ទីក្រុងវ៉ាស៊ីនតោន ៖ ភាពតានតឹងផ្នែកពាណិជ្ជកម្មរវាងសហរដ្ឋអាមេរិក និងប្រទេសចិន កំពុងតែគ្របដណ្តប់កិច្ចប្រជុំក្រុមមន្ត្រីមូលនិធិរូបិយវត្ថុអន្តរជាតិ (IMF) ខណៈ G20 ចៀសវាងប្រធានបទនេះ កាលពីថ្ងៃសុក្រកន្លងមក ។
មន្ត្រីជាច្រើនបានស្នើឲ្យអាមេរិក និងចិន ដោះស្រាយជម្លោះទាំងនេះតាមរយៈការសន្ទនា មិនមែនតាមការដាក់ពន្ធជាឯកតោភាគីឡើយ និងព្រមានពីការគំរាមកំហែងដល់ការលូតលាស់សេដ្ឋកិច្ចទៀតផង ។
ប៉ុន្តែមន្ត្រីហិរញ្ញវត្ថុជាន់ខ្ពស់របស់លោកប្រធានាធិបតីអាមេរិក ដូណាល់ ត្រាំ បាននិយាយថា ប្រទេសដែលមានគោលការណ៍ពាណិជ្ជកម្មមិនយុត្តិធម៌ គឺជាប្រទេសដែលខុស ។
លោកស្រី Christine Lagarde ប្រធានមូលនិធិរូបិយវត្ថុអន្តរជាតិ បានស្នើឲ្យមូលនិធិនេះក្លាយជាវេទិកាដោះស្រាយការខ្វែងគំនិតគ្នា ប៉ុន្តែលោក Steven Mnuchin រដ្ឋមន្ត្រីពាណិជ្ជកម្មសហរដ្ឋអាមេរិក និយាយថា ៖«IMF គួរតែជាសំឡេងដ៏រឹងមាំមួយសម្រាប់ជំរុញដល់សមាជិកឲ្យដកឧបសគ្គពាណិជ្ជកម្ម, ឧបសគ្គមិនមែនពន្ធ និងការពារសិទ្ធិកម្មសិទ្ធិបញ្ញាផងដែរ » ។
ការល្មើសនឹងកម្មសិទ្ធិបញ្ញា និងបច្ចេកវិទ្យាអាមេរិក គឺជាកត្តាដ៏សំខាន់មួយក្នុងជម្លោះជាមួយប្រទេសចិន ដែលជំរុញឲ្យលោកត្រាំ ប្រកាសពីការដាក់ពន្ធយ៉ាងខ្ពស់លើផលិតផលចិនរាប់ប៊ីលានដុល្លារ បន្ទាប់ពីដាក់ពន្ធលើដែកថែប ។
សហរដ្ឋអាមេរិក និងចិន បានដាក់ពាក្យបណ្តឹងរៀងៗខ្លួនទៅកាន់អង្គការពាណិជ្ជកម្មពិភពលោក (WTO) ថែមទៀត ។
កាលពីថ្ងៃសុក្រ នាយក WTO លោក Roberto Azevedo បានព្រមានថា លទ្ធផលនៃការបន្តជម្លោះនេះ អាចនឹងមានសភាពធ្ងន់ធ្ងរ ហើយប្រទេសក្រីក្រនឹងទទួលរងផលប៉ះពាល់ផងដែរ ។ លោកថា ៖« ការបាក់បែកនៃទំនាក់ទំនងរវាងតួអង្គសំខាន់ៗ អាចនឹងប៉ះពាល់ដល់ភាពល្អប្រសើរដែលពួកយើងបានមើលឃើញនាប៉ុន្មានឆ្នាំថ្មីៗនេះ ក៏ដូចជាគំរាមកំហែងដល់ការលូតលាស់សេដ្ឋកិច្ច និងផ្តល់ហានិភ័យដល់ការងារជាច្រើនទៀត»។
IMF លើកឡើងថា ភាពតានតឹងនេះ គឺជាហានិភ័យដ៏ធំសម្រាប់ការលូតលាស់សេដ្ឋកិច្ចពិភពលោក ។
លោកស្រី Lagarde និយាយថា ជម្លោះនេះប៉ះពាល់ដល់ជំនឿចិត្ត, បង្កើតភាពមិនប្រាកដប្រជា និងកាត់បន្ថយការវិនិយោគ ដែលជាកត្តាដ៏សំខាន់នៃការរីកចម្រើនឡើងវិញជុំវិញពិភពលោក ។
WTO ព្យាករថា ការធ្វើពាណិជ្ជកម្មផលិតផលជុំវិញពិភពលោក នឹងលូតលាស់បាន៤,៤%ក្នុងឆ្នាំនេះ បន្ទាប់ពីលូតលាស់បាន៤,៧%កាលពីឆ្នាំ២០១៧ ៕
ចែករំលែកព័តមាននេះ