រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាទៅក្រុមប្រឹក្សាអភិវឌ្ឍន៍កម្ពុជា នៅថ្ងៃទី២៣ ខែមេសា ឆ្នាំ២០១៨នេះ ឲ្យដកហូតមកវិញនូវបណ្តាកោះ នៅកម្ពុជាដែលប្រគល់ជូនក្រុមហ៊ុនឯកជនកន្លងមក តែគ្មានសកម្មភាពអភិវឌ្ឍន៍សោះនោះ ។
សម្តេចតេជោបានដាក់បញ្ជាបែបនេះនាឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឲ្យប្រើប្រាស់នូវសណ្ឋាគារលំដាប់ផ្កាយ៥ « The Royal Sands Koh Rong » ដែលមានទីតាំងស្ថិតនៅភូមិសុខសាន្ដ សង្កាត់កោះរ៉ុង ក្រុងព្រះសីហនុ ។
សម្តេចតេជោ ហ៊ុន សែន បានដាក់បញ្ជាថា ៖ «ឥឡូវនេះមានប្រហែលជា៣០កោះ ដែលយើងត្រូវដកហូតត្រឡប់មកវិញ ដោយសារតែពួកគេមិនបានធ្វើអ្វីទាំងអស់ ដូច្នេះខ្ញុំបានផ្តល់ឲ្យឯកឧត្តម សុខ ចិន្តា ពិនិត្យ ដើម្បីដកហូតកោះទាំងនោះត្រឡប់មកវិញ ហើយរៀបចំការវិនិយោគសារជាថ្មី ។ មិនអាចទុកឲ្យកោះរបស់យើងនៅរបៀបដូចសព្វថ្ងៃនេះគ្មានការគ្រប់គ្រង ហើយអ្នកទទួលសិទ្ធធ្វើការវិនិយោគនោះ តែយកដើរលក់បន្ត ។ បើចាប់ដៃគូទើបអនុញ្ញាតិ» ។
សម្តេចក៏បានបញ្ជាក់ថា សម្រាប់កោះដទៃទៀតដែលបានចុះកិច្ចសន្យារួចហើយ ជាមួយរាជរដ្ឋាភិបាលនឹងបន្តការអភិវឌ្ឍ ហើយនឹងចូលរួមសម្ភោធ ដើម្បីផ្ញើសារទៅបរទេសឲ្យមកស្នាក់នៅប្រកបដោយក្តីសុខស្រួលដោយសារ តែសន្តិភាពដែលដឹកនាំដោយគណបក្សកាន់អំណាច ។ សម្តេចនាយករដ្ឋមន្ត្រីក៏បានមានប្រសាសន៍ថា កោះរ៉ុងនឹងក្លាយជាទីកន្លែងនៃការមកដល់នៃភ្ញៀវទេសចរណ៍លំដាប់ខ្ពស់ក៏ដូចជា ភ្ញៀវជាតិមកទស្សនា និងសម្រាកលំហែរកាយលើកោះដែលបានអភិវឌ្ឍមួយនេះ ហើយសម្តេចក៏បានធានាថា កម្ពុជា គឺមិនមានវិបត្តិនយោបាយទេ តែកម្ពុជា គឺពោរពេញដោយសន្តិភាព និងស្ថេរភាពនយោយបាយ ជាពិសេស គឺគ្មានភេវរកម្មណាមួយអាចមានលទ្ធភាពកើតមាននៅបណ្តាកោះនៅកម្ពុជានោះទេ ។
សម្តេចតេជោបញ្ជាក់យ៉ាងដូច្នេះថា ៖ «ហើយខ្ញុំពិតជាមានជំនឿជឿជាក់ថា កោះរបស់កម្ពុជាទាំងអស់ មិនមែនជាគោលដៅនៃការវាយប្រហារភេវរកម្ម ហើយបើគេចង់វ៉ៃ ក៏គេគ្មានលទ្ធភាពដើម្បធ្វើឲ្យកោះរបស់កម្ពុជាទាំងឡាយអស់ស្ថេរភាព រហូតបាត់បង់ភ្ញៀវទេសចរណ៍ សម្រាប់ការកម្សាន្តនៅទីនេះផងដែរ » ។ សម្តេចនាយករដ្ឋមន្ត្រីក៏បានបញ្ជាទៅថ្នាក់ដឹកនាំក្រសួងដែនដីឲ្យដឹងថា មិនត្រូវអនុញ្ញាតិឲ្យមានការសាងសង់កម្ពស់៣០ជាន់នៅតាមបណ្តាកោះនោះទេ គឺខ្ពស់បំផុតត្រឹម៣ជាន់បានហើយ ។ សម្តេចបញ្ជាក់ថា កោះទាំងអស់ជាសម្បត្តិរបស់រដ្ឋ មិនមែនជារបស់ឯកជនទេ ។
បញ្ជាក់៖ បើសិនប្រគល់ គឺត្រឹមសិទ្ធស្នាក់នៅ គ្មានសិទ្ធចាត់ចែងនោះទេ រួមទាំងកោះរ៉ុង ៕
ចែករំលែកព័តមាននេះ