ខេត្តកំពង់ចាម ៖ ក្រោមការស្រាវជ្រាវរបស់សមត្ថកិច្ចដឹកនាំដោយលោកឧត្តមសេនីយ៍ត្រី ហេង វុទ្ធី ស្នងការរងនគរបាលខេត្ត ទទួលផែនកណ្តាលព្រហ្មទណ្ឌ សហការជាមួយលោកវរសេនីយ៍ទោ ឆាន់ គឹមលី…
ខេត្តកំពង់ចាម ៖ ក្រោមការស្រាវជ្រាវរបស់សមត្ថកិច្ចដឹកនាំដោយលោកឧត្តមសេនីយ៍ត្រី ហេង វុទ្ធី
ស្នងការរងនគរបាលខេត្ត ទទួលផែនកណ្តាលព្រហ្មទណ្ឌ សហការជាមួយលោកវរសេនីយ៍ទោ ឆាន់
គឹមលី ជំនាញនាយកដ្ឋានព្រហ្មទណ្ឌ។ រហូតដល់វេលាម៉ោង៤ និង១៥នាទីរសៀល ថ្ងៃទី១៩ មេសា ២០១៨ ចាប់បានឃាតកជាស្ត្រីម្នាក់ឈ្មោះ ពិន ជា អាយុ៤៤ឆ្នាំ នៅភូមិអូរជ្រូក ឃុំក្រូច ស្រុកព្រៃឈរ
ដែលបានប្រើទឹកអាស៊ីតលបវាយប្រហារលើប្តីរបស់ខ្លួន កាលពីវេលាម៉ោង១២ និង៣០នាទីយប់រំលង
អាធ្រាត្រឈានចូលព្រឹកថ្ងៃទី១៧ មេសា បណ្តាលឲ្យស្លាប់។ លោកវរសេនីយ៍ឯក កែវ ស៊ាងហ៊ន់ អធិការនគរបាលស្រុកព្រៃឈរ ប្រាប់ឲ្យដឹងថា នៅក្នុងពេលដែលយប់កើតហេតុនោះបុរសជាប្តីឈ្មោះ មិន នួន អាយុ៤១ឆ្នាំ កំពុងតែដេកលង់លក់នៅលើផ្ទះឈើស្រាប់តែស្ត្រីជាប្រពន្ធដែលមានកំហឹងជាមួយនឹងប្តី ដោយមិនអាចទប់ចិត្តបាននោះក៏ប្រើប្រាស់ទឹកអាស៊ីតមកជះលើប្តីត្រូវមុខ និងខ្លួនប្រាណបណ្តាលឲ្យ របួសជាទម្ងន់ផងដែរ។
អធិការនគរបាលស្រុកព្រៃឈរ ប្រាប់បន្តថា ក្រោយពីកើតហេតុ ប្រពន្ធបានទាញម៉ូតូមួយគ្រឿងជិះគេចខ្លួនដោយយកទៅទុកនៅផ្ទះឪពុក ហើយបានដើរកាត់តាមព្រៃ ចេញដល់ខេត្តកំពង់ធំ ក៏បានឡើងជិះរថយន្តបន្តទៅកាន់ខេត្តបាត់ដំបង ដោយសម្ងំនៅទីនោះ។ ចំណែកបុរសជាប្តីវិញត្រូវបានសាច់ញាតិបញ្ជូន មកសង្គ្រោះនៅមន្ទីរពេទ្យខេត្ត តែមិនទាន់នឹងដល់ផងនោះក៏បានដាច់ខ្យល់ស្លាប់តាមផ្លូវ ហើយបានដឹកត្រលប់យកផ្ទះវិញ ដើម្បីរៀបចំធ្វើបុណ្យទៅតាមប្រពៃណី។ ក្រោយពីកើតហេតុនេះត្រូវបានលោកឧត្តមសេនីយ៍ទោ ឯម កុសល ស្នងការនគរបាលខេត្ត និងលោកឧត្តមសេនីយ៍ត្រី ហេង វុទ្ធី ស្នងការរងនគរបាលខេត្ត បានចាត់ឲ្យកម្លាំងនគរបាលខេត្ត និងស្រុកសហការគ្នា ធ្វើការស្រាវជ្រាវតាមចាប់ស្ត្រីជាប្រពន្ធ ដែលកំពុងតែរត់គេចខ្លួននោះ។
លោកវរសេនីយ៍ឯក កែវ ស៊ាងហ៊ន់ អធិការនគរបាលស្រុកព្រៃឈរ បានរំលឹកថា កាលពីក្នុងអំឡុងឆ្នាំ២០១០ និង២០១១ បុរសជាប្តីឈ្មោះ មិន នួន បានចូលទៅលួច កាប់ព្រៃម៉ៃសាក់របស់រដ្ឋដែលដុះនៅក្បែរមណីយដ្ឋានទឹកឆា ហើយត្រូវបានសមត្ថកិច្ចចាប់ខ្លួន ដោយបានបញ្ជូនទៅដាក់ពន្ធនាគារខេត្ត។ តែប្រពន្ធអាណិតប្តីពេកក៏បានទៅខ្ចីលុយពីគេ ដើម្បីរត់ការដោះប្តីចេញពីពន្ធនាគារខេត្ត លុះពេលដែលប្តីចេញមកវិញក៏ស្រាប់តែបានបែកគំនិត ទៅលួចរៀបការប្រពន្ធថ្មីនៅខេត្តកំពង់ស្ពឺ ដោយចោលប្រពន្ធ និងកូនចំនួន២នាក់។ ប្រពន្ធខឹងនឹងប្តីណាស់គឺភាគច្រើននៅតែជាមួយនឹងប្រពន្ធចុងឯណោះស្របពេលមកដល់យប់ថ្ងៃទី១៦ មេសា ២០១៨ យប់ជ្រៅរំលងអាធ្រាត្រឈានចូលព្រឹកថ្ងៃទី១៧ មេសាប្រពន្ធក៏បានប្រើប្រាស់ទឹកអាស៊ីតវាយប្រហារ ស្រោចលើប្តីកំពុងតែដេកលក់បណ្តាលឲ្យស្លាប់។
លោកឧត្តមសេនីយ៍ត្រី ហេង វុទ្ធី ស្នងការនគរបាលខេត្តប្រាប់ឲ្យដឹងដែរថា ក្នុងករណីមនុស្សឃាតខាង
លើនេះរូបលោកបានដឹកនាំកម្លាំងមន្ត្រីក្រោមឱវាទចុះស្រាវជ្រាវជាបន្ទាន់ រហូតមកដល់វេលាម៉ោង៤ និង១៥នាទីរសៀល ថ្ងៃទី១៩ មេសា ស្ត្រីជាប្រពន្ធដែលក្លាយទៅជាឃាតកនោះ ត្រូវបានចាប់ខ្លួនត្រង់ចំ
ណុចលើកំណាត់ផ្លូវជាតិលេខ៧ ត្រង់ភូមិត្រពាំងធំ ឃុំស្រងែ ស្រុកព្រៃឈរ បញ្ជូនមកកាន់ស្នងការដ្ឋាន
នគរបាលខេត្តដើម្បីចាត់វិធានការតាមច្បាប់៕
ចែករំលែកព័តមាននេះ