រាជធានីភ្នំពេញ ៖ ក្រោយបញ្ចប់ការប្រណាំងពេញរយៈពេល២ថ្ងៃកាលពីថ្ងៃសៅរ៍ទី២៦ សីហា និងថ្ងៃអាទិត្យទី២៧ សីហា ក្នុងឆ្នាំ២០១៦ កន្លងទៅ គេកត់សម្គាល់ថា ទីលានប្រណាំងម៉ូតូ King Track Circuit ស្ថិតក្នុងសង្កាត់ឃ្មួញ ខណ្ឌសែនសុខ ម្ដុំមណ្ឌលឱកាសខ្ញុំ មានសកម្មភាពខ្លាំងទាំងការប្រណាំងលេងៗ និងហ្វឹកហាត់ ។ ប៉ុន្តែសកម្មភាពទាំងនេះ ត្រូវគេកត់សម្គាល់ថាចាប់ផ្ដើមស្ងប់ស្ងាត់ទៅវិញនៅក្នុងរយៈពេលចចុងក្រោយ ទើបបណ្ដាលឱ្យអ្នកមានជំនាញប្រណាំងម៉ូតូ និងអ្នកចង់ក្លាយជាកីឡាករផ្នែកនេះ បែកខ្ញែកដូចមុន ធ្វើឱ្យអ្នកវិភាគនិយាយថា បើសហព័ន្ធកីឡាប្រណាំងម៉ូតូកម្ពុជា មិនមានទីលានប្រណាំងផ្ទាល់ខ្លួនទេហើយពឹងផ្អែកតែទីលានប្រណាំងម៉ូតូឯកជននោះ គឺកីឡាមួយនេះនឹងមិនងាយរឹងមាំនោះទេនៅក្នុងស្ថានការណ៍ដែលកម្ពុជាក៏មិនខ្លាំងក្លាលើកីឡាប្រភេទគ្រោះថ្នាក់នេះស្រាប់។
លោក គង់ ធារ៉ា អ្នករៀបចំព្រឹត្តិការណ៍ប្រណាំងម៉ូតូថ្នាក់ជាតិ និងជាអ្នកគ្រប់គ្រងទីលាន King Track Circuit ធ្លាប់បានបញ្ជាក់ថា ការប្រកួតប្រណាំងម៉ូតូដែលបានធ្វើឡើងនាពេលកន្លងទៅ មិនត្រឹមតែជួយឱ្យកម្ពុជារកឃើញអ្នកជំនាញជិះម៉ូតូប៉ុណ្ណោះទេ តែក៏ធ្វើឱ្យអ្នកមានចំណូលចិត្តប្រណាំងម៉ូតូច្រើននាក់ចាប់អារម្មណ៍ក្នុងការហ្វឹកហាត់នៅលើទីលានផងដែរ ។ ចាប់តាំងពីទីលានរបស់លោកដំណើរការលោកថាបានប្រមូលផ្ដុំកីឡាករជាអ្នកជំនាញខាងផ្នែកប្រណាំងម៉ូតូ ដែលភាគច្រើនជាអ្នករស់នៅភ្នំពេញ និងមកពីបណ្ដាខេត្តសរុបប្រមាណ៦៦រូបឱ្យបង្ហាញខ្លួនក្នុងវេទិកាប្រកួតប្រជែងដែលបានធ្វើឡើង ខណៈដែលអ្នកប្រណាំងម៉ូតូប្រមាណ៣០០នាក់នៅទូទាំងប្រទេសក៏ជ្រើសយកទីលានដែលលោកបង្កើតឡើងប្រកួតគ្នាស្ទើរជារៀងរាល់ថ្ងៃ ។ កម្លាំងម៉ូតូដែលទីលានរបស់លោករកឃើញជើងខ្លាំងនៅក្នុងពេលនោះរួមមាន កម្លាំងម៉ូតូប្រភេទ១១០CC, ១២៥CC, ១៥០CC និងធំជាង១៥០CC ដែលជាប្រភេទម៉ូតូកែច្នៃ ។ លោកថា នៅក្នុងប្រទេសកម្ពុជាមានអ្នកប្រណាំងម៉ូតូតែ៤កម្រិតដូចបានរៀបរាប់ខាងលើប៉ុណ្ណោះ ចំណែកប្រភេទផ្សេងគឺមិនសូវមានទេ ទើបក្នុងពេលបើកប្រកួតទីលានរបស់លោកសម្រេចយកតែ៤ប្រភេទនោះ ដោយសូម្បីតែអ្នកមកជួលទីលានរបស់លោកប្រណាំងម៉ូតូ ឬហ្វឹកហាត់ជិះម៉ូតូ ក៏ច្រើនតែក្នុងប្រភេទកម្លាំងម៉ូតូដែលបានកំណត់នោះដែរ ។
