ក្នុង​កាលៈទេសៈ​នេះ តើ​ទិញ​ផ្ទះល្វែង ខុន​ដូ ឬ​ដី មួយ​ណា​​ចំណេញ​ជាង?


រាជធានី​ភ្នំពេញ ៖ ក្នុង​ឆ្នាំ​២០១៨ និង​ឆ្នាំ​២០១៩ វិស័យ​អចលនទ្រព្យ​ត្រូវ​បាន​រំពឹង​ថា នឹង​នៅ​តែ​មាន​កំណើន​រឹង​មាំ​ក្នុង​រង្វង់​៨,៥%​។ កំណើន​នេះ​នឹង​ត្រូវ​ទ្រទ្រង់​ដោយ​ការ​កើន​ឡើង​​នៃ​សកម្មភាព​ទិញ​-​លក់​សំណង់​អគារ​ពាណិជ្ជកម្ម និង​លំនៅ​ឋាន​មាន​តម្លៃ​ទាប​និង​មធ្យម ដែល​ប៉ះប៉ូវ​ដល់​ការ​ថមថយ​នៃប្រតិបត្តិ​ការ​ទិញ​-​លក់ និង​ជួល​លំនៅ​ឋាន​តម្លៃ​ខ្ពស់ ដោយសារ​កំណើន​ខ្លាំង​នៃ​ការ​ផ្គត់ផ្គង់​ធៀប​នឹង​តម្រូវការ ។ ក្នុង​កាលៈទេសៈ​ដែល​វិស័យ​អចលនទ្រព្យ​កំពុង​រីក​ចម្រើន និង​បន្ដ​ងើបឡើង​បែប​នេះ ពិតជា​ផ្ដល់​នូវ​ឱកាស​មាស​ដល់​អ្នក​វិនិយោគ​លើ​វិស័យ​នេះ​យ៉ាងច្រើន ហើយ​ក៏​មាន​អ្នក​ចាប់អារម្មណ៍​ចង់​ប្រឡូក​​ចូល​ទីផ្សារ​មួយ​នេះ​ផង​ដែរ ។ ដូច្នេះ អត្ថបទ​នេះ នឹង​ត្រួសត្រាយ​ថា តើ​គួរ​វិនិ​យោគ​លើ​ផ្ទះល្វែង ខុន​ដូ ឬ​ដីធ្លី ដើម្បី​ទទួល​បាន​ឱកាស​ចំណេញ​ឆាប់ ក៏​ដូច​ជា​កាត់​បន្ថយ​ហានិភ័យ ?

លោក ច្រឹ​ក សុខ​នី​ម អគ្គនាយក​ក្រុមហ៊ុន​ដែល​មាន​ជំនាញ​ទិញ​-​លក់​លំនៅ​ឋាន​នៅ​តាម​បុរី​នានា បាន​ថ្លែង​ថា ការ​ទិញ​អចលនទ្រព្យ​ទាំងនេះ វា​អាស្រ័យ​លើ​លក្ខខណ្ឌ​នៃ​ប្រាក់​ចំណូល និង​លំហូរ​សាច់ប្រាក់​របស់​អ្នក​វិនិយោគ​នីមួយ​ៗ ។ លោក​បាន​ពន្យល់​យ៉ាង​ដូច្នេះ​ថា ៖

-​ការ​វិនិយោគ​ទិញ​ដី ៖
ប្រសិនជា​ចង់​វិនិយោគ​លើ​ដីធ្លី អ្នក​វិនិយោគ​ត្រូវ​ដឹង​ថា ការ​វិនិយោគ​បែប​នេះ​មិន​មាន​លំហូរ​សាច់ប្រាក់​ភ្លាម​ៗ​នោះ​ទេ ។ ហេតុនេះ អ្នក​វិនិយោគ​លើ​ដីធ្លី​ត្រូវ​មើល​លក្ខខណ្ឌ​នៃ​ប្រាក់​ចំណូល​របស់​ខ្លួន ព្រោះ​ប្រសិនជា​ខ្ចី​លុយ​ពី​ធនាគារ​មក​ទិញ​ដី ហើយ​ស្ថានភាព​លំហូរ​សាច់ប្រាក់​របស់​ខ្លួន​មិន​មាន​ភាពល្អ​ប្រសើរ គួរ​កុំ​ទិញ​អី​។ ផ្ទុយ​ទៅ​វិញ ប្រសិនជា​អ្នក​វិនិយោគ​មាន​សាច់ប្រាក់​៥០% ហើយ​ខ្ចី​លុយ​ធនាគារ​៥០% និង​មាន​លំហូរ​សាច់​ប្រាក់​​អាច​ដំណើរការ​បាន គួរ​វិនិយោគ​លើ​ដីធ្លី វា​មានឱកាស​ចំណេញ​ច្រើន​ជាង ។

