ខេត្តព្រះសីហនុ ៖ តាមការកត់សម្គាល់សំរាមគរទុកចោលយូរថ្ងៃនៅតាមចិញ្ចើមផ្លូវ ហើយគ្មានរថយន្តក្រុមហ៊ុនមកប្រមូលឲ្យបានទៀងទាត់ ឬទាន់ពេល នេះគឺកំពុងរង់ការរិះគន់ពីសំណាក់ប្រជាពលរដ្ឋរស់ទីប្រជុំជនក្នុងក្រុងព្រះសីហនុ និងភ្ញៀវទេសចរជាបន្តបន្ទាប់ព្រោះបានជះក្លិនស្អុយអសោចដល់អ្នកដំណើរឆ្លងកាត់ និងពលរដ្ឋរស់នៅក្នុងមូលដ្ឋាននេះ ។
ប្រភពពីភ្ញៀវទេសចរជាតិ–អន្តរជាតិ ពិសេសប្រជាពលរដ្ឋរស់នៅក្រុងព្រះសីហនុ ដែលជាទីក្រុងស្អាត ទើបទទួលជ័យលាភីផ្ការំដួល៣ទងពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឆ្នាំ២០១៨នេះ បានបន្តរិះគន់រដ្ឋបាលក្រុង-ខេត្តព្រះសីហនុ នៅក្រោយពិធីបុណ្យចូលឆ្នាំថ្មីឆ្នាំនេះ ថាមិនទាន់អាចគ្រប់គ្រងកាកសំណល់សំរាមឲ្យបានល្អទេ ។ ស្របពេលជាមួយគ្នានោះភ្ញៀវទេសចរជាតិ និងអន្តរជាតិបានបង្ហាញការហួសចិត្ត និងបានបញ្ចេញទស្សនថា មិនគួរណាកាកសំណល់សំរាមត្រូវគេគរទុកចោលគ្មានរបៀបរៀបរយ និងជះក្លិនស្អុយអសោចនៅតាមទីសាធារណៈ ឬតាមចិញ្ចើមផ្លូវធ្វើដំណើរនាទីប្រជុំជនក្រុងទេសចរណ៍ជាប់ឆ្នេរសមុទ្រមួយនេះទេ ។
ចំណែកប្រជាពលរដ្ឋរស់នៅក្នុងក្រុងព្រះសីហនុភាគច្រើន ក៏បានរិះគន់ថ្នាក់ដឹកនាំស្ថាប័នពាក់ព័ន្ធ ដែលជាអ្នកទទួលខុសត្រូវការងារប្រមូលសំរាមរួមមាន ៖ ក្រុមហ៊ុនប្រមូលសំរាម ពិសេសថ្នាក់ដឹកនាំនៃរដ្ឋបាលក្រុង–ខេត្តព្រះសីហនុ ដែលមិនទាន់អាចគ្រប់គ្រងកាកសំណល់សំរាម ដែលប្រជាពលរដ្ឋបានវេចខ្ចប់ និងយកទៅគរទុកនៅតាមមុខផ្ទះ ឬទីតាំងនីមួយៗ ប៉ុន្តែមិនមានរថយន្តក្រុមហ៊ុនប្រមូលសំរាមមកដឹក ឬប្រមូលសំរាមឲ្យបានទាន់ទេ ។ ប្រជាពលរដ្ឋភាគច្រើនបានរអ៊ូរទាំ និងរិះគន់ក្រុមហ៊ុនប្រមូលសំរាមដែលទើបទទួលសិទ្ធថ្មី ដើម្បីប្រមូលសំរាម នាទីប្រជុំជនក្រុងព្រះសីហនុ ជំនួសឲ្យក្រុមហ៊ុនស៊ិនទ្រី ដែលត្រូវបញ្ចប់កុងត្រាថា មិនទាន់មានលទ្ធភាព ឬខ្វះបទពិសោធន៍ក្នុងការងារប្រមូលសំរាមទេ ហើយសំរាមត្រូវគេទុកចោលយូរថ្ងៃនៅតាមចិញ្ចើមផ្លូវថ្នល់ និងជះក្លិនស្អុយ ។ បញ្ហាសំរាមនេះដែរ ប្រជាពលរដ្ឋនៅតាមគ្រួសារខ្លះ បានចំអក និងប្រដូចការទុកកាកសំណល់សំរាមគរចោលនៅតាមចិញ្ចើមផ្លូវ និងមានក្លឹនស្អុយរាល់ថ្ងៃនេះ ជាពិសេសកាកសំណល់សំរាមដែលត្រូវគេគរទុកចោល នៅក្រោយពិធីបុណ្យចូលឆ្នាំថ្មីបានបញ្ចប់នេះ ស្ទើរក្លាយទៅជាទីតាំងពិព័រណ៍សំរាម ដើម្បីស្វាគមន៍ភ្ញៀវទេសចរជាតិ–អន្តរជាតិ ចូលមកទស្សនាអញ្ចឹងដែរ ៕
