ខេត្តកែប ៖ លោកតាចំណាស់ម្នាក់បានរងរបួសយ៉ាងធ្ងន់ធ្ងរត្រូវបានសាច់ញាតិដឹកទៅសង្គ្រោះភ្លាមៗនៅមន្ទីរពេទ្យបង្អែកខេត្ត ខណៈកំពុងធ្វើដំណើរដោយជិះកង់ហើយត្រូវម៉ូតូបើកបរដោយក្មេងស្រីជិះឌុបគ្នាពីរនាក់ខាងក្រោយបុកតាកំពុងតែជិះកង់លើផ្លូវជាតិលេខ៣៣A ស្ថិតនៅចំណុចភូមិកែវក្រសាំង សង្កាត់កែប ក្រុងកែប កាលពីវេលាម៉ោង២និង៣០នាទីរសៀល ថ្ងៃទី១៧ ខែមេសា ឆ្នាំ២០១៨ សមត្ថកិច្ចចរាចរក្រុងកែបឲ្យដឹងថា លោកតាដែលជាជនរងគ្រោះមានឈ្មោះ នៃ ឈិន អាយុ៦៥ឆ្នាំ រស់នៅភូមិ-សង្កាត់កើតហេតុខាងលើ(របួសធ្ងន់) ។
ចំណែកអ្នកបើកបរម៉ូតូបង្កមានឈ្មោះ អោង ស្រីស្រស់ ភេទស្រី អាយុ១៦ឆ្នាំ(របួសស្រាល) និងអ្នករួមដំណើរ២នាក់ ទី១-ឈ្មោះ ផាប់ សុឃីម ភេទស្រី អាយុ១៦ឆ្នាំ (របួសស្រាល) និងទី២-ឈ្មោះ គយ ស្រីពីងពាង ភេទស្រី អាយុ២១ឆ្នាំ (របួសស្រាល) ទាំងបីនាក់រស់នៅភូមិអំពេង ឃុំអង្កោល ស្រុកដំណាក់ចង្អើរខេត្តកែប ។
សមត្ថកិច្ចចរាចរបានបញ្ជាក់ថា មកពីការបើកបរខ្វះការប្រុងប្រយ័ត្នទើបបណ្តាលឲ្យជួបហេតុការយ៉ាងដូច្នេះ ចំពោះអ្នករងរបួសត្រូវបានដឹកទៅសង្គ្រោះនៅមន្ទីរពេទ្យ ចំណែកវត្ថុតាងម៉ូតូ និងកង់ត្រូវបាននាំយកទៅរក្សាទុកនៅអធិការដ្ឋាននគរបាលក្រុងកែបរង់ចាំការដោះស្រាយតាមផ្លូវច្បាប់នៅពេលក្រោយ ៕
ចែករំលែកព័តមាននេះ