រាជធានីភ្នំពេញ ៖ តាមសេចក្តីរាយការណ៍បឋមបានឲ្យដឹងថា មានករណីបង្ក្រាបបទល្មើសគម្រាមជំរិតទារប្រាក់ និងឆបោកតាមប្រព័ន្ធ Internet (VOIP) ហេតុការណ៍នៅវេលាម៉ោង១៧និង២៥នាទីថ្ងៃទី២២ ខែមេសា ឆ្នាំ២០១៨ នៅចំណុចផ្ទះលេខ៣៨ផ្លូវ លេខ៦០៦ ក្រុម៤២ ភូមិ៩ សង្កាត់បឹងកក់ទី២ ខណ្ឌទួលគោក ។
តាមសេចក្តីរាយការណ៍បន្តថា អង្គភាពអគ្គនាយកដ្ឋានអន្តោប្រវេសន៍ក្រោមកិច្ចសម្របសម្រួលពីសំណាក់លោកសៀង សុខព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញបានសហការជាមួយសមត្ថកិច្ច អាជ្ញាធរមូលដ្ឋាន ចុះបង្ក្រាបបទល្មើសជនបរទេស ដែលកំពុងប្រព្រឹត្តបទល្មើសដោយយកម៉ាស៊ីនឧបករណ៍បម្លែងពីInternet ជាមធ្យោបាយសម្រាប់គម្រាមទារប្រាក់ និងឆបោកទៅក្រៅប្រទេស ។
ជាលទ្ធផលសមត្ថកិច្ចបានរកឃើញ និងឃាត់ខ្លួនជនសង្ស័យជាជនជាតិបរទេសសញ្ជាតិចិនសរុបមាន៧០នាក់ ស្រី០៤នាក់ ។ ដោយឡែកទីតាំងនៅខណ្ឌសែនសុខចំនួន៤៩នាក់ ស្រី១៥នាក់ ដែលសរុបរួមចំនួន១១៩នាក់ស្រី១៩នាក់ នៅខណ្ឌសែនសុខនៅវិទ្យាល័យមួយនៅតាមផ្លូវ១៩៧២ សង្កាត់ភ្នំពេញថ្មី ។
ក្រោយពេលធ្វើការត្រួតពិនិត្យរួច ជនសង្ស័យជាជនជាតិខាងលើត្រូវបានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីចាត់ការតាមនីតិវិធីបន្តទៀត ៕
ចែករំលែកព័តមាននេះ