រាជធានីភ្នំពេញ ៖ អង្គការសិល្បៈខ្មែរអមតៈ នាំការសម្ដែងរបាំបុរាណ និងប្រពៃណី គ្រប់គ្រងដំឡើងដោយអ្នកគ្រូវ័ន សាវ៉ៃ អតីតនាដកាឯករបាំព្រះរាជទ្រព្យ និងព្រះអង្គម្ចាស់ស៊ីសុវត្ថិ តេសូ ប្រធានក្រុមរបាំព្រះរាជទ្រព្យ ដោយការសម្តែងនៅសារមន្ទីរជាតិភ្នំពេញ។ ផ្ទាំងទស្សនីយភាពរបាំចម្រុះសម្ដែងដោយសិល្បករ៣០នាក់ រយៈពេល១ម៉ោងនេះ នឹងនាំទស្សនិកជនឆ្លងកាត់ពេលវេលាអតីតកាលចាប់តាំងពីការកកើតផែនដី កំណើតអប្សរា និងជីវភាពរីករាយតាមស្រុកស្រែចម្ការនៃប្រទេសកម្ពុជារហូតដល់សព្វថ្ងៃ ។
ការសម្ដែងចាប់ពីថ្ងៃទី១៩ ខែមេសា ម៉ោង ៧យប់តទៅនៅឆាកសម្ដែងសិល្បៈខ្មែរអមតៈ បរិវេណសារមន្ទីរជាតិ ភ្នំពេញ រយៈពេល៦ថ្ងៃ ក្នុងមួយសប្ដាហ៍ ពីថ្ងៃចន្ទដល់ថ្ងៃសៅរ៍ ។
របាំដែលសម្ដែងរួមមាន របាំអប្សរា មុនីមេខលា របាំគោះអង្រែ និងរបាំជាច្រើនមុខផ្សេងទៀត ដែលមិនសូវឃើញសម្ដែងនៅទីកន្លែងនានា ។ ក្រៅពីការសម្ដែងជាមួយនឹងបៀវត្សរ៍ជាប្រចាំហើយ ក្រុមសិល្បករត្រូវការភាពជិតស្និទ្ធជាមួយប្រធានសិល្បៈ ធំៗ បង្កើតការទាក់ទង កសាងសមត្ថភាព និងអភិវឌ្ឍខ្លួនតាមរយៈវគ្គបណ្ដុះបណ្ដាលរៀបចំឡើងដោយសិល្បៈខ្មែរអមតៈ ដើម្បីក្លាយក្រុមរបាំគំរូមួយដែលមានសមត្ថភាពគ្រប់គ្រងសម្រាប់និរន្តរភាពអាជីពរបស់ពួកគេនាពេលអនាគត ។
ការសម្ដែងនេះជាផ្នែកមួយនៃការងារសហគ្រាសវប្បធម៌ក្រោមកម្មវិធីពិសោធសិល្បៈខ្មែរអមតៈ ដែលជាកម្មវិធីនាំយកបទពិសោធន៍សិល្បៈ និងវប្បធម៌ដ៏សំបូរបែបរបស់កម្ពុជាទៅកាន់ទស្សនិកជនក្នុងស្រុក និងក្រៅស្រុក ដែលជាកត្តាជួយពង្រីកទីផ្សារការងារដល់សិល្បករខ្មែរ ។ ជារៀងរាល់ឆ្នាំ មានទស្សនិកជនច្រើនជាង២០.០០០នាក់ បានទទួលបទពិសោធន៍អំពីបេតិកភណ្ឌរស់ និងទម្រង់សិល្បៈ និងវប្បធម៌ខ្មែរដ៏សំបូរបែបពីកម្មវិធីនេះ ។
នាយិកាសិល្បៈអ្នកគ្រូ វ័ន សាវ៉ៃ មានប្រសាសន៍ថា៖«នេះជាជំហានទីមួយ ហើយខ្ញុំសង្ឃឹមថា សិល្បករនឹងសម្ដែងបានយ៉ាងល្អ ហើយដើម្បីអាចឲ្យក្ដីសង្ឃឹមនេះក្លាយជាការណ៍ពិត លុះត្រាតែអ្នកទាំងអស់គ្នា មានក្ដីសង្ឃឹមរួមគ្នា និងដូចគ្នា ។ សម្រាប់ខ្ញុំ ខ្ញុំតែងតែចង់បានអ្វីដែលឥតខ្ចោះ ហើយខ្ញុំត្រូវតែសម្រេចឲ្យបាន…ក្ដីសង្ឃឹមធំបំផុតរបស់ខ្ញុំគឺចង់ឃើញសិល្បៈខ្មែររីកចម្រើន និងសំបូរបែបដូចពីមុន» ។
សិល្បកររិទ្ធិ ដារ៉ូ បាននិយាយថា៖«ខ្ញុំមានអារម្មណ៍ភ័យផង និងអរផង សម្រាប់ការចូលរួមការសម្ដែងថ្មីនៅសារមន្ទីរជាតិនេះ ។ មានកត្តាជាច្រើនដែលជំរុញឲ្យខ្ញុំនៅបន្តការងារនេះ។ នោះគឺក្ដីស្រឡាញ់ និងជំនឿចិត្តលើក្រុមដែលជំរុញឲ្យខ្ញុំយកឈ្នះលើគ្រប់ឧបសគ្គ ហើយការហ្វឹកហាត់បន្ថែមកន្លងមកនេះបានជួយពង្រឹងសមត្ថភាពខ្ញុំបានស្គាល់ពីខ្លួនឯង ខ្ញុំចង់បានអ្វី និងខ្ញុំត្រូវការអ្វី »។
ស្សង់-បាទីស្ត៍ ភូ ប្រធានកម្មវិធីច្នៃប្រឌិតអង្គការសិល្បៈខ្មែរអមតៈឲ្យដឹងថា៖ «យុទ្ធសាស្ត្រ៥ឆ្នាំថ្មីរបស់សិល្បៈខ្មែរអមតៈ រួមមានការបង្ហាញ ការឧបត្ថម្ភគាំទ្រហិរញ្ញវត្ថុ
និងការបង្កើតស្នាដៃ ថ្មីៗ ព្រមទាំងជួយគាំទ្រសិល្បករក្នុងការបង្ហាញកម្ពុជានាពេលបច្ចុប្បន្នតាមរយៈស្នាដៃពួកគេ ។ ស្នាដៃថ្មីនេះគឺជាឱកាសធំមួយសម្រាប់ពួកគេ ។ តាមរយៈនេះ វាបានបង្កើតការងារដល់សិល្បករ៣០នាក់ ស្របពេលជាមួយគ្នាដែរ យើងក៏មានឱកាសបានទស្សនាស្នាដៃដ៏គួរឲ្យរំភើបនេះ ។ យើងពិតជាសំណាងណាស់ដែលបានធ្វើការជាមួយអ្នកគ្រូ សាវ៉ៃ និងព្រះអង្គម្ចាស់ តេសូ ហើយយើងសូមថ្លែងអំណរគុណដល់លោកទាំងពីរដែលបានខិតខំប្រឹងប្រែងក្នុងការងារនេះ ព្រមទាំងចក្ខុវិស័យសិល្បៈវែងឆ្ងាយផងដែរ »៕
ចែករំលែកព័តមាននេះ