ទីក្រុងអាថែន ៖ មន្ត្រីជាប់ពាក់ព័ន្ធបាននិយាយថា សហភាពអឺរ៉ុប និងអាជ្ញាធរអ៊ីតាលី កំពុងតែស៊ើបអង្កេតពីការលួចបន្លំពន្ធទ្រង់ទ្រាយធំ ដោយក្រុមជនជាតិចិនបាននាំចូលផលិតផលតាមរយៈកំពង់ផែ Piraeus របស់ប្រទេសក្រិក ។
លោក Fabio Botto មកពីផ្នែកស៊ើបអង្កេតពិសេសក្នុងការិយាល័យប្រឆាំងនឹងការបន្លំពន្ធកណ្តាលរបស់ប្រទេសអុីតាលី និយាយថា ៖«ពន្ធលើតម្លៃបន្ថែមត្រូវបានគេចទាំងស្រុង ដែលប៉ះពាល់យ៉ាងខ្លាំងដល់អាជ្ញាធរពន្ធដារជាតិ និងសហគមន៍ » ។
លោកសង្ស័យថា ការលួចបន្លំនេះបានប្រព្រឹត្តឡើងក្នុងកំពង់ផែ Piraeus ដែលជាផ្នែកមួយនៃគម្រោងហេដ្ឋារចនាសម្ព័ន្ធក្រោមគំនិតផ្តួចផ្តើមខ្សែក្រវាត់ និងវិថីរបស់ចិន ។ ការលួចបន្លំនេះធ្វើឲ្យប្រទេសអុីតាលីខាតបង់ថវិការាប់លានដុល្លារផងដែរ ។
លោក Botto បានអះអាងថា ភ្នាក់ងារលោកមានភស្តុតាងបញ្ជាក់ថា ក្រុមហ៊ុនចិនបានគេចពន្ធនាំចូល និងពន្ធលើតម្លៃបន្ថែមរបស់ផលិតផលជាច្រើនតាមរយៈកំពង់ផែនេះ ។
លោកបន្តថា ក្រុមនេះបាននាំចូលផលិតផលភាគច្រើនជាសម្លៀកបំពាក់ និងស្បែកជើងក្លែងបន្លំ ហើយដាក់តម្លៃយ៉ាងទាបដើម្បីគេចពន្ធ ។ ពួកគេក៏បានកុហកដែរថា មិនបានទទួលផលិតផល ដើម្បីគេចពីការបង់ពន្ធលើតម្លៃបន្ថែម ។
គួរបញ្ជាក់ថា COSCO Shipping ជាក្រុមហ៊ុនរបស់រដ្ឋាភិបាលចិន ដែលជាម្ចាស់ភាគហ៊ុនធំជាងគេរបស់កំពង់ផែ Piraeus តាំងពីឆ្នាំ២០១៦មក ។ ប្រទេសចិនចង់ធ្វើឲ្យកំពង់ផែនេះក្លាយជាច្រកទ្វារទៅកាន់តំបន់អឺរ៉ុប ក្រោមគំនិតផ្តួចផ្តើមខ្សែក្រវាត់ និងវិថី ។
ក្រុមហ៊ុន COSCO និយាយថា ៖«ក្រុមហ៊ុនបានដំណើរការអាជីវកម្មនៅជុំវិញពិភពលោក។ ក្រុមហ៊ុនគោរពច្បាប់ក្នុងស្រុក-អន្តរជាតិបានជាប់លាប់និងតឹងរ៉ឹង ហើយព្យាយាមធ្វើប្រតិបត្តិការដោយស្របច្បាប់ផងដែរ » ៕
ចែករំលែកព័តមាននេះ