លោកថា តាំងពីបើកដំណើរការទីលាន លោក និងសហព័ន្ធកីឡាប្រណាំងម៉ូតូកម្ពុជាទើបតែបានរួមគ្នាបើកការប្រកួតផ្លូវការបានមួយលើកប៉ុណ្ណោះ ដោយលោកប្រកាសថា
នឹងរៀបចំជាបន្តបន្ទាប់ទៀត ដើម្បីលើកស្ទួយវិស័យប្រណាំងម៉ូតូដែលមិនសូវត្រូវបានមហាជនចាប់អារម្មណ៍ ឱ្យមានសន្ទុះឈានឡើង ។ លោកបានទាំងប្រកាសថា នឹងធ្វើឱ្យទីលាន King Track Circuit ក្លាយជាទីលានប្រណាំងម៉ូតូលំដាប់អន្តរជាតិ មិនតែប៉ុណ្ណោះលោកក៏មានគម្រោងរៀបចំឱ្យមានការប្រណាំងម៉ូតូជាទ្រង់ទ្រាយធំក្នុងឆ្នាំ២០១៨នេះផងដែរ ។
លោកថា មកទល់ពេលនេះ ទីលានរបស់លោកបានទទួលអ្នកជួលហ្វឹកហាត់មិនក្រោម១០ម៉ូតូនោះទេក្នុង១ថ្ងៃ ដោយលោកបានទាំងចំណាយការរៀបចំប្រកួតរៀងរាល់មួយសប្ដាហ៍ម្ដង មួយខែម្ដង និង៣ខែម្ដង ដើម្បីជាការលើកទឹកចិត្តដល់កីឡាករ ។ ទោះបីយ៉ាងណា ក្រោយការប្រកាសនេះ គេបែរជាកត់សម្គាល់ឃើញទីលានរបស់លោកមិនសូវមានសកម្មភាពដូចមុនទៅវិញ ។ ធៀបនឹងរយៈពេលនៃការបើកសម្ពោធភ្លាមៗ មកទល់ពេលនេះ គឺសកម្មភាពមានការប្រែប្រួលមិនដូចមុនទេ សូម្បីតែអ្នកចូលរួមហ្វឹកហាត់ និងចូលរួមប្រណាំងប្រជែងក៏មិនសូវសស្រាក់សស្រាំដែរ ។
លោក គង់ ធារ៉ា បានអះអាងថា ហេតុផលដែលនៅក្នុងទីលានរបស់លោកមិនសូវមានសកម្មភាពគគ្រឹកគគ្រេងដូចការប្រកាសឡើង គឺដោយសារតែលោកខ្វះដៃគូដើម្បីរៀបចំព្រឹត្តិការណ៍ប្រកួតប្រជែង ឯអ្នកចង់ហ្វឹកហាត់ និងអ្នកចង់ក្លាយជាកីឡាករអាជីពក៏មានការកាត់បន្ថយដែរ ។ មកទល់ពេលនេះ លោកបានទទួលស្គាល់ថា ទីលានរបស់លោកចាប់ផ្ដើមស្ងប់ស្ងាត់ជាងមុន ដោយសារតែខ្វះដៃគូរៀបចំការប្រកួត ក្នុងពេលដែលលោកក៏ចាប់ផ្ដើមទម្លាក់ដៃក្នុងការប្រឹងប្រែងធ្វើឱ្យវិស័យនេះដើរទៅមុខ ដូចអ្វីដែលធ្លាប់អះអាងនោះផងដែរ ។ លោកថា ដើម្បីទាក់ទាញអ្នកចូលហ្វឹកហាត់ឱ្យបានច្រើន ទី១លុះត្រាតែមានកញ្ចប់ហ្វ្រីដល់អ្នកចង់ហ្វឹកហាត់ និងត្រូវមានការលើកទឹកចិត្តផ្សេងទៀតសម្រាប់អ្នកមានទេពកោសល្យ ប៉ុន្តែមកពីកញ្ចប់ទាំងនេះមិនមាន ទើបលោកយល់ថាគឺជារឿងលំបាកមួយ ដោយសារតែលោកក៏មិនអាចចំណាយលុយរៀបចំទីលានអស់ប្រាក់ខ្ទង់លាន ហើយបើកឱ្យហ្វឹកហាត់ដោយមិនគិតថ្លៃ ខណៈដែលកីឡាករដែលមានលុយមកហ្វឹកហាត់ ក៏ហ្វឹកហាត់តាមគ្នា និងមិនសូវយូរអង្វែង ព្រោះតែគ្មានការជ្រោមជ្រែង។
