រាជធានីភ្នំពេញ ៖ ខេត្តកំពត និងកែប នៅតែរក្សាកំណើនភ្ញៀវទេសចរបានយ៉ាងល្អ និងកើនឡើងជាលំដាប់នៅដើមឆ្នាំ២០១៨នេះ ជាពិសេស រយៈពេល៣ថ្ងៃនៃពិធីបុណ្យចូលឆ្នាំប្រពៃណីជាតិខ្មែរ ។
បើតាមអនុប្រធានមន្ទីរទេសចរណ៍ខេត្តកែប លោក ប៉ុក ទាំង បានឲ្យដឹងកាលពីព្រឹកថ្ងៃទី១៩ មេសាថា រយៈពេល៣ថ្ងៃ (ថ្ងៃទី១៤ ដល់១៦ ខែមេសា ឆ្នាំ២០១៨) ភ្ញៀវទេសចរជាតិ និងអន្តរជាតិ ដែលបានមកកម្សាន្តនៅខេត្តកែប សរុបទាំងអស់មានចំនួន១៣១.៨២៨នាក់ បើធៀបនឹងឆ្នាំ២០១៧ កើនឡើង៧,៨៥% ។ ក្នុងនោះភ្ញៀវជាតិមាន១២៩.១៩១នាក់ កើនឡើង៧,៨១% និងភ្ញៀវអន្តរជាតិមាន២.៦៣៧នាក់ កើនឡើង១០% ។
លោកបន្តថា រមណីយដ្ឋាន និងគោលដៅទាក់ទាញភ្ញៀវទេសចរសរុបទូទាំងខេត្តមានចំនួន៣៥កន្លែង ។ ក្នុងនោះរមណីយដ្ឋានបែបវប្បធម៌មាន៦កន្លែង, រមណីយដ្ឋានធម្មជាតិ២៤កន្លែង និងរមណីយដ្ឋានកែច្នៃ៥កន្លែង (មានលក្ខណៈឯកជន៣កន្លែង) ។
លោកអនុប្រធានបន្តថា ៖« ក្នុងចំណោមរមណីយដ្ឋានទាំងនោះ ភាគច្រើននៃភ្ញៀវទេសចរទៅទស្សនាមានដូចជា ឆ្នេរលេងទឹក កោះទន្សាយ ផ្សារក្ដាម ឆ្នេរថ្មីវាលលំហែជ្រោយដូង ឧទ្យានជាតិ សួនមេអំបៅ ភ្នំវល្លិចម្ការម្រេច វត្តភ្នំសរសៀរ ឆ្នេរអង្កោល ព្រៃកោងកាង និងស្រែអំបិល » ។
ដោយឡែក សម្រាប់ខេត្តកំពតវិញ ភ្ញៀវទេសចរដែលមកកម្សាន្តក្នុងឱកាសពិធីបុណ្យចូលឆ្នាំប្រពៃណីខ្មែរ សរុបទាំងអស់ចំនួន១៣៤.៩៣០នាក់ កើនឡើង៤៥,២១% បើធៀបនឹងរយៈពេលដូចគ្នាកាលពីឆ្នាំ២០១៧។ ការកើនឡើងនេះ ដោយសារតែខេត្តកំពតមានតំបន់ទេសចរណ៍ជាច្រើនកន្លែង ជាពិសេស ខេត្តបានរៀបចំព្រឹត្តិការណ៍អង្គរសង្ក្រាន្តជាលើកដំបូងសម្រាប់បងប្អូនមកកម្សាន្ត ។
លោក សយ ស៊ីណុល ប្រធានមន្ទីរទេសចរណ៍ខេត្តកំពត បានប្រាប់ថា សម្រាប់ខេត្តកំពត គឺមានរមណីយដ្ឋានចំនួន១៧កន្លែងដែលភ្ញៀវគាត់ចូលចិត្តទៅកម្សាន្ត ។ ក្នុងនោះរមណីយដ្ឋានភ្នំបូកគោ និងតំបន់ទឹកឈូ មានភ្ញៀវចូលទៅទស្សនាច្រើនជាងគេ ។
លោកថា ៖« គ្រប់ស្ថានភាពទូទៅនៃពិធីបុណ្យចូលឆ្នាំប្រពៃណីខ្មែរ គឺប្រព្រឹត្តទៅដោយរលូនប្រកបដោយភាពសប្បាយរីករាយគ្រប់គោលដៅទេសចរណ៍ទាំងអស់ ជាពិសេស នៅតាមតំបន់ទឹកឈូ មានភ្ញៀវសរុប៥១.៤៧១នាក់ កើនឡើង៤៨,៨៣% និងរមណីយដ្ឋានភ្នំបូកគោ មានចំនួន៤៥.៣២៧នាក់ កើន២៥,៦៦% » ។
