ខេត្តកណ្តាល ៖ ការផ្អើលឆោឡោបានកើតឡើង បន្ទាប់ពីការកាប់ប្រហារយ៉ាងរន្ធត់មួយ បានធ្វើឱ្យស្ត្រីរូបស្រស់វ័យក្មេងម្នាក់ដេកស្លាប់ក្នុងថ្លុកឈាម ហើយជនដៃដល់ក៏បានរត់គេចខ្លួនបាត់ដែរ ។ តាមព័ត៌មាន
ភ្លាមៗនោះបានល្បីថា ជនដៃដល់បានជិះម៉ូតូទៅលោតទឹកពីលើស្ពានត្សឹបាសា ហៅស្ពានអ្នកលឿង ។
ឃាតកម្មនេះជាករណីដ៏ឃោរឃៅស្មានមិនដល់មួយ ដែលបានកើតឡើងនៅវេលាម៉ោង០២ និង១០នាទីរសៀលថ្ងៃទី១៩ មេសា នៅចំណុចអនុវិទ្យាល័យហ៊ុន សែន កំពង់ចម្លង ស្ថិតក្នុងភូមិកំពង់ចម្លង ឃុំព្រែកទម្លាប់ ស្រុកលើកដែក ខេត្តកណ្តាល ។ នារីរងគ្រោះឈ្មោះ ទន់ ស្រីណយ អាយុប្រមាណ២០ឆ្នាំ មានទីលំនៅភូមិស្ពានដែក ឃុំព្រែកទម្លាប់ ស្រុកលើកដែក ។ ចំណែកជនដៃដល់ត្រូវបានគេស្គាល់ គឺឈ្មោះ រ៉ា ឆៃរ៉ាត់ អាយុប្រមាណ២១ឆ្នាំ មានទីលំនៅភូមិអំពិលទឹក ឃុំកំពង់ភ្នំ ស្រុកលើកដែក ។
ប្រភពដដែលបន្ដថា រវាងជនដៃដល់និងនារីរងគ្រោះ គឺជាប្តីប្រពន្ធនឹងគ្នា តែបានបែកបាក់លែងលះគ្នាអស់ប្រមាណជាង២ខែមកហើយ ដោយសារលោកប្ដីនេះ តែងវាយដំធ្វើបាបមកលើនាងជាប្រពន្ធញឹកញាប់ ។ លុះមកដល់ថ្ងៃទី១៩ មេសា ជនដៃដល់ជាអតីតប្តី បានមកសុំនារីរងគ្រោះជាប្រពន្ធដើម្បីជានាគ្នាវិញ តែនារីរងគ្រោះជាអតីតប្រពន្ធមិនព្រមជួបមុខឡើយ ទើបមកដល់វេលាម៉ោង២ និង១០នាទី ស្រាប់តែលោកប្តីដែលជាជនដៃដល់បានយកកាំបិតផ្គាក់ មកកាប់ទៅលើនាងចំ.ក៣កាំបិត ខណៈនាងកំពុងជិះម៉ូតូបណ្ដាលឱ្យធ្លាក់ពីលើម៉ូតូស្លាប់ក្នុងថ្លុកឈាមយ៉ាងទាន់ហន់ ។ ក្រោយពីធ្វើការកាប់ប្រហាររួច ជនជាឃាតករនេះបានរត់គេចខ្លួនបាត់ស្រមោល។ ភ្លាមៗនោះ សមត្ថកិច្ចបានចាប់ជនដៃដល់ ខណៈដែលជននេះរត់គេចខ្លួនទៅដល់ស្ពានអ្នកលឿងបានព្យាយាមលោតទឹកសម្លាប់ខ្លួនពីលើស្ពាន ។
សមត្ថកិច្ចបានបញ្ជាក់ឱ្យដឹងថា អ្នកទាំង២ជាអតីតប្តីប្រពន្ធនឹងគ្នា ព្រោះទើបតែលែងលះគ្នាបានប្រមាណ២ខែមុននេះ ដោយសារតែរស់នៅមិនចុះសម្រុងនឹងគ្នា ។ ទាក់ទិននិងហេតុការណ៍ខាងលើនេះ ត្រូវបានក្មេងប្រុសអាយុ១៦ឆ្នាំម្នាក់ ដែលជាអ្នកឃើញហេតុការណ៍នោះផ្ទាល់តែម្តងបានរៀបរាប់ថា មុនពេលកើតហេតុរូបគេ និងនារីរងគ្រោះបានជិះម៉ូតូជួបគ្នាចៃដន្យនៅក្នុងសាលាកន្លែងកើតហេតុ ហើយបានសួរនាំគ្នារបៀបអ្នកស្គាល់គ្នាបាន២ទៅ៣ម៉ាត់ រូបគេក៏ជិះម៉ូតូចេញ ហើយភ្លាមនោះក៏ក្រឡេកឃើញបុរសឈ្មោះ រ៉ា ឆៃរ៉ាត់ រត់ចេញពីគល់ដើមអំពិលបារាំងសំដៅមករកនារីរងគ្រោះ ដោយក្នុងដៃមានកាន់កាំបិតផ្គាក់ផង ឃើញបែបនេះរូបគេក៏ឈប់ម៉ូតូមើលសិន ។
