រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសនៅថ្ងៃអាទិត្យទី២២ ខែមេសា ឆ្នាំ២០១៨នេះថា ដើម្បីជួយសម្រាលបន្ទុកបងប្អូនប្រជាពលរដ្ឋខ្មែរសម្រាប់ការធ្វើដំណើរទៅកាន់ស្រុកកំណើត ជាឱកាសបុណ្យភ្ជុំបិណ្ឌខាងមុខ រាជរដ្ឋាភិបាលនឹងរៀបចំឡានក្រុងប្រមាណជាង២០០ឡាន ដើម្បីបម្រើជូនប្រជាពលរដ្ឋបានធ្វើដំណើរដោយមិនអស់ប្រាក់ ។
យោងតាមហ្វេសប៊ុកផ្លូវការរបស់សម្តេចតេជោ ហ៊ុន សែន បានបញ្ជាក់យ៉ាងដូច្នេះថា ៖ «ជាថ្មីម្តងទៀត សម្តេចតេជោ ហ៊ុន សែន ក៏បានប្រកាសផងដែរថា សម្រាប់បុណ្យភ្ជុំបិណ្ឌខាងមុខនេះ គឺសាលារាជធានីភ្នំពេញនឹងត្រៀមឡានក្រុងប្រមាណ២០០ឡាន ដើម្បីផ្តល់ការដឹកជញ្ជូនដល់បងប្អូនកូនក្មួយកម្មករ ដោយមិនយកលុយ ដើម្បីជួយកាត់បន្ថយការចំណាយនានារបស់កូនក្មួយកម្មករ» ។
ការប្រកាសនេះធ្វើឡើងនាឱកាសដែលសម្តេចតេជោ ហ៊ុន សែន បានអញ្ជើញជួបសំណេះសំណាលជាមួយសហជីពកម្មករចំនួន ៤,៣៥០នាក់ នៅសាលមហោស្រពកោះពេជ្រ រាជធានីភ្នំពេញនាថ្ងៃទី២២ ខែមេសា ឆ្នាំ២០១៨នេះ ហើយប្រមុខដឹកនាំរាជរដ្ឋាភិបាលបានកោតសរសើរ និងថ្លែងអំណរគុណចំពោះសេវាឡានក្រុងរបស់សាលារាជធានីភ្នំពេញ ដែលបានដឹកជញ្ជូនបងប្អូនប្រជាពលរដ្ឋ កម្មករ-កម្មការនី ទៅស្រុកកំណើត ក្នុងកំឡុងពេលបុណ្យចូលឆ្នាំថ្មីប្រពៃណីជាតិខ្មែរក្នុងពេលថ្មីៗនេះ ដែលមានបងប្អូនកូនក្មួយធ្វើដំណើរប្រមាណជាង ៨,៨៣៥នាក់ និងពេលត្រឡប់មកវិញ មានអ្នកដំណើរប្រមាណ៥,២៤២នាក់ ដោយមានអ្នកខ្លះមិនទាន់ត្រឡប់មកវិញនៅឡើយ ។
នាឱកាសនោះផងដែរ សម្តេច នៅតែបន្តអំពាវនាវឲ្យបងប្អូនប្រជាពលរដ្ឋ ជាពិសេសបងប្អូនកូនក្មួយកម្មករកម្មការនី សូមចូលរួមរក្សាសន្តិភាពឲ្យខានតែបាន ដើម្បីរក្សាការពារមុខរបរ អាជីព និងការងារដែលកំពុងមានសព្វថ្ងៃ ។
ទន្ទឹមនឹងនេះ សូមបងប្អូនប្រជាពលរដ្ឋទូទាំងប្រទេសបន្តបោះឆ្នោត ជូនគណបក្សប្រជាជនកម្ពុជាបន្តទៀត ដើម្បីឲ្យរាជរដ្ឋាភិបាលមានឱកាសអភិវឌ្ឍន៍ប្រទេសជាតិឲ្យកាន់តែរីកចម្រើនថែមទៀត ។ សម្តេចតេជោ ហ៊ុន សែន នឹងបន្តធ្វើជានាយករដ្ឋមន្ត្រីយ៉ាងហោចណាស់មានរយៈពេល២អាណត្តិទៀត ៕
ចែករំលែកព័តមាននេះ