រាជធានីភ្នំពេញ ៖ បុរសជាកម្មករចល័តម្នាក់ដែលជាអ្នកដេរ បានជិះម៉ូតូ១គ្រឿងចេញពីផ្ទះជួល ដើម្បីទៅធ្វើការ ប៉ុន្តែពេលចេញផុតពីផ្ទះមិនទាន់ឃើញមេក្រុមមកដល់បុរសនោះ បានអង្គុយរង់ចាំមេក្រុមសិន ។ ប៉ុន្តែខណៈពេលកំពុងអង្គុយរង់ចាំមេ ស្រាប់តែមានជនសង្ស័យម្នាក់ជិះម៉ូតូ១គ្រឿងទៅដល់បានសួរនាំរួចបបួលទៅធ្វើការជាមួយដោយសន្យាបានប្រាក់ឈ្នួលច្រើន ។ តែមានអីល្បួងនាំទៅលេងបុកប៊ីយ៉ា រហូតចាញ់អស់ ហេតុការណ៍កើតឡើងកាលពីវេលាម៉ោង៨និង១៥នាទីព្រឹក ថ្ងៃទី២០ មេសា ឆ្នាំ២០១៨ នៅកន្លែងបុកប៊ីយ៉ា ស្ថិតនៅក្នុងផ្សារវិនមីង ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ ។
បុរសដែលចាញ់ល្បិចគាបស៊ីរបស់ជនខិលខូចនោះឈ្មោះ ថា វន្នី អាយុ២៦ឆ្នាំ មុខរបរកម្មកររោងចក្រ មានស្រុកកំណើត នៅក្នុងភូមិជម្ពូ ឃុំចក ស្រុកអូរាំងអូវ ខេត្តកំពុងចាម ។ ស្នាក់នៅភូមិដីថ្មី សង្កាត់ស្ទឹងមានជ័យ ខណ្ឌមានជ័យ ។ ដែលបានយកម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៦ពណ៌ខ្មៅទៅបញ្ចាំបានចំនួន៦៦០ដុល្លារ ។ ចំណែកជនសង្ស័យឈ្មោះ សុខ សាអ៊ែល អាយុ៣៣ឆ្នាំ មានទីលំនៅភូមិព្រែកអុង ឃុំស្វាយយារ ស្រុកស្វាយជ្រុំ ខេត្តស្វាយរៀង និងស្នាក់នៅផ្ទះជួលភូមិត្រពាំងថ្លឹង១ សង្កាត់ចោមចៅ១ ។
ចំណែកម្នាក់ទៀតបានយកលុយជនរងគ្រោះបញ្ចាំម៉ូតូ៦៦០ដុល្លារនោះ រត់គេចខ្លួនបាត់ស្រមោល ។
តាមប្រភពព័ត៌មានបានឲ្យដឹងថា នៅមុនពេលកើតហេតុជនរងគ្រោះបានជិះម៉ូតូចេញពីផ្ទះជួល ដើម្បីទៅធ្វើការដេរស៊ីថ្ងៃចល័ត ប៉ុន្តែដោយសារតែពេលនោះមេក្រុមមិនទាន់ទៅដល់បុរសនេះ បាននៅអង្គុយរង់ចាំមេសិន ។
លុះមួយសន្ទុះក្រោយមកស្រាប់តែលេចមុខជនសង្ស័យម្នាក់ទៅដល់ ហើយបានសួរនាំជនរងគ្រោះ និងទំនាក់ទំនងគ្នា ដោយជនសង្ស័យបានប្រើល្បិចបបួលជនរងគ្រោះទៅធ្វើការជាមួយដោយប្រាប់ថា បានប្រាក់ឈ្នួលក្នុង១ថ្ងៃ៥ម៉ឺនរៀល ។ បន្ទាប់ពីឮបែបនេះ ជនរងគ្រោះអរណាស់ព្រោះ ការងារមានប្រាក់ខែច្រើនបែបនេះ ហើយក៏បានយល់ព្រមទៅជាមួយជនសង្ស័យ ។
ប្រភពដដែលបានបន្តទៀតថា ពេលនោះជនសង្ស័យបាននាំជនរងគ្រោះទៅអង្គុយផឹកកាហ្វេនៅកន្លែងបុកវ៊ីយ៉ាខាងលើ ។ បន្ទាប់មកបានល្បួងឲ្យលេងដោយមុនដំបូងដាក់១ដៃ ត្រឹម១ពាន់រៀលប៉ុណ្ណោះ លុះយូរៗទៅ១ម៉ឺនរៀល ហើយជនរងគ្រោះបានលេងឈ្នះរហូត ។ លុះបន្ទាប់មកទៀតបានឡើងដល់១០០ដុល្លារក្នុង១ដៃទើបរូបគេចាញ់រហូតអស់ចំនួ៧០០ដុល្លារ ចិញ្ចៀន១វង់ និងទូរស័ព្ទដៃ១គ្រឿង ពេលនោះជនសង្ស័យបាននាំរូបគេយកម៉ូតូ១គ្រឿងទៅបញ្ចាំ ម្ដុំសង្កាត់ទឹកល្អក់ ខណ្ឌទួលគោក បានលុយ៦៦០ដុល្លារ ។
បន្ទាប់មកជនសង្ស័យម្នាក់បានយកលុយនោះគេចខ្លួនបាត់នៅសល់ម្នាក់ទៀតប្រុងគេចខ្លួន តែត្រូវជនរងគ្រោះភ្ញាក់ខ្លួនទាន់ចាប់ខ្លួនប្រគល់ជូននគរបាលចាត់ការតាមច្បាប់តែម្ដង ៕
ចែករំលែកព័តមាននេះ