រាជធានីភ្នំពេញ ៖ ការរីកចម្រើននៃវិស័យសំណង់នាប៉ុន្មានឆ្នាំចុងក្រោយនេះ បានធ្វើឲ្យរាជធានីភ្នំពេញប្រែមុខមាត់គួរឲ្យកត់សម្គាល់ ពិសេសគឺសំណង់អគារខ្ពស់ៗជាច្រើនបានអណ្តែតឡើងស្ទើរគ្រប់តំបន់ ។ ក្នុងនោះ ខណ្ឌចំនួន៤ត្រូវបានមន្ត្រីជំនាញវាយតម្លៃថា កំពុងមានសក្តានុពលខ្លាំងលើសំណង់អគារខ្ពស់ៗ ។
លោក ឡៅ ទិព្វសីហា មន្ត្រីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់មានប្រសាសន៍កាលពីថ្ងៃទី១៩ មេសា ថា គិតមកដល់បច្ចុប្បន្ននេះ នៅទូទាំងរាជធានីភ្នំពេញមានអគារខ្ពស់ៗចាប់ពី៥ជាន់ឡើងទៅសរុបប្រមាណ៩៩៦អគារ ក្នុងនោះខណ្ឌចំនួន៤មានអគារខ្ពស់ច្រើនជាងគេគឺ ខណ្ឌចំការមន, ខណ្ឌទួលគោក, ខណ្ឌដូនពេញ និងខណ្ឌសែនសុខ ។
លោកបន្តថា ៖« ខណ្ឌទាំង៤ខាងលើនេះមានសក្តានុពលសេដ្ឋកិច្ចខ្ពស់ ដែលមានវិនិយោគិនជាច្រើនមើលឃើញចំណុចល្អក្នុងការបោះទុនវិនិយោគ ទើបមានការសាងសង់អគារខ្ពស់ច្រើនជាងខណ្ឌផ្សេងទៀត » ។
អ្នកជំនាញអចលនទ្រព្យដែលទទួលស្គាល់ពីអន្តរជាតិ ក៏យល់ស្របនឹងការលើកឡើងរបស់មន្ត្រីរាជរដ្ឋាភិបាលផងដែរ ដោយអះអាងថា ខណ្ឌទាំង៤នេះពិតជាសម្បូរដោយសំណង់អគារខ្ពស់ៗច្រើនជាងគេ ដោយសារតែខណ្ឌទាំងនេះ មានសកម្មភាពសេដ្ឋកិច្ចច្រើន និងដង់ស៊ីតេប្រជាពលរដ្ឋរស់នៅច្រើន ។
លោក វ៉ា វីរៈ នាយកប្រតិបត្តិក្រុមហ៊ុន Century 21 Fortuna Investment លើកឡើងថា ខណ្ឌចំការមន ទួលគោក ដូនពេញ និងខណ្ឌសែនសុខ នេះ បច្ចុប្បន្ន ពិតជាសម្បូរអគារខ្ពស់ជាងគេក្នុងចំណោមខណ្ឌទាំង១២នៃរាជធានីភ្នំពេញ ក៏ដូចជានៅទូទាំងប្រទេសកម្ពុជា ។
លោកថា ៖« ការសាងសង់អគារខ្ពស់នេះ វាស្ថិតនៅតំបន់ដែលគេធ្វើការ មានទាំងសាលារៀន មន្ទីរពេទ្យ ឬការងារផ្សេងៗជាច្រើនទៀត។ តួយ៉ាង នៅខណ្ឌចំការមន ដោយសារមានជនបរទេស ឬប្រជាពលរដ្ឋប្រមូលផ្តុំរស់នៅច្រើន ហើយតម្លៃដីថ្លៃ ទើបធ្វើឱ្យមានការសាងសង់អគារខ្ពស់ៗ ដើម្បីឱ្យការគិតតម្លៃជាម៉ែត្រការ៉េធូរថ្លៃនៅពេលសាងសង់រួច » ។
