ខេត្តសៀមរាប ៖ នៅទីបំផុតយុវជន សុខ លឹមហេង បានគ្រងតំណែងជាស្ដេចអុកអង្គរ សង្ក្រាន្តប្រចាំឆ្នាំ២០១៨បន្ទាប់ពីឆ្លងកាត់ការប្រកួតយ៉ាងស្វិតស្វាញអស់រយៈពេល៣ថ្ងៃចាប់ពីថ្ងៃទី១៤ដល់១៦មេសា នៅក្រុងអង្គរខេត្តសៀមរាប ដោយបានផ្ដួលគូប្រកួតដែល សុទ្ធតែជាជើងខ្លាំងក្នុងនោះក៏មានស្ដេចអុកអង្គរសង្ក្រាន្តប្រចាំឆ្នាំ២០១៤-២០១៥ឈាវ…
ខេត្តសៀមរាប ៖ នៅទីបំផុតយុវជន សុខ លឹមហេង បានគ្រងតំណែងជាស្ដេចអុកអង្គរ
សង្ក្រាន្តប្រចាំឆ្នាំ២០១៨បន្ទាប់ពីឆ្លងកាត់ការប្រកួតយ៉ាងស្វិតស្វាញអស់រយៈពេល៣ថ្ងៃចាប់ពីថ្ងៃទី១៤ដល់១៦មេសា នៅក្រុងអង្គរខេត្តសៀមរាប ដោយបានផ្ដួលគូប្រកួតដែល
សុទ្ធតែជាជើងខ្លាំងក្នុងនោះក៏មានស្ដេចអុកអង្គរសង្ក្រាន្តប្រចាំឆ្នាំ២០១៤-២០១៥ឈាវ បូរ៉ា ផងដែរ។
យុវជន សុខ លឹមហេង អាយុ១៩ឆ្នាំ ជានិស្សិតឆ្នាំទី១នៃវិទ្យាស្ថានវ៉ាន់ដាគណនេយ្យ ធ្លាប់ចូលរួមប្រកួតកីឡាអុកចត្រង្គនេះចំនួន៣ឆ្នាំរួចមកហើយ និងទទួលបានចំណាត់ថ្នាក់លេខ៣នៅឆ្នាំ២០១៧ ។ ទោះបីយ៉ាងណា សុខ លឹមហេង នៅតែព្យាយាមចូលរួមប្រកួតជារៀងរាល់ឆ្នាំបើទោះជាព្រឹត្តិការណ៍មួយនេះសម្បូរទៅដោយជើងខ្លាំងមកពីគ្រប់ទិសទីក៏ដោយ ក៏គេមិនព្រមរាថយដែរ។
ជាក់ស្ដែងនៅឆ្នាំ២០១៨នេះ សុខ លឹមហេង បានចូលរួមប្រកួតវគ្គជម្រុះជុំចុងក្រោយនៅរាជធានីភ្នំពេញ ជាមួយកីឡាករជើងខ្លាំងចំនួន២៥នាក់ផ្សេងទៀតហើយជាលទ្ធផល
កីឡាកររូបនេះបានជាប់ក្នុងចំណោមបេក្ខភាព៨នាក់ឡើងទៅប្រកួតដណ្ដើមតំណែងស្ដេចអុកអង្គរសង្ក្រាន្តប្រចាំឆ្នាំ២០១៨នៅខេត្តសៀមរាប ។
ឆ្លងកាត់ការប្រកួតអស់ជាច្រើនដំណាក់កាលទីបំផុតគេបានឡើងមកដល់វគ្គផ្ដាច់ព្រ័ត្រចុងក្រោយហើយបានទម្លាក់ស្ដេចអុក២ជំនាន់ឈាវ បូរ៉ា ឱ្យធ្លាក់មកនៅជើងឯករងទាំងមិនអស់ចិត្ត។ ចំណែកចំណាត់ថ្នាក់លេខ៣បានទៅលើកីឡាករធឹម ឌីណា និងចំណាត់ថ្នាក់លេខ៤បានទៅលើកីឡាករស៊ីវ ស៊ីន។
គួរបញ្ជាក់ផងដែរថា យុវជនសុខ លឹមហេង ដែលគ្រងតំណែងស្ដេចអុកអង្គរសង្ក្រាន្តប្រចាំឆ្នាំ២០១៨ទទួលបានប្រាក់រង្វាន់សរុប៤២លានរៀលក្នុងនោះ១០លានរៀលបានមកពីការប្រកួត ២០លានរៀលបានមកពីការឧបត្ថម្ភរបស់សម្ដេចតេជោហ៊ុន សែន ១០លានរៀលបានពីលោកអភិបាលខេត្ត និង២លានរៀលបានពីសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន៕
ចែករំលែកព័តមាននេះ