រាជធានីភ្នំពេញ ៖ មន្ត្រីរាជការក្រោមឱវាទរដ្ឋបាលរាជធានីភ្នំពេញ ចំនួន២៦រូប ត្រូវបានប្រកាសតែងតាំងជានាយករងរដ្ឋបាល ,នាយក នាយករងទីចាត់ការ និងប្រធាន អនុប្រធានការិយាល័យក្នុងរចនាសម្ពន្ធ័រដ្ឋបាលរាជធានីភ្នំពេញ ។ ពិធីប្រកាសតែងតាំងនេះបានធ្វើឡើងនៅរដ្ឋបាលរាជធានីភ្នំពេញនាព្រឹកថ្ងៃទី១៨ មេសានេះ ក្នុងអធិបតីភាពលោកឃួង ស្រេង អភិបាលនៃគណៈអភិបាលរាជធានីភ្នំពេញ និងមានការចូលរួមពីមន្ត្រីរាជការជាច្រើនរូបទៀត ។
លោកឃួង ស្រេង ក្នុងឱកាសនោះបានថ្លែងការកោតសរសើរចំពោះការខិតខំប្រឹងប្រែងរបស់បងប្អូនមន្ត្រីរាជការក្រោមឱវាទរដ្ឋបាលរាជធានីភ្នំពេញ ព្រមទាំងទទួលបានលទ្ធផលយ៉ាងល្អប្រសើរក្នុងការបម្រើ និងអភិវឌ្ឍន៍រាជធានីភ្នំពេញ ។ លោកបន្តថា រដ្ឋបាលរាជធានីភ្នំពេញមានតួនាទីសំខាន់ជាប្រតិបត្តិការក្នុងការបម្រើសេវាសាធារណៈ ជូនប្រជាពលរដ្ឋទាំងសេវាសំណូមពរ និងសេវាតម្រូវ ។
លោកបន្តថា ជាមន្ត្រីត្រូវខិតខំពង្រឹងសមត្ថភាព មានភាពទន់ភ្លន់ រួសរាយរាក់ទាក់ជាមួយបងប្អូនប្រជាពលរដ្ឋដែលមករកសេវា ត្រូវធានាថា សេវារបស់ខ្លួនប្រកបដោយតម្លាភាព គណនេយ្យភាព និងបង្កើនសាមគ្គីភាព ផ្ទៃក្នុង និងប្រកាន់ជំហរជាអ្នកបម្រើ និងការពារផលប្រយោជន៍របស់ប្រជាពលរដ្ឋ ។
លោកឃួង ស្រេង មានប្រសាសន៍ទៀតថា រដ្ឋបាលរាជធានីភ្នំពេញមានប្រព័ន្ធ Hot Line សម្រាប់ទទួលព័ត៌មានប្រជាពលរដ្ឋ តែប្រព័ន្ធ Hot Line នេះហាក់ដូចជា មិនសូវដំណើរការ ដូច្នេះត្រូវបន្តពង្រឹងHot Lineនេះឡើងវិញ នៅពេលដែលប្រជាពលរដ្ឋបានងាកទៅប្រើប្រព័ន្ធFacebook ។ តែទោះបីយ៉ាងណាយើងមានប្រអប់សំបុត្រ ដើម្បីទទួលព័ត៌មានពីប្រជាពលរដ្ឋនៅតាមសង្កាត់ ខណ្ឌ ។
គួរបញ្ជាក់ថា មន្ត្រីរដ្ឋបាលរាជធានីភ្នំពេញដែលត្រូវប្រកាសតែងតាំងមានចំនួន២៦រូបនោះ រួមមានលោកស្រីសក់ ចិន្តារី ជានាយករងរដ្ឋបាលរាជធានីភ្នំពេញ លោក កែវ ពន្លក ជានាយករងរដ្ឋបាលរាជធានីភ្នំពេញ លោក សុខ ចំរើន ជានាយកទីចាត់ការទំនាក់ទំនងសាធារណៈ និងសហប្រតិបន្តិការអន្តរជាតិ លោកស្រី ដោ សម្ផស្ស ជានាយិការងទីចាត់ការរដ្ឋបាល ។ ចំណែក២២រូបទៀត ដែលមិនបានរៀបរាប់ឈ្មោះអស់នោះ ត្រូវបានតែងតាំង ជានាយក នាយករងទីចាត់ការ និងប្រធាន អនុប្រធានការិយាល័យផងដែរ ៕
ចែករំលែកព័តមាននេះ