ខេត្តកណ្ដាល ៖ កម្លាំងនគរបាលស្រុកអង្គស្នួល និងប៉ុស្តិ៍ម្កាក់បានធ្វើការចាប់ខ្លួនយុវជន២នាក់ ដែលបានចូលលុយគ្នាទិញថ្នាំញៀនបាន១កញ្ចប់ ដើម្បីយកទៅប្រើប្រាស់ ។ ប៉ុន្តែត្រូវបានបែកការដឹងដល់ប្រជាពលរដ្ឋលួចរាយការណ៍ជូនកម្លាំងនគរបាលចុះទៅធ្វើការបង្ក្រាប និងចាប់ខ្លួនបាន រួចបាននាំទៅសាកសួរ និងកសាងសំណុំរឿងចាត់ការតាមច្បាប់តែម្ដង ។ ការចាប់ខ្លួននេះបានធ្វើឡើងកាលពីវេលាម៉ោង៩និង១០នាទីយប់ថ្ងៃទី២០ ខែមេសា ឆ្នាំ២០១៨ នៅក្នុងភូមិវែង ឃុំម្កាក់ ស្រុកអង្គស្នួល ខេត្តកណ្តាល ។
ជនសង្ស័យខាងលើទី១- ឈ្មោះ ហួន ឈៀវ អាយុ២០ឆ្នាំ ជនជាតិខ្មែរ មុខរបរជាងភ្លើង មានទីលំនៅក្នុងភូមិច្រកក្រសាំង ឃុំទួលព្រិច ស្រុកអង្គស្នួល ខេត្តកណ្តាល និងទី២-ឈ្មោះរិន សុខលីន អាយុ១៩ឆ្នាំ ជនជាតិខ្មែរ មុខរបរជាងភ្លើង មានទីលំនៅភូមិជាមួយគ្នា ហើយនគរបាលបានដកហូតបានថ្នាំញៀន១កញ្ចប់ ពីពួកគេផងដែរ ។
តាមប្រភពព័ត៌មានបានឲ្យដឹងថា នៅមុនពេលឈានដល់ការចាប់ខ្លួនជនសង្ស័យខាងលើ កម្លាំងនគរបាលស្រុកអង្គស្នួល និងនគរបាលប៉ុស្តិ៍រដ្ឋបាលម្កាក់បានចេញល្បាតក្នុងភូមិសាស្ត្ររបស់ខ្លួន ។ លុះពេលទៅដល់ត្រង់ចំណុចកើតហេតុខាងលើ បានឃើញជនសង្ស័យ២នាក់នេះ កំពុងដើរនៅតាមផ្លូវគួរឲ្យសង្ស័យ កម្លាំងនគរបាលក៏បានធ្វើការឆែកត្រួតពិនិត្យ ឃើញមានថ្នាំញៀនមួយកញ្ចប់មធ្យមនៅជនសង្ស័យឈ្មោះហួន ឈៀវ ជាអ្នកទុកទើបចាប់ខ្លួនតែម្ដង ។
ប្រភពខាងលើបានបន្តថា បន្ទាប់មកកម្លាំងបាននាំទៅសួរនាំ ហើយនៅចំពោះមុខនគរបាលជនសង្ស័យទាំង០២នាក់នោះបានឆ្លើយថា ពួកខ្លួនទាំងពីរនាក់បានចូលលុយគ្នាទៅទិញថ្នាំញៀនប្រភេទម៉ាទឹកកក ពីឈ្មោះកែវ ក្រូច រស់នៅក្នុងភូមិវែង ឃុំម្កាក់ស្រុកអង្គស្នួល ខេត្តកណ្តាល ដើម្បីយកមកប្រើប្រាស់ ហើយកន្លងមកពួកខ្លួនធ្លាប់ប្រើប្រាស់ថ្នាំញៀនរយៈពេលជាង១ឆ្នាំមកហើយ ទើបតែពេលនេះអស់លក្ខណ៍ត្រូវបាននគរបាលចាប់ខ្លួនបានបែបនេះ ៕
ចែករំលែកព័តមាននេះ