លោកបន្តថា ៖« តាមរយៈការសិក្សាកន្លងមក ភ្ញៀវក្នុងស្រុកចំណាយប្រមាណ៥០ដុល្លារអាមេរិកក្នុង១នាក់ និងភ្ញៀវអន្តរជាតិចំណាយអស់ប្រមាណ៩៩ដុល្លារអាមេរិកក្នុង១នាក់ » ។
លោក ជាវ តាយ អភិបាលខេត្តកំពត បានថ្លែងថា ដើម្បីបំពេញតម្រូវការរបស់បងប្អូនដែលបានមកទស្សនាក្នុងខេត្តទេសចរណ៍បែបវប្បធម៌ និងធម្មជាតិមួយនេះឲ្យកាន់តែច្រើនថែមទៀត ខេត្តនៅតែបន្តការរៀបចំកម្មវិធីអង្គរសង្ក្រាន្តបន្តទៀត ជាពិសេស ខេត្តបាននិងកំពុងបង្កើតឆ្នេរខ្សាច់បន្ថែមសម្រាប់ឲ្យភ្ញៀវទេសចរគយគន់ទេសភាពនៅជុំវិញតំបន់នៃខេត្តមួយនេះ ។
លោកថ្លែងថា ៖« ខេត្តកំពតមានរមណីយដ្ឋានចំនួន១៧កន្លែង ។ ដោយឡែក សព្វថ្ងៃនេះ យើងពុំទាន់មានឆ្នេរសម្រាប់ឲ្យភ្ញៀវទេសចរមកអង្គុយលេងកម្សាន្តទេ ។ អីចឹង ខេត្តនឹងមានគម្រោងមួយដើម្បីពិនិត្យមើលលទ្ធភាព និងទីតាំង ធ្វើយ៉ាងម៉េច ត្រូវបង្កើតឆ្នេរសម្រាប់ឲ្យប្រជាពលរដ្ឋ និងភ្ញៀវតាមបណ្ដាខេត្តផ្សេងមកទស្សនាក្នុងខេត្តមួយនេះ » ។
លោកបន្ថែមថា ក្រោយពីយើងរៀបចំឲ្យបានល្អប្រសើរ មានកន្លែងស្នាក់នៅល្អៗ រមណីយដ្ឋានស្អាតៗ និងមានឆ្នេរសម្រាប់ងូតទឹក ជាដើម អីចឹង ភ្ញៀវទេសចរនឹងមកកម្សាន្តកាន់តែច្រើនថែមទៀត ដែលអាចធ្វើឲ្យប្រជាពលរដ្ឋនៅតំបន់នេះមានការងារច្រើនជាងមុន និងកាត់បន្ថយការចំណាកស្រុកបានមួយ
កម្រិត ។
ដោយសារភ្ញៀវទេសចរចូលមកកម្សាន្តនៅខេត្តកំពតកើនឡើងជាហូរហែ មន្ទីរទេសចរណ៍ខេត្តនឹងបន្តជំរុញអភិវឌ្ឍន៍ផលិតផលទេសចរណ៍ថ្មីៗ, ជំរុញការបណ្តុះបណ្តាលសំដៅពង្រឹងគុណភាពសេវាកម្ម, ជំរុញការអនុវត្តស្តង់ដាក្នុងឧស្សាហកម្មទេសចរណ៍ និងជំរុញការផ្សព្វផ្សាយឲ្យបានខ្លាំងក្លាបន្ថែមទៀត ។
គួររំឭកថា គិតត្រឹមត្រីមាសទី១ ឆ្នាំ២០១៨ ភ្ញៀវសរុបសម្រាប់ខេត្តកំពត គឺមានចំនួន៤៤៨.១៦១នាក់ កើនឡើង១៦,៦២% បើធៀបនឹងត្រីមាសទី១ ឆ្នាំ២០១៧ មានចំនួន៣៨៤.២៦៣នាក់ ។ ក្នុងនោះទេសចរក្នុងស្រុកមានចំនួន៣៩៣.៨៧៦នាក់ កើនឡើង១៤,១៥% បើធៀបនឹងត្រីមាសទី១ ឆ្នាំ២០១៧ មានចំនួន៣៤៥.០៣៦នាក់ ។ ភ្ញៀវទេសចរអន្តរជាតិ៥៤.២៨៥នាក់ កើនឡើង៣៨,៣៨% បើធៀបនឹងត្រីមាសទី១ ឆ្នាំ២០១៧ មានចំនួន៣៩.២២៧នាក់ ៕
ចែករំលែកព័តមាននេះ