ស្លាកយានយន្តហាក់មិនប្រែប្រួលច្រើនទេ ចាប់តាំងពីរថយន្តបានបង្កើតឡើងកាលពីជាង១សតវត្សរ៍កន្លងមក ប៉ុន្ដែនៅពេលប៉ុន្មានឆ្នាំមកនេះ ស្លាកលេខឌីជីថលត្រូវបានគេនិយាយថា អាចនឹងកើតមានឡើង ហើយវាពិតជាអាចកើតមានមែន ដោយសារតែគេគ្រោងនឹងអនុវត្តសាកល្បងនៅទីក្រុងឌូបៃឆាប់ៗនេះ ។
យោងតាមសារព័ត៌មាន BBC បានឲ្យដឹងថា ឌូបៃនឹងចាប់ផ្តើមសាកល្បងស្លាកលេខឌីជីថល «ស្លាកលេខឆ្លាតវៃ» នៅលើយានយន្តមួយចំនួននៅខែក្រោយ ។ ហេតុផលរបស់អាជ្ញាធរទីក្រុងឌូបៃសម្រាប់ការសាកល្បងនេះ នឹងអនុញ្ញាតឲ្យមានការឆ្លើយតបបន្ទាន់កាន់តែលឿន ប្រសិនបើអ្នកបើកបរកំពុងជួបគ្រោះថ្នាក់ ឬរថយន្ដត្រូវគេលួច ។ សេវាដូចជា ការចុះឈ្មោះរថយន្តសាជាថ្មី ការបង់ប្រាក់ និងការពិន័យដោយសារចតខុស នឹងអាចទូទាត់បានភ្លាមៗ ដោយសារតែស្លាកលេខពិសេសនេះ ។
ប៉ុន្តែដោយសារមានការបំពាក់ប្រព័ន្ធ GPS ទៅលើស្លាកលេខនេះ ទើបមានមតិមិនគាំទ្រលើកឡើងថា វាអាចនឹងបំពានទៅលើភាពឯកជន ។ លេខអាជ្ញាប័ណ្ណអាចផ្លាស់ប្តូរដោយអាជ្ញាធរដឹកជញ្ជូនពីចម្ងាយ មានន័យថា ពួកគេអាចនឹងត្រូវបានជនខិលខូចលួច (Hack) ។
BBC ក៏បាននិយាយផងដែរថា បរិយាកាសវាលខ្សាច់នៅទីក្រុងឌូបៃ ជាមួយនឹងកំដៅដីខ្សាច់ ក៏អាចជាបញ្ហាប្រឈមចំពោះបច្ចេកវិទ្យានេះផងដែរ ។
នៅរដ្ឋកាលីហ្វ័រនីញ៉ា បានចាប់ផ្តើមធ្វើតេស្តសាកល្បងលើការប្រើប្រាស់ស្លាកលេខឆ្លាតវៃតាំងពីឆ្នាំ២០១៣ ។ នៅដើមឆ្នាំនេះ ពួកគេបានចាប់ផ្តើមអនុវត្តវាហើយ ។ នេះពិតជាបង្ហាញពីទំនើបកម្មដ៏លឿនសម្រាប់មនុស្សជាតិមែន ៕
ចែករំលែកព័តមាននេះ