ខេត្តកណ្ដាល ៖ បុរសម្នាក់មកពីចំការដល់ផ្ទះ ចុះងូតទឹកប្រឡាយខាងក្រោយផ្ទះ បាត់យូរពេកប្រពន្ធកូនតាមរកឃើញតែខោអាវនៅលើទូក ចុះរាវរកឃើញស្លាប់នៅក្នុងទឹក កាលពីម៉ោង០៥និង៣០នាទីរសៀល ថ្ងៃទី១៩ ខែមេសា ឆ្នាំ២០១៨ នៅចណុចក្នុងទឹកប្រឡាយខាងក្រោយផ្ទះ ស្ថិតនៅក្នុងភូមិ ព្រែកខ្នាច ឃុំលើកដែក ស្រុកកោះធំ ខេត្តកណ្តាល ។
មន្ត្រីនគរបាលស្រុកកោះធំបានឱ្យដឹងថា ជនរងគ្រោះឈ្មោះ ខូយ ឈុំ ភេទប្រុស អាយុ៥១ឆ្នាំ ជនជាតិខ្មែរ មុខរបរកសិករ មានទីលំនៅៗភូមិព្រែកខ្នាច ឃុំលើកដែក ស្រុកកោះធំ ខេត្តកណ្តាល ។ នគរបាលបានឱ្យដឹងបន្ថែមថា យោងតាមការឆ្លើយបំភ្លឺរបស់ឈ្មោះ មាន ស្រី ត្រូវជាប្រពន្ធជនរងគ្រោះ នឹងឈ្មោះ ឈុំ វណ្ណី ត្រូវជាកូនជនរងគ្រោះ បានឲ្យដឹងថា នៅវេលាម៉ោង០៥និង៣០នាទីល្ងាច ថ្ងៃទី១៩ ខែមេសា ឆ្នាំ២០១៨ ជនរងគ្រោះឈ្មោះ ខូយ ឈុំ បានត្រលប់មកពីធ្វើចំការវិញមកដល់ផ្ទះ ក៏បានប្រញាប់ចុះកំពង់ទឹកប្រឡាយខាងក្រោយផ្ទះ ។ ដោយបាត់ប្តី និងឪពុកយូរពេក ក៏ចុះមកមើលកំពុងទឹក ឃើញតែខោនៅលើក្បាលទូក មានការសង្ស័យក៍ចុះរាវក្នុងទឹកក៏ប្រទះឃើញជនរងគ្រោះនៅក្នុងទឹកក្បែរទូក ហើយចាប់លើកឡើងមកលើគោក តែជនរងគ្រោះបានស្លាប់បាត់ទៅហើយ ។ បានរាយការណ៍ជូនអាជ្ញាធរមានសមត្ថកិច្ច ។
បន្ទាប់ពីទទួលបានព័ត៌មាន កម្លាំងជំនាញអធិការដ្ឋាននគរបាលស្រុក ចុះទៅដល់កន្លែងកើតហេតុ រួចបានបង្កើតគណៈកម្មការមាន ប៉ុស្តិ៍រដ្ឋបាល អាជ្ញាធរមូលដ្ឋាន គ្រូពេទ្យ ផ្នែកជំនាញ និងក្រុមគ្រួសារជនរងគ្រោះ ដើម្បីធ្វើការពិនិត្យកន្លែងកើតហេតុ និងពិនិត្យសាកសព ឃើញថា ជនរងគ្រោះពុំមានស្លាកស្នាមអ្វីគួរឲ្យកត់សម្គាល់ពាក់ព័ន្ធនឹងករណីផ្សេងឡើយ គឺពិតជាជនរងគ្រោះលង់ទឹកស្លាប់ដោយខ្លួនឯងប្រាកដមែន ។ ក្រោយពីពិនិត្យចប់សព្វគ្រប់ សម្ថកិច្ចបានប្រគល់សាកសពជនរងគ្រោះជូនក្រុមគ្រួសារ ដើម្បីធ្វើបុណ្យតាមប្រពៃណី ៕
ចែករំលែកព័តមាននេះ