រាជធានីភ្នំពេញ ៖ ប៉ុន្មានថ្ងៃកន្លងមកនេះ អ្នកគាំទ្រវិស័យកីឡាប្រដាល់គុនខ្មែរ អ្នកនិយមលេងហ្វេសប៊ុក ជាពិសេសអ្នកនយោបាយវ័យក្មេងលោកពេជ្រ ស្រស់ បានចាប់អារម្មណ៍យ៉ាងខ្លាំងចំពោះការបោះពាក្យសម្ដីឌឺដងដាក់គ្នារវាងកីឡាករថៃ Saensatharn និងកីឡាករជើងខ្លាំងកម្ពុជាមួយចំនួនដូចជា កែវ រំចង់, រឿង សោភ័ណ្ឌ, ម៉ឺន សុភា និងធឿន ធារ៉ា ជាដើម រហូតលោកប្រធានគណបក្សយុវជនកម្ពុជារូបនេះប្រកាសផ្ដល់ប្រាក់៥ពាន់ដុល្លារដល់កីឡាករកែវ រំចង់បើអាចបំបាក់អំនួតកីឡាករថៃរូបនេះបានទៀតផង ។ ប៉ុន្ដែការឌឺដងគ្នានេះ ត្រូវបានប្រធានសហព័ន្ធកីឡាប្រដាល់គុនខ្មែរលោក តែម ម៉ឺន មិនពេញចិត្តសោះឡើយថែមទាំងចាត់ទុកពួកគេថាមិនមែនជាអ្នកកីឡាទៀតផង ។
ជាមួយគ្នានេះ លោកគ្រោងកោះហៅកីឡាករកម្ពុជាមកណែនាំ និងពន្យល់ពីអត្ថន័យនៃកីឡាដល់ពួកគេតាមអនុសាសន៍ណែនាំដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាទៀតផង ។
លោក តែម ម៉ឺន បានឲ្យដឹងថា ការបោះពាក្យសម្ដីឌឺដងលើបណ្ដាញសង្គមហ្វេសប៊ុក
របស់កីឡាករថៃ Saensatharn គឺជារឿងរបស់គេ តែបញ្ហាចំពោះមុខកីឡាករកម្ពុជាមិនគួរគប្បីទៅឆ្លងឆ្លើយចំពោះទង្វើមិនសក្តិសមជាអ្នកកីឡានេះឡើយ ។ ហេតុនេះ សហព័ន្ធនឹងប្រជុំពិភាក្សាជាមួយក្រុមគណៈកម្មការវិន័យដើម្បីកោះហៅកីឡាករកម្ពុជាមកណែនាំ ។ លោកនិយាយថា ៖«កីឡាករអត់មានវិន័យ អត់មានក្រមសីលធម៌ អត់មានលក្ខណៈជាអ្នកកីឡា យើងត្រូវតែមានការណែនាំ ។ កីឡាករណាក៏ដោយ មិនថាកីឡាករប្រទេសណាទេ បើមានការអួតអាងបែបហ្នឹង គឺមិនសក្តិសមជាកីឡាករទេ ព្រោះកីឡាមាននិយមន័យរបស់គេដែលយើងត្រូវដឹង តួយ៉ាងកីឡាករត្រូវហ្វឹកហាត់សម្រាប់ប្រកួតមិត្តភាព សាមគ្គីភាព សុខភាព កិត្តិយស និងប្រាក់ចំណូលផងដែរ…»។
លោកប្រធានសហព័ន្ធកីឡាប្រដាល់គុនខ្មែរដដែលបានបន្ដថា កន្លងមកសូម្បីសម្ដេចតេជោ ហ៊ុន សែន ក៏តែងតែផ្ដល់នូវអនុសាសន៍ជារឿយៗឲ្យកីឡាករ-កីឡាការិនីគ្រប់រូប ត្រូវមានក្រមសីលធម៌ និងវិន័យឲ្យបានល្អបំផុត ព្រោះវាជាផ្នែកមួយនៃកិត្តិយសបន្ទាប់ពីលទ្ធផល ទោះបីឈ្នះ ឬចាញ់ក្ដី ។ ប៉ុន្ដែក្រឡេកទៅមើលរឿងឌឺដងគ្នាខាងលើវិញ វាគឺជារឿងបុគ្គលគ្មានវិន័យ។
លោកថា៖«សប្ដាហ៍នេះ យើងខ្ញុំត្រូវតែឲ្យគណៈកម្មការវិន័យធ្វើការណែនាំដល់ពួកគេ ដើម្បីយល់ឲ្យច្បាស់ពីក្រមសីលធម៌កីឡា ដូចប្រសាសន៍របស់សម្ដេចតេជោនាយករដ្ឋមន្ដ្រី កាលពីថ្ងៃទី៣ ខែមេសា ក្នុងពិធីជួបជុំបាយសាមគ្គីមហាគ្រួសារកីឡាអ៊ីចឹង ។
សម្ដេចក៏និយាយដែររឿងក្រមសីលធម៌ វិន័យផ្សេងៗ គឺសម្ដេចបានផ្ដល់អនុសាសន៍ណែនាំច្រើនហើយ តែពួកយើងខ្លះមិនយកចិត្តទុកដាក់ក្នុងការស្ដាប់ ។ តែយើងចាត់ទុកថា ពួកគេមិនទាន់យល់ អ៊ីចឹងក្នុងនាមថ្នាក់ដឹកនាំ យើងត្រូវតែពន្យល់ពួកគេសិន»។
បន្ថែមលើនេះ លោក តែម ម៉ឺន បានបញ្ជាក់យ៉ាងច្បាស់ថា ដរាបណាកីឡាករមានការឌឺដងគ្នា គ្មានការយោគយល់ និងគ្មានក្រមសីលធម៌បែបនេះ ទោះបីមានការផ្គូផ្គងឲ្យមានការប្រកួត មិនថាក្នុងស្រុក ឬក្រៅស្រុកនោះទេ សហព័ន្ធកីឡាប្រដាល់គុនខ្មែរនឹងមិនអនុញ្ញាតឲ្យកើតមានការប្រកួតនោះឡើយ ហើយលោកនឹងទូរស័ព្ទទៅប្រាប់គ្រប់ស្ថានីយទូរទស្សន៍ក្នុងស្រុក ដែលមានសង្វៀនប្រដាល់ ដាច់ខាតមិនត្រូវរៀបចំផ្គូផ្គងឲ្យមានការប្រកួតរវាងកីឡាករគ្មានក្រមសីលធម៌ជាអ្នកកីឡាបែបនេះឡើយ លុះត្រាតែការប្រកួតនោះកើតចេញពីស្មារតីមិត្តភាព សាមគ្គីភាព ហើយល្អរវាងគ្នានឹងគ្នា ទើបសហព័ន្ធអនុញ្ញាតឲ្យរៀបចំ ៕
ចែករំលែកព័តមាននេះ