ខេត្តស្ទឹងត្រែង ៖ ក្នុងរយៈពេល៣ថ្ងៃនៃពិធីបុណ្យចូលឆ្នាំថ្មីប្រពៃណីខ្មែរកន្លងមកនេះ ខេត្តស្ទឹងត្រែងបានទាក់ទាញភ្ញៀវទេសចរមកកម្សាន្តសរុបជាង៤មឺុននាក់ ដែលបានផ្តល់ចំណូលដល់ខេត្ត ខណៈខេត្តនេះមានរមណីយដ្ឋានធម្មជាតិ និងតំបន់សហគមន៍អេកូទេសចរណ៍ ដែលមានសក្ដានុពលយ៉ាងច្រើន ។
លោក ប៉ាន ទិត្យ មកពីស្រុកកងមាស ខេត្តកំពង់ចាម និយាយថា នេះគឺជាលើកទី២ហើយ ដែលលោកបាននាំក្រុមគ្រួសារមកកម្សាន្ដនៅតំបន់រមណីយដ្ឋានធម្មជាតិដ៏ប្រណីតតាមដងទន្លេក្នុងខេត្ត នៃភូមិភាគឦសានមួយនេះ ។ លោកថា ៖« កត្តាដែលធ្វើឲ្យក្រុមគ្រួសារលោកជាប់ចិត្តមកលេងម្ដងហើយម្តងទៀតនោះ ដោយសារតែតំបន់ទេសចរណ៍ក្នុងខេត្តស្ទឹងត្រែងមានការរៀបចំទទួលភ្ញៀវបានល្អ ទាំងសេវាកម្ម សន្តិសុខ សណ្ដាប់ធ្នាប់ និងបរិស្ថាន ជាពិសេស នៅក្នុងរមណីយដ្ឋាននីមួយៗមានដើមឈើផ្ដល់ម្លប់យ៉ាងត្រជាក់ និងខ្យល់អាកាសបរិសុទ្ធហ៊ុមព័ទ្ធដោយផ្ទៃទឹកថ្លាផងដែរ » ។
ប្រធានមន្ទីរទេសចរណ៍ខេត្ត លោក អ៊ន់ ប៉ោសឿន បានឲ្យដឹងថា ក្នុងឱកាសបុណ្យចូលឆ្នាំថ្មីប្រពៃណីខ្មែររយៈពេល៣ថ្ងៃកន្លងមកនេះ ខេត្តស្ទឹងត្រែងទទួលបានភ្ញៀវទេសចរសរុបជាង៤មឺុននាក់ កើនឡើង៥% ហើយបើគិតពីមធ្យមភាគ ភ្ញៀវទេសចរបានចំណាយប្រាក់ត្រឹម២០ដុល្លារ ។ ដូច្នេះ ប្រភពចំណូលដែលបានទៅវិស័យឯកជន អាចទទួលបានជាង៨សែនដុល្លារអាមេរិក ។ ប្រភពចំណូលទាំងនេះបានមកពីការលក់សំបុត្រចូលកម្សាន្ត, កន្លែងផ្ញើរថយន្តនិងម៉ូតូ, ការលក់ចំណីអាហារ, សេវាកម្មផ្ទះសំណាក់-សណ្ឋាគារ, ក្លិបកម្សាន្ត និងអាងហែលទឹក ជាដើម ។
លោកមានប្រសាសន៍ថា ៖« កំណើននៃភ្ញៀវទេសចរច្រើននៅឆ្នាំនេះ ដោយសារតំបន់រមណីយដ្ឋានមួយចំនួនមានការកើនឡើង ដែលភ្ញៀវមកដល់មិនខ្វះកន្លែងកម្សាន្តឡើយ ។ នៅឆ្នាំក្រោយរំពឹងថា នឹងមានកំណើនច្រើនជាងឆ្នាំនេះទៀត ហើយមន្ទីរនឹងខិតខំប្រឹងប្រែងដើម្បីរកដៃគូអភិវឌ្ឍន៍សម្រាប់ទទួលភ្ញៀវទេសចរបន្ថែម » ៕
ចែករំលែកព័តមាននេះ