«គោរពមេ» កំពុងឆ្លុះបញ្ចាំងពីសង្គមអែបអបមួយ ។ «គោរពមេ» បានក្លាយជាទ្រឹស្តីដ៏ពេញនិយមមួយនៅក្នុងជីវិតប្រចាំថ្ងៃនៅកម្ពុជា ។ ពាក្យនេះ ត្រូវបានគេប្រើប្រាស់យ៉ាងទូលំទូលាយ ។ សូម្បីតែនៅតាមភោជនីយដ្ឋាន…
«គោរពមេ» កំពុងឆ្លុះបញ្ចាំងពីសង្គមអែបអបមួយ ។ «គោរពមេ» បានក្លាយជាទ្រឹស្តីដ៏ពេញនិយមមួយនៅក្នុងជីវិតប្រចាំថ្ងៃនៅកម្ពុជា ។ ពាក្យនេះ ត្រូវបានគេប្រើប្រាស់យ៉ាងទូលំទូលាយ ។ សូម្បីតែនៅតាមភោជនីយដ្ឋាន តាមហាងកាហ្វេ ឬក៏តាមហាងខារ៉ាអូខេក៏គេឮពាក្យ «គោរពមេ» នេះដែរ ។ អ្នកសន្តិសុខខាងក្រៅហាងទំនើបៗច្រើនប្រើប្រាស់ពាក្យ«គោរពមេ»នេះ ដើម្បីបង្ហាញការគោរពរបស់ខ្លួនចំពោះអតិថិជន និងដើម្បីធ្វើឱ្យអតិថិជនសប្បាយចិត្តផង ។ នេះអាចមកពីពួកគាត់ចង់បង្ហាញការគោរពអតិថិជនប្រៀបដូចជាមេរបស់ខ្លួន ដូចទ្រឹស្តីជំនួញដែលថា «អតិថិជនគឺជាស្តេច» ។ ពេលខ្លះអតិថិជនក៏សប្បាយចិត្តហើយក៏អាចធ្លាក់លុយធីបបានច្រើន ។
ប៉ុន្តែពេលខ្លះពាក្យ «គោរពមេ» នេះអាចជាកាយវិការមួយនៃការអែបអបរបស់មនុស្សដើម្បី បុណ្យស័ក្តិឬក៏ដើម្បីលាភសក្ការជាដើម ។ ជាទូទៅគេសង្កេតឃើញថា មនុស្សដែលនិយាយ «គោរពមេ» នេះយ៉ាងពីរោះច្រើនតែមិនសូវពូកែធ្វើការទេ ច្រើនតែពួកែអែបអបប៉ុណ្ណោះ ។ អ្នកធំមួយចំនួនចូលចិត្តស្តាប់ពាក្យពីរោះនិងបញ្ចើចបញ្ចើរច្រើនជាងស្តាប់ការពិត និងសកម្មភាពជាក់ស្តែងប្រកបដោយការទទួលខុសត្រូវរបស់បុគ្គលិកក្រោមបង្គាប់ ។
ដូច្នេះ ពេលខ្លះមនុស្សពួកែធ្វើ ប៉ុន្តែមិនពូកែនិយាយនោះ មិនមានតម្លៃស្មើនឹងមនុស្សពូកែអែបអបនិងពូកែប្រើពាក្យ«គោរពមេ»នេះ ។ ក្នុងករណីដែលជួបនឹងមេបែបនេះ អ្នកធ្វើការពិតប្រាកដ ដែលមិនពូកែអែបអបនោះ មិនទទួលបានការសរសើរឬការលើកទឹកចិត្តទេ ប៉ុន្តែបានត្រឹមតែឈឺចាប់ប៉ុណ្ណោះ ។ នៅក្នុងការងារ គេត្រូវនិយាយអំពីលទ្ធផលការងារជាក់ស្តែង និងការទទួលខុសត្រូវជាជាងការទទួលយកការអែបអបរបស់មនុស្ស ។ មេដឹកនាំដែលទទួលស្គាល់លទ្ធផលការងារជាក់ស្តែងរបស់បុគ្គលិកនឹងទទួលបានការគោរពពិតប្រាកដ និងចេញពីបេះដូងរបស់បុគ្គលិក ។ ផ្ទុយមកវិញ មេដឹកនាំដែលសប្បាយនឹងពាក្យអែបអបបានទទួលត្រឹមតែការគោរពតែសម្បកខាងក្រៅរបស់មនុស្សពូកែនិយាយមិនពូកែធ្វើប៉ុណ្ណោះ ។ គេក៏ធ្លាប់សង្កេតឃើញដែរមនុស្សបែបនេះនឹងលែងគោរពមេដឹកនាំបែបនេះដែរ នៅពេលដែលមេដឹកនាំនេះត្រូវបានផ្ទេរមុខតំណែងឬក៏ចូលនិវត្តន៍ ។ មេដឹកនាំបែបនេះក៏ឈឺចាប់ខ្លាំងនឹងអតីតកូនចៅដែលពូកែអែបអបនេះដែរ ។
ដូច្នេះមេដឹកនាំទាំងឡាយត្រូវប្រយ័ត្នចំពោះមនុស្សពូកែនិយាយពាក្យ «គោរពមេ» នេះឱ្យបានច្រើនជាជាងសប្បាយចិត្តនឹងការឮពាក្យនេះ ។ ចំណែកមនុស្សទូទៅក៏មិនគួរប្រើប្រាស់ភាពអែបអបបញ្ចើចបញ្ចើរដើម្បីទទួលបានផលជាលាភសក្ការ ឬក៏ការឡើងបុណ្យសក្តិឡើយ ។ គេត្រូវនាំគ្នាពង្រឹងសមត្ថភាព និងចំណេះហើយបំពេញការងារប្រកបដោយការទទួលខុសត្រូវដើម្បីភាពរីកចម្រើនរបស់ខ្លួនឯងផងនិងដើម្បីសង្គមជាតិទាំងមូលផង ។
សង្គមនឹងមិនអាចរីកចម្រើនបានឡើយ បើសិនជាសម្បូរតែមនុស្សពូកែអែបអបដែលមិនចេះធ្វើអ្វីលេចចេញជាផ្លែផ្កាជាក់ស្តែង ។ ប៉ុន្តែសង្គមនឹងកាន់តែរីកចម្រើន បើសិនជាសម្បូរមនុស្សដែលពូកែធ្វើការងារនិងប្រកបដោយចំណេះដឹង ។ សង្គមកម្ពុជាកំពុងតែមានការផ្លាស់ប្តូរទៅរកភាពកាន់តែល្អប្រសើរ ហើយសម័យកាលនៃការអែបអបក៏នឹងចាប់ផ្តើមបាត់ឥទ្ឋិពលរបស់វាជាបណ្តើរៗដែរ ។ ប៉ុន្តែបើសិនជាយើងមិនព្រមលះបង់វាចោលឱ្យគ្រប់គ្នាទេនោះ វានឹងនៅតែតាមលងយើងគ្រប់គ្នាហើយធ្វើឱ្យរាំងស្ទះដល់ការរីកចម្រើនរបស់មនុស្សនិងសង្គម ៕
ចែករំលែកព័តមាននេះ