ការ​វិនិយោគ​លើ​ដីធ្លី​នេះ ក៏​គួរ​មើល​តំបន់ ដែល​ស្ថិត​ក្នុង​ផែនការអភិវឌ្ឍន៍​របស់​រាជ​រដ្ឋា​ភិបាល​ផង​ដែរ ពិសេស​គួរ​ពិនិត្យ​លើ​ប្លង់​ដី​ឲ្យ​បាន​ច្បាស់លាស់ ដើម្បី​បញ្ចៀស​ជម្លោះ​ណាមួយ និង​គួរ​មើល​ពី​សក្តានុពល​នៅ​ទីតាំង​ដី​របស់​ខ្លួន ។

-​ការ​ទិញ​ផ្ទះល្វែង ៖
ការ​ទិញ​ផ្ទះល្វែង ក៏​មានឱកាស​ចំណេញ​ដែរ ហើយ​ក៏​ជា​ការ​វិនិយោគ​មាន​លំហូរ​សាច់​ប្រាក់​ផង​ដែរ ព្រោះ​ផ្ទះល្វែង​អាច​ជួល​បាន ប៉ុន្តែ​អ្នកទិញ​ក៏​គួរ​ពិនិត្យ​មើល​លំហូរ​សាច់​ប្រាក់​របស់​ខ្លួន និង​ទំហំ​ឥណទាន​ដែល​ត្រូវ​ខ្ចី និង​សង​ត្រឡប់​ទៅ​ធនាគារ​បាន ។ ការ​ទិញ​ផ្ទះល្វែង​នៅ​តំបន់​សម្រាប់​រស់នៅ និង​តំបន់​ពាណិជ្ជកម្ម គឺ​ផ្ទះល្វែង​នៅ​តំបន់​ពាណិជ្ជ​កម្ម មានឱកាស​ចំណេញ​ខ្ពស់​ជាង ប៉ុន្តែ​ក៏​មាន​តម្លៃ​ថ្លៃ​ជាង​តំបន់​លំនៅ​ឋាន​សម្រាប់​រស់នៅ​ធម្មតា​ផង​ដែរ ។

ការ​ទិញ​ផ្ទះល្វែង ក៏​គួរ​ពិនិត្យ​ទៅ​លើ​ទីតាំង និង​លក្ខខណ្ឌ​ច្បាប់​ផង​ដែរ ដើម្បី​បញ្ចៀស​ហានិភ័យ​ដែល​ធ្វើ​ឲ្យ​អត្រា​ចំណេញ​ទាប និង​មាន​ហានិភ័យ​ខ្ពស់ ហើយ​ប្រសិនបើ​ទិញ​ប៉ះ​ចំ​សំណង់​អត់​ច្បាប់ អត្រា​នៃ​ការ​ចំណេញ​កាន់តែ​ទាប ឬ​ស្ទើរតែ​អត់​ទីផ្សារ​តែ​ម្ដង ។

-​ការ​ទិញ​ខុន​ដូ ៖
ខុន​​ដូ​ជា​វិស័យ​ថ្មី​មួយ ដែល​ទើបតែ​មានការ​ពេញ​និយម​ជា​បណ្តើរ​ៗ​នៅ​កម្ពុជា ។ ការ​វិនិ​យោគ​លើ​ខុន​ដូ​ភាគច្រើន​ផ្តោត​សម្រាប់​ជួល យក​ប្រាក់​ត្រឡប់​មក​វិញ ប៉ុន្តែ​ការ​ទុក​លក់​យកចំណេញ មិន​ទាន់​មានឱកាស​ចំណេញ​ខ្ពស់​ទេ​នៅ​ពេល​នេះ ដោយសារ​ពលរដ្ឋ​ចង់​រស់នៅ​លំនៅ​ឋាន​ផ្ទាល់ខ្លួន ជាង​ការ​រស់​បែប​សហកម្មសិទ្ធិ ។ មួយទៀត​នោះ បច្ចុប្បន្ន លំនៅ​ឋាន​ជាប់​ដី​តាម​បុរី​នានា​នៅ​មាន​តម្លៃ​សមរម្យ និង​មាន​ចំនួន​ច្រើន​នៅឡើយ ។

ហេតុនេះ ការ​ទិញ​ខុន​ដូ គួរតែ​វិនិយោគ​លើ​ទីតាំង ដែល​មានការ​ពេញ​និយម​ច្រើន​ពី​អ្នក​ស្នាក់​នៅ ដូច​ជា ក្នុង​សង្កាត់​ទន្លេបាសាក់ សង្កាត់​ចតុមុខ សង្កាត់​បឹង​កេងកង​១ ជាដើម ដែល​ជា​តំបន់​មាន​មនុស្ស​រស់នៅ​ច្រើន និង​មានការ​ពេញ​និយម​ពី​បរទេស ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

កិច្ចការជំនួញ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