ក្មេងប្រុសដដែលនេះបានបញ្ជាក់ទៀតថា ពីដំបូងឃើញជនល្មើសជាប្តីសួរនាំនារីរងគ្រោះជាប្រពន្ធតាមធម្មតា តែនិយាយគ្នាបាន២ទៅ៣ម៉ាត់ ស្រាប់តែជនល្មើសកាប់ទៅលើនារីរងគ្រោះចំនួន២កាំបិតផ្គាក់ ចំផ្ទៃមុខខាងឆ្វេង ។ ភ្លាមៗនោះនារីរងគ្រោះបានស្ទុះថយក្រោយបន្តិចរួចក៏ដួល ហើយជនល្មើសក៏កាប់ថែមមួយកាំបិតទៀត បណ្តាលឱ្យនាងប្រកាច់ស្លាប់ភ្លាមៗនៅហ្នឹងកន្លែង ។ ចំណែករូបគេឃើញហេតុការណ៍សាហាវបែបនេះ មានការភ័យរន្ធត់ហើយក៏រត់ទៅប្រាប់អ្នកលក់នំក្នុងសាលា និងរត់ទៅប្តឹងសមត្ថកិច្ចឱ្យជួយអន្តរាគមន៍ភ្លាមផងដែរ ។ ប៉ុន្តែពេលមកដល់កន្លែងកើតហេតុវិញ គឺឃើញតែសពនារីរងគ្រោះ ចំណែកជនល្មើសបានរត់គេចខ្លួនបាត់ទៅហើយ ។
ដោយឡែក ប្រភពព័ត៌មានពីប្រជាពលរដ្ឋនៅជុំវិញកន្លែងកើតហេតុនេះ បានអះអាងថា ក្រោយពីធ្វើសកម្មភាពសម្លាប់អតីតប្រពន្ធរួច គេឃើញជនដៃដល់បានLiveវីដេអូផ្ទាល់ នៅក្នុង facebook បង្ហាញពីសកម្មភាពរបស់គេ កំពុងលោតសម្លាប់ខ្លួនពីលើស្ពានត្សឹបាសា ហៅស្ពានអ្នកលឿងផងដែរ ។ ទោះជាយ៉ាងណាភ្លាមៗនោះមានមនុស្សជាច្រើន បាននាំគ្នារត់ទៅតាមមើលនៅលើស្ពានអ្នកលឿង និងនៅតាមដងទន្លេមេគង្គ ខាងក្រោមស្ពានអ្នកលឿង តែមិនប្រទះឃើញជននោះទេ ។ប្រភពព័ត៌មានពីក្រុមគ្រួសារខាងជនដៃដល់ជាអតីតប្តីបានឱ្យដឹងថា ប្តីប្រពន្ធមួយគូនេះ ទើបតែលែងលះគ្នាបានរយៈពេលជាងមួយខែប៉ុណ្ណោះ ហើយមូលហេតុនៃការលែងលះ គឺដោយសារតែជនដៃដល់ មិនជួយរកស៊ីប្រពន្ធទេរកលុយបានចាយតែឯងមិនឱ្យប្រពន្ធទុកដាក់ ហើយមានទំនាស់ជាមួយប្រពន្ធជាញឹកញាប់ រហូតប្រពន្ធទ្រាំលែងបានក៏ប្តឹងសុំលែងលះតែម្តង។ ថ្មីៗនេះជនល្មើសបានព្យាយាមតាមសុំអតីតប្រពន្ធផ្សះផ្សារគ្នាវិញដែរ តែប្រពន្ធមិនព្រម ។
ដោយឡែក ខាងសមត្ថកិច្ចបានឱ្យដឹងដែរថា សកម្មភាពកាប់ប្រហារប្រពន្ធនេះ គឺជនដៃដល់មានផែនការទុកជាមុនរួចទៅហើយ ដោយនៅក្បែរកន្លែងកើតហេតុ គេឃើញមានដបសាំង២ដប ដែលមានសាំងពេញ ដែលជនល្មើសយកមកតាមខ្លួនជាមួយនិងកាំបិតផ្គាក់ ក្នុងបំណងចាំស្ទាក់សម្លាប់អតីតប្រពន្ធតែម្តង ។ ចំណែកមូលហេតុនៃការសម្លាប់ប្រពន្ធនេះ ជំហ៊ានដំបូងសមត្ថកិច្ចបានសន្និដ្ឋានថា ដោយសារខឹងសុំប្រពន្ធផ្សះផ្សារត្រូវគ្នាវិញមិនបាន ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