ជប៉ុន ៖ តាមប្រភពព័ត៌មាន Oddity Central បានឲ្យដឹងថា អតីតសាស្ត្រាចារ្យប្រចាំសាកលវិទ្យាល័យតូក្យូ ប្រទេសជប៉ុន បានអះអាងថា រូបលោកអាចសំយោគយកឧស្ម័ននីត្រូសែនពីខ្យល់អាកាសបម្លែងទៅជាប្រូតេអ៊ីន…
ជប៉ុន ៖ តាមប្រភពព័ត៌មាន Oddity Central បានឲ្យដឹងថា អតីតសាស្ត្រាចារ្យប្រចាំសាកលវិទ្យាល័យតូក្យូ ប្រទេសជប៉ុន បានអះអាងថា រូបលោកអាចសំយោគយកឧស្ម័ននីត្រូសែនពីខ្យល់អាកាសបម្លែងទៅជាប្រូតេអ៊ីន ក្រោយពេលបរិភោគតែផ្លែឈើសុទ្ធក្នុងរយៈពេល៨ឆ្នាំ។
នៅឆ្នាំ២០០៩ សាស្ត្រាចារ្យ Mizuki Nakano បានចាប់ផ្តើមសាកល្បងលើខ្លួនឯង ដោយមិនទទួលទានអ្វីទាល់តែសោះក្រៅពីផ្លែឈើ។ លោកមិនមែនចាប់ផ្តើមភ្លាម ទទួលទានតែផ្លែឈើសុទ្ធនោះដែរ។ ជាដំបូង លោកព្យាយាមបង្កើនការទទួលឲ្យដល់កម្រិតមួយ ដែលធ្វើឲ្យលោកអាចពឹងតែលើផ្លែឈើតែមួយមុខ សូម្បីតែទឹកក៏លោកផឹកទឹកផ្លែឈើដែរ។
មានការសិក្សាជាច្រើនលើកឡើងថា យើងមិនអាចរស់ដោយពឹងតែលើការទទួលទានផ្លែឈើនោះទេ ព្រោះថា វាគ្មានសារធាតុប្រូតេអ៊ីន និងវីតាមីនបេ១២។ រាងកាយយើងត្រូវតែមានតុល្យភាពរវាងស្ករ ប្រូតេអ៊ីន និងខ្លាញ់។ ផ្លែឈើតែមួយមុខមិនអាចជួយយើងបានទេ។ តែសម្រាប់ លោកសាស្ត្រាចារ្យ Mizuki វិញ នៅតែចង់ពិសោធន៍មើលលើខ្លួនឯង។
នៅពេលថ្មីៗនេះ លោកបានត្រឡប់មកជាមួយនឹងលទ្ធផលស្រាវជ្រាវមួយ។ លោកថា រាងកាយរបស់លោកនាពេលនេះ មានបាក់តេរីម្យ៉ាងអាចបម្លែងឧស្ម័ននីត្រូសែនក្នុងខ្យល់ ឲ្យទៅជាប្រូតេអ៊ីនសម្រាប់ប្រើប្រាស់ ក្រោយពីទទួលទានតែផ្លែឈើរយៈពេល៨ឆ្នាំ។
យើងឃើញថា វាពិតជាអស្ចារ្យណាស់ ប្រសិនបើគ្រប់គ្នាអាចដូចលោកសាស្ត្រាចារ្យ។ តែការរកឃើញរបស់លោកមិនត្រូវបានគេយកជាការទេ ព្រោះតែមិនមានការសិក្សាឲ្យស៊ីជម្រៅ។ យើងត្រូវមានលំនឹងអាហារ ទើបមានសុខភាពល្អ៕
ចែករំលែកព័តមាននេះ