ធ្លាប់មានការទម្លាយថា ហេតុផលដែលទីលានមួយនេះ មិនមានការប្រកួតធំដុំជាថ្មីក្រោយបើកដំណើរការ គឺមិនមែនដោយសារតែខ្វះដៃគូនោះទេ ប៉ុន្តែបណ្ដាលមកពីលោកគង់ ធារ៉ា មិនបានចំណាយទុនដាំស្មៅ និងធ្វើអគារដើម្បីឱ្យកីឡាករ និងអ្នកចូលរួមមានទីកន្លែងជ្រកកំដៅ ទើបដៃគូដែលចង់រៀបចំការប្រកួតជាប្រចាំនៅក្នុងទីលានរបស់លោកមិនអាចធ្វើបាន ។ ភាគីខាងម្ចាស់ស្ពុនស័រម្នាក់ធ្លាប់បានទម្លាយថា ក្រុមហ៊ុនធំៗមួយចំនួនបានសម្រេចរៀបចំការប្រណាំងម៉ូតូប្រចាំសប្ដាហ៍ដោយមានគម្រោងដាក់ផ្សាយនៅលើកញ្ចក់ទូរទស្សន៍MY TV រួចរាល់អស់ហើយ ប៉ុន្តែនៅពេលខាងទូរទស្សន៍ និងក្រុមហ៊ុនដៃគូសម្រេចចិត្តបោះទុន គឺលោកគង់ ធារ៉ា បែរជាសម្រេចចិត្តរំសាយទៅវិញ ។
ប្រភពនោះបន្តថា លោក គង់ ធារ៉ា ប្រកាសរំសាយដោយសារតែហេតុផលអ្នកចាប់ដៃធ្វើកម្មវិធីតម្រូវឱ្យដាក់កីឡាករចូលប្រណាំងដោយមិនប្រកាន់បក្សពួក ហើយតម្រូវឱ្យលោកគង់ ធារ៉ា បើកទីលានឱ្យកីឡាករដែលមានឈ្មោះចូលប្រកួតដោយស្មើភាព ប៉ុន្តែលោកបានច្រានចោល ទើបការរៀបចំមួយនេះមិនអាចទៅរួច ។ ប្រភពនោះបន្តថា ទីលានប្រណាំងម៉ូតូឯកជន មិនអាចធ្វើឱ្យកីឡាប្រណាំងម៉ូតូនៅកម្ពុជាមានការរីកចម្រើនស្រួលទេ ដោយសារតែទីលានឯកជនពេលខ្លះក៏ធ្វើសកម្មភាពដើម្បីតែចំណេញមួយរយភាគរយ មិនអាចឱ្យអ្នកមានជំនាញលើវិស័យនេះតស៊ូចំណាយលុយឱ្យមាននិរន្តរភាពទៅបាន ។ អ្នកវិភាគទាមទារឱ្យសហព័ន្ធកីឡានេះ រកជំនួយបង្កើតឱ្យបានទីលានមួយផ្ទាល់ខ្លួន ហើយបើកឱកាសឱ្យអ្នកចង់ក្លាយជាកីឡាករហ្វឹកហាត់ដោយស្មើភាព ទើបអាចរក្សា និងរកឃើញអ្នកខ្លាំងក្នុងវិស័យនេះដោយពិតប្រាកដបាន ។
យ៉ាងណាមិញ មន្ត្រីសហព័ន្ធធ្លាប់បានបញ្ជាក់ហើយថា ខ្លួនមិនទាន់មានលទ្ធភាពបង្កើតទីលានផ្ទាល់ខ្លួនបានទេ ប៉ុន្តែក្នុងពេលដ៏ខ្លីអាចនឹងមានតម្រុយ៕
ចែករំលែកព័តមាននេះ