៥ ព្រមទាំងត្រូវបានចាត់ទុកថាជា «ខ្លាសេដ្ឋកិច្ចថ្មីនៅអាស៊ី» ក្នុងឆ្នាំ២០១៦។ កំណើនដ៏គួរឲ្យស្ញប់ស្ញែងនេះ បានបង្កើតការងារជាច្រើនដល់ប្រជាពលរដ្ឋទូទាំងប្រទេស ដែលឆ្លុះបញ្ចាំងតាមរយៈតួលេខរបស់ធនាគារពិភពលោក ដែលបានបង្ហាញថា ភាពគ្មានការងារធ្វើនៅប្រទេសកម្ពុជាស្ថិតក្នុងអត្រា០,៣% និងភាពក្រីក្រតោកយ៉ាកត្រូវបានលុបបំបាត់ចោលទាំងស្រុងក្នុងឆ្នាំ២០១៧ ។ ទន្ទឹមនឹងនេះ ប្រាក់ចំណូលរបស់ប្រជាពលរដ្ឋ ក៏មានការកើនឡើងផងដែរ ដោយ ផសស ក្នុងមនុស្សម្នាក់កើនពី១.០៤២ដុល្លារអាមេរិកក្នុងឆ្នាំ២០១៣ ដល់ប្រមាណ១.៤២៧ដុល្លារអាមេរិកក្នុងឆ្នាំ២០១៧ និង១.៥៦៣ដុល្លារអាមេរិកនៅក្នុងឆ្នាំ២០១៨ ។
សម្ដេចតេជោ ហ៊ុន សែន នាយករដ្ឋមន្ត្រីបានមានប្រសាសន៍កន្លងមកថា ក្នុងពេលខាងមុខ កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ នឹងឈានដល់ជំហាន និងដំណាក់កាលចុងក្រោយ គឺគណនេយ្យភាពសមិទ្ធកម្ម ដែលតម្រូវឱ្យមានការចូលរួមរបស់ក្រសួង-ស្ថាប័នពាក់ព័ន្ធទាំងអស់ក្នុងការអនុវត្តផែនការសកម្មភាពរៀងៗខ្លួន ដោយបុរេសកម្ម និងគណនេយ្យភាព ។
សម្ដេចតេជោសង្កត់ធ្ងន់ថា ៖« ក្នុងការបន្តអនុវត្តកម្មវិធីនេះ សូមឱ្យគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ បន្តប្រកាន់ខ្ជាប់នូវស្មារតីនៃភាពប្រាកដនិយម និងភាពជាម្ចាស់ខ្ពស់ ព្រមទាំងអភិក្រមទន់ភ្លន់ តែម៉ឺងម៉ាត់នៅក្នុងការអនុវត្ត ស្របតាមគោលការណ៍ «ឆ្លុះកញ្ចក់, ងូតទឹក, ដុសក្អែល, ព្យាបាល និងវះកាត់» ដោយផ្តោតការយកចិត្តទុកដាក់លើចំណុចសំខាន់ៗមួយចំនួនដូចជា ការបង្កើនភាពជាម្ចាស់ក្នុងការកែទម្រង់ការគ្រប់គ្រងហិរញ្ញវត្ថុសាធារណៈតាមក្រសួង-ស្ថាប័ន, ផ្តល់ការលើកទឹកចិត្តដល់ក្រុមការងារកែទម្រង់នៅតាមក្រសួង-ស្ថាប័ន, បន្តពង្រឹងយន្តការសម្របសម្រួល និងភាពប្រទាក់ក្រឡាគ្នារវាងការកែទម្រង់ទាំង៣ និងយកចិត្តទុកដាក់ខ្ពស់ដល់ការអនុវត្តយុទ្ធសាស្ត្រនៃការកែទម្រង់ប្រព័ន្ធថវិកា ឆ្នាំ២០១៨-២០២៥ » ។
សម្ដេចតេជោបញ្ជាក់ថា ក្នុងឤណត្តិនេះ កម្ពុជាសម្រេចបាននូវបង្គោលចរដ៏សំខាន់មួយក្នុងការអភិវឌ្ឍ គឺការប្រែក្លាយខ្លួនពីប្រទេសមានចំណូលទាបទៅជាប្រទេសមានចំណូលមធ្យមកម្រិតទាប ហើយកំពុងធ្វើដំណើរឆ្ពាះទៅសម្រេចការចាកចេញពីឋានៈប្រទេសអភិវឌ្ឍន៍តិចតួចនៅក្នុងពេលខាងមុខ ។ អ្វីដែលពិសេស សក្តានុពលសេដ្ឋកិច្ចកម្ពុជា ត្រូវបានទទួលស្គាល់ និងចាត់ទុកថា ជាខ្លាសេដ្ឋកិច្ចថ្មីមួយក្នុងតំបន់ឤស៊ី ។ ម្យ៉ាងវិញទៀត ការគ្រប់គ្រងហិរញ្ញវត្ថុសាធារណៈ គឺជាយន្តការ និងជាឧបករណ៍មិនឤចខ្វះបាន, មិនត្រឹមតែក្នុងការសម្រេចបានគោលដៅខាងលើបុណ្ណោះទេ ប៉ុន្តែសម្រាប់ការខិតខំដើម្បីសម្រេចបាននូវចក្ខុវិស័យនៃការប្រែក្លាយកម្ពុជា ទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ផងដែរ ។
យោងតាមក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់ការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ បង្ហាញថា សម្រាប់រយៈពេល៥ឆ្នាំខាងមុខ កម្ពុជានឹងបោះជំហានទៅដំណាក់កាលថ្មីមួយទៀត ដែលវិស័យឧស្សាហកម្ម និងបច្ចេកវិទ្យាកាន់តែដើរតួនាទីសំខាន់ក្នុងយុទ្ធសាស្ត្រកំណើនថ្មីរបស់ជាតិ ក្នុងបរិការណ៍ដែលភាពប្រកួតប្រជែងក្នុងតំបន់ និងពិភពលោក កាន់តែស្រួចស្រាល់។
ដើម្បីបន្តសម្រេចបានកំណើនរឹងមាំក្នុងរង្វង់៧% ប្រកបដោយចីរភាព, បរិយាប័ន្ន និងធន់នឹងវិបត្តិ កម្ពុជាចាំបាច់ត្រូវបន្តអនុវត្តគោលនយោបាយ និងវិធានការគន្លឹះមុតស្រួចមួយចំនួនប្រកបដោយឆន្ទៈនយោបាយខ្ពស់ សំដៅដោះស្រាយបញ្ហាប្រឈម និងបញ្ចៀសនូវហានិភ័យទាំងឡាយជាយថាហេតុ និងបន្តកែទម្រង់តាមកម្មវិធីនយោបាយ និងយុទ្ធសាស្ត្រ ក្រោមគោលការណ៍ «បន្តរក្សាសមិទ្ធផលចាស់ បង្កើតសមិទ្ធផលថ្មី» ៕
ចែករំលែកព័តមាននេះ