រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោកសុខ ឥសានបានអះអាងថា ការស្នើសុំរបស់ក្រុមអតីតបក្សប្រឆាំងទៅព្រះមហាក្សត្រជាការអស់ផ្លូវទាល់ច្រក ព្រោះអស់រយៈពេលមួយសប្តាហ៍ទៅហើយគ្មានការឆ្លើយតបរឿងនេះ ។ ការអះអាងនេះបន្ទាប់ពីក្រុមមន្ត្រីជាន់ខ្ពស់អតីតគណបក្សសង្គ្រោះជាតិមួយក្រុមដាក់សំណើរទៅព្រះមហាក្សត្រ ដើម្បីអន្តរាគមន៍ស្នើសុំឲ្យតុកាលកំពូលបើកការជំនំជម្រះពីការរំលាយគណបក្សសង្គ្រោះជាតិឡើងវិញ ។
លោកសុខ ឥសានបានឲ្យដឹងនៅថ្ងៃទី២២ ខែមេសា ឆ្នាំ២០១៨ ថា «ការព្យាយាម ស្នើសុំព្រះរាជអន្តរាគមន៍ពីព្រះមហាក្សត្រ ។ ដោយដើរដល់ផ្លូវទាល់ទៅមុខលែងរួចទៀតហើយ ទើបកាលពីថ្ងៃទី០៩ ខែមេសា ឆ្នាំ ២០១៨ នេះអតីតតំណាងរាស្ត្រមួយចំនួននៃអតីតបក្សប្រឆាំងបានធ្វើលិខិតមួយស្នើសុំព្រះរាជអន្តរាគមន៍ ពីព្រះមហាក្សត្រនៃព្រះរាជាណាចក្រកម្ពុជាដែលពួកគេថា ព្រះអង្គដើរតួជាអាជ្ញាកណ្តាល ដើម្បីឲ្យតុលាការកំ ពូលបើកការជំនុំជម្រះពីការរំលាយអតីតបក្សប្រឆាំងឡើងវិញ ។ តែទោះជាយ៉ាងណាអស់រយៈពេល១សប្តាហ៍ ហើយមិនទាន់បានចម្លើយពីព្រះបរមរាជវាំងនៅឡើយ ។
បើតាមលោកសុខ ឥសានក៏បានបញ្ជាក់យ៉ាងដូច្នេះទៀតថា «ការមិនឆ្លើយតបពីព្រះបរមរាជវាំងនេះបានសេចក្តីថា ការស្នើរសុំព្រះរាជអន្តរាគមន៍ពីព្រះមហាក្សត្រ គឺផ្ទុយពីគោលការណ៍ច្បាប់ និងពីទង្វើល្មើសច្បាប់របស់អតីតមេដឹកនាំអតីតបក្សប្រឆាំង ដែលអង្គព្រះមហាក្សត្រទ្រង់មិនកាន់ជើង បណ្តាជនខុសច្បាប់ឡើយ ។ ដូច្នេះ ការសុំអន្តរាគមន៍ពីក្រុមអតីតបក្សប្រឆាំង គឺជាការដើរដល់ផ្លូវទាល់ច្រកយ៉ាងពិតប្រាកដជាក់ស្តែងដែលអតីតបក្សប្រឆាំងកំពុងជួបប្រទះចុងក្រោយនេះ ខណៈដែលការបោះឆ្នោតតំណាងរាស្ត្រកាន់តែ ឈានមកដល់ឆាប់ៗនេះហើយ » ។
លោកគូសបញ្ជាក់ថា «តើនយោបាយញុះញង់ពីចម្ងាយមានប្រសិទ្ធភាពប៉ុនណាទៅ បើប្រៀបធៀបនឹង ប្រឆាំងនៅក្នុងស្រុកនោះ ? នៅពេលនៅក្នុងប្រទេសផងនៅ តែបរាជ័យ ហៅមិនព្ញ ចុះទម្រាំនៅស្រែកពីក្រៅឆ្ងាយៗដាច់សង្វែងនោះ វាបានផលឬទេ ? ដូច្នេះនយោបាយញុះញង់ពីចម្ងាយរបស់ទណ្ឌិតសម រង្សី មិនអាចទទួលបានផលឡើយ » ។
សូមជម្រាបថា ការលើកឡើងរបស់អ្នកនាំពាក្យគណបក្សកាន់អំណាចនេះស្របពេលដែលក្រុមលោកសម រង្ស៊ីបានសមាជិក សមាជិកា និងអ្នកគាំទ្រចលនាសង្គ្រោះជាតិបានប្រមូលផ្ដុំគ្នាធ្វើសន្និសីទមួយនៅទីក្រុងប៉ារីស ប្រទេសបារាំង កាលពីថ្ងៃទី២១ មេសា បានសន្និសីទការប្រមូលផ្ដុំគ្នា ដើម្បីទទួលព័ត៌មានថ្មីៗ ស្ដីពី យុទ្ធនាការ អន្តរជាតិរបស់លោក សម រង្ស៊ី ដែលជំរុញឲ្យមានការបោះឆ្នោតដោយសេរីត្រឹមត្រូវ និងយុត្តិធម៌ នៅកម្ពុជា ។ ជាពិសេស គឺការបោះឆ្នោតដែលចូលរួមដោយគណបក្សសង្គ្រោះ ជាតិ ។
លោកសម រង្ស៊ីបានអះអាងទៅកាន់ក្រុមអ្នកគាំទ្រខ្លួនថា អន្តរជាតិបានកំពុងយកចិត្តទុកដាក់ចំពោះកម្ពុជាពិសេសនោះការបោះឆ្នោតនៅពេលខាងមុខនេះ ដោយពួកគេចង់ឲ្យបក្សប្រឆាំងចូលរួមបោះឆ្នោតផងដែរ ៕
ចែករំលែកព័តមាននេះ