ខេត្តស្វាយរៀង ៖ ស្ត្រីវ័យចំណាស់ម្នាក់រងបួសធ្ងន់ធ្ងរហើយបានស្លាប់ ខណៈដែលក្រុមគ្រួសារបញ្ជួនទៅសង្គ្រោះនៅមន្ទីពេទ្យខេត្តស្វាយរៀង និងបុរសជាប្តីរងរបួសធ្ងន់រួមម្ចាស់ផ្ទះលក់អីវ៉ាន់ម្នាក់ទៀតរងរបួសស្រាល ។ ក្នុងហេតុការណ៍គ្រោះថ្នាក់ចរាចរណ៍មួយគួរឱ្យរន្ធត់ដែលលោកតាជាប្តីជិះម៉ូតូឌុបប្រពន្ធទៅបង់លុយធានាគារមួយនៅទីប្រជុំជនផ្សារជីភូហើយបានជិះម៉ូតូឆ្លងថ្នល់មិនប្រយ័ត្នត្រូវរថយន្តធុនយក្សដឹកដីបុកអូសក្រោមរថយន្តជាង១០ម៉ែត្របណ្តាលឱ្យស្ត្រីចំណាស់ស្លាប់ និងបុរស់ជាប្តីរងរបួសធ្ងន់ រីឯម្ចាស់ផ្ទះរបួសស្រាល ។
ករណីគ្រោះថ្នាក់ចរាចរណ៍បានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី១៨ ខែមេសា ឆ្នាំ២០១៨នៅលើផ្លូវជាតិលេខ០១ ចន្លោះគីឡូម៉ែត្រលេខ១៤១-១៤២ ស្ថិតក្នុងភូមិកណ្តៀងរាយ ឃុំកណ្ដៀងរាយ ស្រុក ស្វាយទាប ខេត្តស្វាយរៀង ។
បើតាមប្រភពពីកន្លែងកើតហេតុបានឱ្យដឹងថា នៅមុនពេលមានម៉ូតូម៉ាកសង់កូរ៉េ ពណ៌ក្រហម ពាក់ផ្លាកលេខ ស្វាយរៀង ១C-៦២២៨ បើកបរដោយឈ្មោះ លី សាបាន ភេទប្រុស អាយុ៦២ឆ្នាំ មុខរបរកសិករ រស់នៅភូមិជប់ ឃុំកណ្តៀរាយ ស្រុកស្វាយទាប ខេត្តស្វាយរៀង (មិនពាក់មួកសុវត្ថិភាព) ឌុបអ្នករួមដំណើរម្នាក់ឈ្មោះ សួស សំអី ភេទស្រី អាយុ៥៧ឆ្នាំ ត្រូវជាប្រពន្ធ រស់នៅភូមិជប់ ឃុំកណ្តៀរាយ ស្រុកស្វាយទាប (មិនពាក់មួក) ធ្វើដំណើរពីទិសខាងជើងទៅត្បូងក្នុងគោលបំណងទៅបង់លុយធានាគារ ។
លុះមកដល់ចំណុចកើតហេតុខាងលើក៏ឆ្លងថ្នល់បត់ទៅទិសខាងកើតស្របពេលនោះក៏មានរថយន្ត១គ្រឿង ពណ៌ក្រហម ពាក់ផ្លាកលេខ កំពង់ឆ្នាំង ៣A-០៥១៧ បើកបរពីទិសខាងកើតមកលិចយ៉ាងលឿនក៏បណ្តាលឲ្យបុកចំពីចំហៀងម៉ូតូពេញទំហឹងអូសទាំងម៉ូតូទាំងមនុស្សជាង១០ម៉ែត្រ ហើយរថយន្តនោះមិនទាន់អស់ល្បឿនក៏ជ្រុលទៅបុកសំយ៉ាបមុខផ្ទះលក់ឥវ៉ាន់ចាប់ហួយនៅខាងត្បូងផ្លូវ និងប៉ះមនុស្សដែលកំពុងនៅមុខផ្ទះឈ្មោះ ម៉ែន សោភ័ណ្ឌ ភេទស្រី អាយុ៥៩ឆ្នាំ រងរបួសស្រាល ។
ប្រភពបានឲ្យដឹងទៀតថា ក្រោយពីបង្កហេតុអ្នកបើកបររថយន្តបានរត់គេចពីកន្លែងកើតបាត់ស្រមោលតែម្តង ។ ចំណែកអ្នករងរបួសទាំងអស់បានបញ្ចូនទៅមន្ទីរពេទ្យបង្អែកស្វាយទាប ប៉ុន្តែដោយជនរងគ្រោះស្ត្រីចំណាស់មានសភាពធ្ងន់ធ្ងរពេកក៏បញ្ជួនបន្តទៅកាន់មន្ទីរពេទ្យខេត្តស្វាយរៀងបន្តតែអកុសលស្ត្រីជាប្រពន្ធបានស្លាប់ពេលទៅដល់មន្ទីរពេទ្យខេត្ត ចំណែកបុរសជាប្តីកំពុងសង្គ្រោះបន្ទាន់នៅមន្ទីរពេទ្យខេត្តស្វាយរៀង ។ រីឯមធ្យោបាយទាំងពីរយកទៅរក្សាទុកនៅអធិការដ្ឋាននគរបាលស្រុកស្វាយទាប ៕
ចែករំលែកព័តមាននេះ