ខេត្តព្រៃវែង ៖ « ថ្វីបើថង់ប្លាស្ទិកជួយសម្រួលដល់ការប្រើប្រាស់ប្រចាំថ្ងៃរបស់យើង ប៉ុន្តែវាគឺជាអាវុធលាក់មុខ ដែលសារធាតុពុលនៅក្នុងថង់ប្លាស្ទិក អាចបង្កនូវជំងឺកាចសាហាវនានាដល់មនុស្ស និងធ្វើឲ្យប៉ះពាល់ដល់គុណភាពទឹក និងដីរបស់យើងថែមទៀត » ។ នេះគឺជាប្រសាសន៍របស់លោក អ៊ាង សុផល្លែត អនុរដ្ឋលេខាធិការក្រសួងបរិស្ថាន បានថ្លែងក្នុងទិវាភពផែនដី ក្រោមប្រធានបទ «បញ្ចប់ការបំពុលដោយប្លាស្ទិក» កាលពីព្រឹកថ្ងៃទី២២ មេសា ម្សិលមិញ នៅក្នុងភូមិ៤ ឃុំព្រែកខ្សាយ (ខ) ស្រុកពាមរក៍ ។
លោកអនុរដ្ឋលេខាធិការបន្តថា ៖«កម្ពុជាយើងបានចាប់ផ្តើមធ្វើទិវានេះជាលើកទី៣ហើយ ក្នុងគោលបំណងបញ្ជ្រាបការយល់ដឹងដល់ប្រជាពលរដ្ឋអំពីផលប៉ះពាល់នៃថង់ប្លាស្ទិកចំពោះសុខភាពមនុស្ស និងបរិស្ថាន និងបំផុសគំនិតពួកគាត់ឲ្យកាន់តែស្រឡាញ់ធនធានធម្មជាតិ និងបរិស្ថាន » ។
លោកបានរំឭកថា ទិវាភពផែនដីនេះ ត្រូវបានបង្កើតឡើងតាំងពីឆ្នាំ១៩៧០ នៅសហរដ្ឋអាមេរិក ហើយរហូតមកដល់ឆ្នាំ២០០៩ ទើបអង្គការសហប្រជាជាតិ បានកំណត់យកថ្ងៃទី២២ ខែមេសា ធ្វើជាទិវាភពផែនដី បន្ទាប់មកបណ្តាប្រទេសនានានៅលើពិភពលោក ក៏ចាប់ផ្តើមប្រារព្ធធ្វើទិវានេះនៅតាមប្រទេសរៀងៗខ្លួន និងបានចងក្រងបណ្តាញទិវាភពផែនដីជាសកលទៀតផង ។
ក្រសួងបរិស្ថានបានចេញអនុក្រឹត្យលេខ១៦៨ អនក្រ.បក ចុះថ្ងៃទី១០ តុលា ឆ្នាំ២០១៧ ស្តីពីការគ្រប់គ្រងថង់ប្លាស្ទិក ដែលមានគោលបំណងបង្កើនប្រសិទ្ធភាពកាត់បន្ថយការនាំចូល ការផលិត ការចែកចាយ និងការប្រើប្រាស់ថង់ប្ទាស្ទិក សំដៅធានាបាននូវកិច្ចគាំពារសុខភាពសាធារណៈ បរិស្ថាន និងសោភ័ណភាព ។ ជាមួយគ្នានេះ ក៏មានប្រកាសអន្តរក្រសួង ស្តីពីការកំណត់កម្រៃបន្ថែមលើការផ្តល់បា្លស្ទិកដល់អតិថិជន ដោយចាប់អនុវត្តនៅតាមបណ្តាមជ្ឈមណ្ឌលពាណិជ្ជកម្ម និងផ្សារទំនើប ចាប់ផ្តើមតាំងពីថ្ងៃទី១០ ខែមេសា ឆ្នាំ២០១៨ មកម្ល៉េះ ។
« ការដាក់កម្រិតការប្រើប្រាស់ថង់ប្លាស្ទិកនេះ មិនមែនមានតែនៅកម្ពុជាយើងទេ គឺមានប្រទេសជាច្រើនលើសកលលោក បាននិងកំពុងអនុវត្តដូចគ្នា តាមរយៈការយកពន្ធលើការប្រើប្រាស់ថង់ប្លាស្ទិក ការហាមឃាត់ការប្រើប្រាស់ថង់ប្លាស្ទិកទាំងស្រុង និងការកំណត់កម្រាស់នៃថង់ប្លាស្ទិក ជាដើម » ។ នេះបើតាមលោក អ៊ាង សុផល្លែត អនុរដ្ឋលេខាធិការក្រសួងបរិស្ថាន ។
គួរបញ្ជាក់ថា នៅក្នុងពេលប្រារព្ធទិវាភពផែនដីនេះដែរ ក្រុមយុវជន រួមជាមួយអាជ្ញាធរ និងមន្ត្រីបរិស្ថាន បានចុះទៅផ្សព្វផ្សាយអំពីផលប៉ះពាល់នៃថង់ប្លាស្ទិកចំពោះសុខភាព និងបរិស្ថានដល់ក្រុមអាជីវករ ក៏ដូចជាប្រជាពលរដ្ឋនៅក្នុងផ្សារអ្នកលឿង ព្រមទាំងបានណែនាំឲ្យក្រុមអាជីវករ និងប្រជាពលរដ្ឋ ចាប់អារម្មណ៍ងាកមកប្រើសម្ភារវេចខ្ចប់ជាស្លឹកឈូក ស្លឹកចេក និងវត្ថុដែលមិនប៉ះពាល់ដល់សុខភាព ជំនួសការប្រើប្រាស់ថង់ប្លាស្ទិកវិញ ៕
ចែករំលែកព័តមាននេះ