ខេត្តក្រចេះ ៖ មន្ត្រីជំនាញរដ្ឋបាលព្រៃឈើក្រចេះ បានបញ្ជាក់ថា ស្ថាប័នជំនាញកំពុងតែ កសាងសំណុំរឿងករណីភ្លើងឆេះឡាន វត្ថុតាងបទល្មើសព្រៃឈើ ដែលរក្សាទុកនៅក្នុងស្នាក់ ការរដ្ឋបាលព្រៃឈើ ទៅសមត្ថកិច្ចគ្រប់លំដាប់ថ្នាក់…
ខេត្តក្រចេះ ៖ មន្ត្រីជំនាញរដ្ឋបាលព្រៃឈើក្រចេះ បានបញ្ជាក់ថា ស្ថាប័នជំនាញកំពុងតែ កសាងសំណុំរឿងករណីភ្លើងឆេះឡាន វត្ថុតាងបទល្មើសព្រៃឈើ ដែលរក្សាទុកនៅក្នុងស្នាក់ ការរដ្ឋបាលព្រៃឈើ ទៅសមត្ថកិច្ចគ្រប់លំដាប់ថ្នាក់ ដើម្បីមានវិធានការរកមុខសញ្ញាជនបង្ក ។ ព្រោះថា ករណីនេះ វាមិនមែនជាឧប្បត្តិហេតុនោះទេ វាជាចេតនារបស់ជនបង្កដែលប៉ុនប៉ង ដុតបំផ្លាញរថយន្តដែលជាវត្ថុតាងដឹកជញ្ជូនបទល្មើសព្រៃឈើ បង្កឲ្យកើតមានជាមហន្តរាយធ្ងន់ធ្ងរ ។
តាមការបញ្ជាក់ឲ្យដឹងនៅថ្ងៃទី១៨ មេសានេះ នាយផ្នែករដ្ឋបាលព្រៃឈើក្រចេះ លោក អ៊ីង ស៊ី ណាងបានអះអាង មេព្រៃបានធ្វើពាក្យបណ្តឹងទៅនគរបាល និងអយ្យការ ដើម្បីមានវិធានការស្រាវជ្រាវរកមុខជនបង្កលើករណីនេះ ។
ការបញ្ជាក់របស់លោកនាយផ្នែករដ្ឋបាលព្រៃឈើបានធ្វើឡើងក្រោយរយៈពេល៣ថ្ងៃ គឺកាលពីយប់ថ្ងៃទី១៦ មេសា មានករណីភ្លើងឆេះរថយន្តបទល្មើសដឹកឈើមួយ គ្រឿង បានបង្កឲ្យមានការភ្ញាក់ផ្អើលនៅស្ថានីយបណ្តុះកូនឈើខ្សារ ដែលមានទីតាំងជាប់ និងផ្លូវជាតិលេខ៧ ស្ថិតក្នុងដែនគ្រប់គ្រង របស់ផ្នែករដ្ឋបាលព្រៃឈើក្រចេះ ។
បើទោះជាការឆេះនេះត្រូវបានអាជ្ញាធរកំណត់ថា ជាឧប្បត្តិហេតុដោយសារទុស្សក្បាល អាគុយរថយន្ត ទើបបង្កឲ្យមានការឆេះរាលដាល ឬក៏ជាចេតនារបស់ជនបង្កយ៉ាងណាក៏ដោយ ក៏ការឆេះនេះ មិនបានរាលដាលឲ្យខូចខាតធ្ងន់ធ្ងរនោះដែរ ដោយសារតែភ្លាមៗត្រូវបានរថយន្តពន្លត់អគ្គិភ័យរបស់នគរបាលស្រុកចិត្របុរី ចុះជួយបាញ់ពន្លត់ ទប់ស្កាត់បានទាន់ពេលវេលា ។
មន្ត្រីរដ្ឋបាលព្រៃឈើបានឲ្យដឹងថា រថយន្តដែលរងការឆេះនេះ ជាប្រភេទរថយន្តសាំយ៉ុង គឺបានចាប់បង្ក្រាបកាលពីអំឡុងកន្លះឆ្នាំមុន ពាក់ព័ន្ធ និងករណីដឹកជញ្ជូនឈើខុសច្បាប់ ។ ហើយការឆេះនោះក៏មិនមានបង្កជាមហន្តរាយធ្ងន់ធ្ងរអ្វីនោះដែរ ដោយគ្រាន់តែមានរថយន្ត សាំយ៉ុង១គ្រឿង និងឈើក្តារដែលផ្ទុកនៅពីលើមានចំនួនតិចតួចត្រូវបានឆេះ ។
សមត្ថកិច្ចថា ប្រសិនបើមិនមានការចុះជួយបាញ់ពន្លត់ទាន់ពេលទេនោះអគ្គិភ័យនេះ និងបង្កឲ្យមានមហន្តរាយធ្ងន់ធ្ងរមិនខានព្រោះថា ក្នុងបរិវេណថ្នាលបណ្តុះកូនឈើដែលជា ស្នាក់ការធំមួយសម្រាប់រក្សាទុកវត្ថុតាងបទល្មើសព្រៃឈើ មានឈើរាប់ពាន់ម៉ែត្រគូប និង រថយន្តរាប់រយគ្រឿង ដែលបានចាប់បង្ក្រាប និងនាំមករក្សាទុកនៅក្នុងនោះ គឺនិងអាចក្លាយជា ចំណីភ្លើងមិនខាន ៕
ចែករំលែកព័តមាននេះ