លោក វ៉ា វីរៈ បន្តថា ៖« ក្នុងក្រុងភ្នំពេញ ពេលមានអគារខ្ពស់ៗផុសឡើងច្រើន វាមានចំណុចល្អ និងមិនល្អ ។ ចំណុចល្អ បង្ហាញឱ្យអ្នកវិនិយោគផ្សេងៗមានភាពជឿជាក់ក្នុងការវិនិយោគនៅក្នុងប្រទេស, បង្ហាញពីសេដ្ឋកិច្ចរីកចម្រើន និងមានសក្តានុពល ជាដើម។ ទីក្រុងនៃប្រទេសណាដែលមានអគារខ្ពស់ៗ គេដឹងថា ទីក្រុងហ្នឹង ឬប្រទេសហ្នឹង មានការរីកចម្រើនច្រើន ។ អីចឹង កាន់តែទាក់ទាញអ្នកវិនិយោគបរទេសឱ្យរឹតតែមានភាពជឿជាក់ ហើយនេះជាចំណុចសំខាន់ ។ ដោយឡែក ចំណុចមិនល្អនៅពេលមនុស្សប្រមូលផ្តុំរស់នៅច្រើន ហើយផ្លូវយើងតូចពិបាក នៅពេលធ្វើដំណើរម្តងៗ គឺមានការស្ទះចរាចរណ៍ច្រើន ពិសេសនៅម្តុំក្បែរអគារខ្ពស់ៗ ។ អគារខ្ពស់ៗរីកចម្រើន ប៉ុន្តែលទ្ធភាពនៃការពង្រីកផ្លូវ ឬដោះស្រាយចំណុចផ្លូវ នៅមានកំណត់ ពិសេសការពង្រីកផ្លូវឱ្យស្របទៅនឹងកំណើនរបស់ប្រជាជន និងមធ្យោបាយធ្វើដំណើរក្នុងតំបន់នោះវាអត់មាន»។
វិស័យអចលនទ្រព្យត្រូវបានរំពឹងថា នឹងនៅតែមានកំណើនរឹងមាំក្នុងរង្វង់៨,៥%ក្នុងឆ្នាំ២០១៨ និងឆ្នាំ២០១៩ ដែលមាននិន្នាការស្របគ្នាទៅនឹងវិស័យសំណង់ ។ កំណើននេះនឹងត្រូវទ្រទ្រង់ដោយការកើនឡើងនៃសកម្មភាពទិញ-លក់សំណង់អគារពាណិជ្ជកម្ម និងលំនៅឋានដែលមានតម្លៃទាបនិងមធ្យម ដែលប៉ះប៉ូវដល់ការថមថយនៃប្រតិបត្តិការទិញ-លក់ និងជួលលំនៅឋានតម្លៃខ្ពស់ ដោយសារកំណើនខ្លាំងនៃការផ្គត់ផ្គង់ធៀបនឹងតម្រូវការ ។
យោងតាមរបាយការណ៍ប្រចាំឆ្នាំរបស់ក្រសួងរៀបចំដែនដី នគរូបនីយកម្ម និងសំណង់ ក្នុងឆ្នាំ២០១៧ បង្ហាញថា ទិន្នន័យសំណង់ទូទាំងប្រទេស មានចំនួនសរុប៣.០៥២គម្រោង មានផ្ទៃក្រឡាជាង១០លានម៉ែត្រការ៉េ ដែលមានតម្លៃប៉ានស្មានទុនវិនិយោគប្រមាណ៦,៤ពាន់លានដុល្លារ បើធៀបនឹងរយៈពេលដូចគ្នាឆ្នាំ២០១៦ មានចំនួន២.៤០៥គម្រោង មានផ្ទៃក្រឡាសាងសង់សរុប១១លានម៉ែត្រការ៉េ មានតម្លៃប៉ាន់ស្មានទុនវិនិយោគប្រមាណ៥ពាន់លានដុល្លារ ពោលគឺកើនឡើងចំនួន២២,៣១% ៕
ចែករំលែកព័តមាននេះ