រាជធានីភ្នំពេញ ៖ ស្ថាប័នហិរញ្ញវត្ថុអន្តរជាតិធំៗពីរប្រចាំកម្ពុជា គឺធនាគារអភិវឌ្ឍន៍អាស៊ី ហៅកាត់ថា(ADB) និងធនាគារពិភពលោក (WB) បានបង្ហាញពីរបាយការណ៍របស់ខ្លួនពាក់ព័ន្ធនឹងកំណើនសេដ្ឋកិច្ចកម្ពុជាក្នុងឆ្នាំ២០១៨ និងឆ្នាំ២០១៩ ដោយក្នុងនោះ…
រាជធានីភ្នំពេញ ៖ ស្ថាប័នហិរញ្ញវត្ថុអន្តរជាតិធំៗពីរប្រចាំកម្ពុជា គឺធនាគារអភិវឌ្ឍន៍អាស៊ី ហៅកាត់ថា(ADB) និងធនាគារពិភពលោក (WB) បានបង្ហាញពីរបាយការណ៍របស់ខ្លួនពាក់ព័ន្ធនឹងកំណើនសេដ្ឋកិច្ចកម្ពុជាក្នុងឆ្នាំ២០១៨ និងឆ្នាំ២០១៩ ដោយក្នុងនោះ ADB បានព្យាករថា ក្នុងឆ្នាំ២០១៨ និង២០១៩ សេដ្ឋកិច្ចកម្ពុជាអាចរក្សាបានក្នុងរង្វង់៧% ដូចសេដ្ឋវិទូកម្ពុជាដែរ ខណៈធនាគារពិភពលោកបានទម្លាក់ការព្យាកររបស់ខ្លួនបន្ដិច ដោយបានបង្ហាញថា ក្នុងឆ្នាំ២០១៨ សេដ្ឋកិច្ចកម្ពុជាអាចនឹងមានកំណើន៦,៩% និងឆ្នាំ២០១៩ អាចថមនៅត្រឹម៦,៧% ។
ទោះជាយ៉ាងនេះក្ដី អ្វីដែលគួរឲ្យកត់សម្គាល់នោះ ស្ថាប័នទាំងពីរបញ្ជាក់ថា កំណើនសេដ្ឋកិច្ចកម្ពុជានៅតែរឹងមាំ អាស្រ័យទៅលើកត្តា និងវិស័យមួយចំនួនដូចជា វិស័យកាត់ដេរនៅតែមានចំណែកធំក្នុងកំណើនសេដ្ឋកិច្ច ឬផលិតផលក្នុងស្រុកសរុប ។ ដោយឡែក វិស័យសេវាកម្មក៏មានកំណើនគួរឲ្យកត់សម្គាល់ផងដែរនៅក្នុងចំណែកសេដ្ឋកិច្ចកម្ពុជា ។ ក្រៅពីនោះ វិស័យសំណង់ និងលំហូរទុនវិនិយោគពីខាងក្រៅប្រទេស ក៏ជាកត្តាសំខាន់មួយក្នុងការចូលរួមធ្វើឲ្យកំណើនសេដ្ឋកិច្ចកម្ពុជារក្សាបានភាពវិជ្ជមានផងដែរ ។
លោក Jan Hansen សេដ្ឋវិទូជាន់ខ្ពស់របស់ធនាគារអភិវឌ្ឍន៍អាស៊ីប្រចាំប្រទេសកម្ពុជា មានប្រសាសន៍ថា កំណើនសេដ្ឋកិច្ចដ៏រឹងមាំរបស់កម្ពុជាក្នុងរយៈពេលខ្លី បានមកពីការនាំចេញដ៏រឹងមាំ និងកំណើនលំហូរចូលនៃការវិនិយោគដោយផ្ទាល់ពីបរទេស, សកម្មភាពក្នុងវិស័យទេសចរណ៍ និងតម្រូវការក្នុងស្រុក ។ ទោះជាយ៉ាងណាក៏ដោយ ការកើនឡើងប្រាក់ឈ្នួល ភាពលំបាកក្នុងការធ្វើធុរកិច្ច និងភាពប្រកួតប្រជែងកាន់តែខ្លាំង អាចប៉ះពាល់ដល់ការប្រកួតប្រជែងរបស់កម្ពុជា ។
តាមរបាយការណ៍របស់ស្ថាប័នទាំងពីរ ក៏បានបង្ហាញពីភាពប្រទាក់ក្រឡាគ្នាលើសេដ្ឋកិច្ចកម្ពុជា និងបណ្ដាប្រទេសក្នុងតំបន់ផងដែរ បើសិនជាប្រទេសណាមួយក្នុងតំបន់ដែលមានឥទ្ធិពលមកលើកម្ពុជា វាក៏អាចធ្វើឲ្យកម្ពុជាទទួលរងនូវឥទ្ធិពលនោះ ។
លោកស្រី វិចតូរៀ ក្វាក្វា អនុប្រធានធនាគារពិភពលោក ប្រចាំតំបន់អាស៊ីបូព៌៌ា និងប៉ាស៊ីហ្វិក បានឲ្យដឹងថា កំណើនដែលរីកចម្រើនខ្លាំងនេះអាចជួយឲ្យតំបន់អាស៊ីបូព៌៌ា និងប៉ាស៊ីហ្វិកទទួលបានផលចំណេញធំធេងក្នុងការកាត់បន្ថយភាពក្រីក្រតោកយ៉ាក ហើយដើម្បីរក្សាភាពជោគជ័យនេះបង្កើនការរំពឹងទុកល្អសម្រាប់មនុស្សមួយភាគធំក្នុងចំណោមប្រជាពលរដ្ឋ ដែលមិនទាន់មានសន្តិភាពផ្នែកសេដ្ឋកិច្ចនៅឡើយ គេចាំបាច់ត្រូវតែរក្សាកំណើនសេដ្ឋកិច្ចប្រកបដោយចីរភាពក្នុងរយៈពេលវែងឆ្ងាយមួយ ។