ភ្ញៀវទេសចរខ្លះទៀតបង្ហាញការហួសចិត្តថា មិនគួរណាក្រុងព្រះសីហនុ ដែលទើបជាប់ចំណាត់ថ្នាក់ទីក្រុងស្អាត ហើយឈ្នះជ័យលាភីទទួលបានផ្ការំដួល៣ទងពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឆ្នាំ២០១៨នេះ ប៉ុន្តែបែរជាជាក់ស្តែងបរិស្ថាននៅក្នុងទីក្រុងទាំងមូលគឺគ្មានអនាម័យ ដោយកាកសំណល់សំរាម ត្រូវគេទុកចោលយូរថ្ងៃគ្មានសណ្តាប់ធ្នាប់នៅតាមចិញ្ចើមផ្លូវសាធារណៈ និងមានក្លឹនស្អុយបែបនេះទៅវិញ ។
យ៉ាងណាក៏ដោយចុះ ទាំងប្រជាពលរដ្ឋរស់នៅក្នុងក្រុងព្រះសីហនុ និងភ្ញៀវទេសចរជាតិបានសំណូមពរដល់អភិបាលក្រុង–ខេត្តព្រះសីហនុ ស្នើឲ្យជួយជំរុញទៅក្រុមហ៊ុនប្រមូលសំរាម ឲ្យបន្តសកម្មភាពចុះប្រមូលសំរាម នៅតាមទីសាធារណៈ ឬតាមផ្លូវសំខាន់ៗ ដែលភ្ញៀវទេសចរនិយមធ្វើដំណើរឆ្លងកាត់ឲ្យបានជាប្រចាំ ដោយមិនត្រូវទុកឲ្យកាកសំណល់សំរាមគរទុកចោលច្រើនថ្ងៃ និងមានជះក្លិនស្អុយដូចរាល់ថ្ងៃនេះទៀតទេ ។
ទាក់ទិនបញ្ហានេះ មន្ត្រីរដ្ឋបាលក្រុងខេត្តព្រះសីហនុ បានឲ្យដឹងថា បញ្ហាសំរាមនេះ អាជ្ញាធរពាក់ព័ន្ធបានយកក្រុងព្រះសីហនុ-ក្រោយមានសំណូមពរពីពលរដ្ឋអំពីបញ្ហាសំរាម នាព្រឹកថ្ងៃទី២០ ខែមេសា ២០១៨ នេះ លោក អ៊ី សុខឡេង អភិបាលក្រុងព្រះសីហនុ បានចាត់មន្ត្រីសាលាក្រុង សហការណ៍ជាមួយខាងក្រុមហ៊ុនប្រមូលសំរាម និងខាងគណកម្មការផ្សារលើចុះពិនិត្យដើម្បីដោះស្រាយ ។
ក្នុងនោះយោងតាមសំណើររបស់ពលរដ្ឋដែលមានលំនៅដ្ឋានជាប់ផ្លូវខាងក្រោយផ្សារដែលស្នើសុំឲ្យមានការផ្លាស់ប្តូរទីតាំងស្តុកសំរាម ឬដាក់ស្តុកក្នុងកុងតឺន័រ មុនដឹកចេញដោយសំអាងហេតុផលថា ស្អុយប៉ះពាល់បរិស្ថានពិបាករស់នៅនោះ ទាំងមន្ត្រីសាលាក្រុង ទាំងខាងក្រុមហ៊ុនប្រមូលសំរាម និងទាំងខាងគណកម្មការផ្សារលើ បានទទួលយកសំណូមពរនេះទៅពិនិត្យដោះស្រាយ ។ ជាមួយគ្នានេះខាងគណកម្មការផ្សារលើបានបញ្ជាក់បន្ថែមថា ករណីសំរាមក្រោយផ្សារកន្លងមក មិនមែនមានតែសំរាមរបស់អ្នកលក់ដូរក្នុងផ្សារទេ ក្នុងនោះមួយផ្នែកក៏មានពលរដ្ឋនៅខាងក្រៅផ្សារលបលួចយកមកបោះចោលនៅខាងក្រោយផ្សារនេះដែរ ដែលបង្កជាការលំបាកគ្រប់គ្រង ។
ជាមួយគ្នានេះផងដែរ លោក អ៊ី សុខឡេង អភិបាលក្រុងព្រះសីហនុបានបញ្ជាក់ថា បញ្ហាសំរាមនេះលោកទទួលបានព័ត៌មានជាច្រើនពីសំណាក់បងប្អូនប្រជាពលរដ្ឋ និងបណ្តាញសារព័ត៌មាន ហើយលើកបាននឹងកំពុងដុតដៃដុតជើងយ៉ាងខ្លាំង ដោយបានជំរុញឲ្យក្រុមហ៊ុនសម្រាមថ្មី ត្រូវធ្វើយ៉ាងណាប្រមូលសំរាមឲ្យបានទៀងទាត់នៅតាមទីតាំងសំខាន់ៗ និងផ្លូវភូមិប្រជាពលរដ្ឋ ប៉ុន្តែក្រុមហ៊ុនបានឆ្លើយថា មូលហេតុដោយដែលបញ្ហាសំរាមមានកកស្ទះនេះ ដោយសារកត្តាក្រុមហ៊ុនខ្វះកម្លាំងពលកម្ម ព្រោះរដូវចូលឆ្នាំថ្មី ហើយទីលានផ្ទេរសម្រាមនូវមិនទាន់ធ្វើរួចរាល់ ឯរថយន្តដែលក្រុមហ៊ុនបញ្ជាទិញមិនទាន់មកដល់ ដូចនេះគឺមានការខ្វះបន្តិចមិនទាន់អាចបំពេញតម្រូវការបាន១០០%នោះទេ ៕
ចែករំលែកព័តមាននេះ