ដោយឡែក លោក ស៊ុឌៀ សេតទី ប្រធានសេដ្ឋវិទូធនាគារពិភពលោក ប្រចាំតំបន់អាស៊ីបូព៌៌ា និងប៉ាស៊ីហ្វិក មានប្រសាសន៍ថា ដើម្បីដោះស្រាយជាមួយហានិភ័យចំពោះស្ថិរភាពម៉ាក្រូសេដ្ឋកិច្ច បណ្ដាប្រទេសក្នុងតំបន់ចាំបាច់ត្រូវពិចារណារឹតត្បិតគោលនយោបាយរូបិយវត្ថុ ហើយពង្រឹងបន្ថែមទៀតនូវការប្រយ័ត្នប្រយែងផ្នែកបទប្បញ្ញត្តិម៉ាក្រូសេដ្ឋកិច្ច ។
លោកថា ៖« ប្រការនេះសំខាន់ណាស់ ជាពិសេសនៅក្នុងបណ្ដាប្រទេសដែលបំណុលមានកម្រិតខ្ពស់ ឬកំណើនឥណទានខ្លាំងពេក ដែលធ្វើឲ្យវិស័យហិរញ្ញវត្ថុកាន់តែងាយមានភាពរងគ្រោះ នៅពេលដែលការប្រាក់ត្រូវបានដំឡើងនៅក្នុងប្រទេសសេដ្ឋកិច្ចជឿនលឿន » ។
ក្រុមសេដ្ឋវិទូនៃក្រសួងសេដ្ឋកិច្ច និងហិរញ្ញវត្ថុ នៅតែរំពឹងប្រកបដោយសុទិដ្ឋិនិយមថា ក្នុងឆ្នាំ២០១៨ និង២០១៩ សេដ្ឋកិច្ចកម្ពុជានឹងនៅបន្តកំណើនក្នុងរង្វង់ប្រមាណ៧,០% ដែលទ្រទ្រង់ដោយមូលដ្ឋានកំណើនស្រដៀងទៅនឹងឆ្នាំ២០១៧ដែរ ក្នុងនោះ មានវិស័យកសិកម្ម ឧស្សាហកម្ម និងសេវាកម្ម ពិសេសគឺអនុវិស័យកាត់ដេរ ទេសចរណ៍ សំណង់ ការលក់ដុំនិងរាយ ឧស្សាហកម្មមិនមែនកាត់ដេរ និងវិស័យដឹកជញ្ជូន និងទូរគមនាគមន៍ ជាដើម ខណៈអតិផរណានឹងបន្តស្ថិតក្នុងកម្រិតអាចគ្រប់គ្រងបានក្នុងអត្រា៣,៤%ក្នុងឆ្នាំ២០១៨ និង៣,១%ក្នុងឆ្នាំ២០១៩ ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានឲ្យដឹងថា េសដ្ឋកិច្ចរបស់កម្ពុជានឹងនៅតែបន្ដរឹងមាំ តែកម្ពុជាត្រូវពង្រីក និងបង្កើតកម្លាំងចលករថ្មីៗបន្ថែមទៀត ពិសេសការធ្វើទំនើបកម្មនៃក្បាលម៉ាស៊ីនសេដ្ឋកិច្ចឲ្យកាន់តែមានតម្លៃបន្ថែមខ្ពស់ ដើម្បីឲ្យសេដ្ឋកិច្ចមានចលនារស់រវើក និងលូតលាស់ថែមទៀត ។
លោក វង្សី វិស្សុត មានប្រសាសន៍ថា ៖« ដោយផ្អែកលើក្បាលម៉ាស៊ីនគាំទ្រកំណើនសេដ្ឋកិច្ចសំខាន់ៗ ហើយវិស័យសំខាន់ដែលគាំទ្រដល់កំណើននេះ គឺវិស័យឧស្សាហកម្ម សេវាកម្ម និងកសិកម្ម ។ ជាមួយគ្នានេះ កម្ពុជាមានទុនបម្រុងចំនួនប្រមាណ១០ពាន់លានដុល្លារអាមេរិក ដែលអាចធ្វើការគ្រប់គ្រងការនាំចូលបានចំនួនជាង៦ខែ ។ ដោយឡែក ចំណូលថវិកាជាតិនៅតែរឹងមាំ ពិសេសចំណូលពីសារពើពន្ធសម្រេចបានតាមផែនការគ្រោងទុក ខណៈការចាយវាយថវិកាជាតិ ថ្វីដ្បិតតែមានការពង្រីក តែរឹតត្បិតយ៉ាងខ្លាំង ។ ទាំងអស់នេះ សបញ្ជាក់ថា សេដ្ឋកិច្ចរបស់កម្ពុជាយើងនៅតែរឹងមាំ » ៕
ចែករំលែកព័តមាននេះ