ខេត្តស្វាយរៀង ៖ យុវជនបានស្លាប់ភ្លាមៗនៅនឹងកន្លែងកើតហេតុខណៈដែលបើកម៉ូតូលឿនដូចហោះទៅបុកនឹងរថយន្តធ្វើដំណើរមកពីមុខបញ្ច្រាសទិសគ្នាពេញទំហឹងបណ្តាលឲ្យអ្នកជិះម៉ូតូហោះប៉ើងបុកក្បាលនឹងរថយន្តបែកក្បាលស្លាប់ភ្លាមៗនឹងកន្លែង រីឯម៉ូតូ និងរថយន្តខូចខ្ទេចទាំងសងខាងយ៉ាងដំណំ ។ ករណីនេះបានកើតឡើងកាលពីវេលាម៉ោង០៥និង៣០នាទីល្ងាចថ្ងៃទី១៦ ខែមេសា ឆ្នាំ២០១៨ នៅលើផ្លូវជាតិលេខ១ត្រង់ចំណុច ចន្លោះគីឡូម៉ែត្រលេខ១៤៦-១៤៧ ស្ថិតក្នុងភូមិថ្នល់ជាតិ សង្កាត់ច្រកម្ទេស ក្រុងបាវិត ។
បើតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុមានរថយន្ត១គ្រឿងម៉ាកហាយលែនឌ័រ ពណ៌ស ពាក់ផា្លកលេខ ភ្នំពេញ ២Y-០៧២៧ បើកបរដោយឈ្មោះ ថោង ភិនណារ៉ា ភេទប្រុស អាយុ ៤៧ឆ្នាំ មុខរបរមន្ត្រីរាជការ មានទីលំនៅភូមិឧត្តម ឃុំព្រែកខ្សាយ ស្រុកពាមរ៍ ខេត្តព្រៃវែង ធ្វើដំណើរពីកើតទៅលិចលុះមកដល់ចំណុចកើតហេតុខាងលើក៏មានម៉ូតូមួយគ្រឿងម៉ាកហុងដាឌ្រីម សេ១២៥ ស៊េរីឆ្នាំ២០០៥ ពណ៌ខ្មៅពាក់ ផ្លាកលេខ ស្វាយរៀង ១A-៨០៦៤ បើកបរដោយឈ្មោះ តួ បុរស ភេទប្រុស អាយុ២២ឆ្នាំ មុខរបរបុគ្គលិកកាស៊ីណូ មានទីលំនៅភូមិត្រពាំងក្រពឹស ឃុំខ្សែត្រ ស្រុកកំពង់រោទ៍ ខេត្តស្វាយរៀង មានមួកសុវត្ថិភាពគ្មានកញ្ចក់មើលក្រោយបើកបរពីលិចទៅកើតបញ្ច្រាសទិសគ្នាស្រាប់តែរេចង្កូតម៉ូតូទៅបុកចំពីមុខពេញទំហឹងបណ្តាលឱ្យក្បាលបោកទៅកញ្ចក់រថយន្តបែកក្បាលធ្ងន់ធ្ងរស្លាប់នៅនឹងកន្លែងកើតហេតុតែម្តង ។ រីឯអ្នកបើកបររថយន្តក៏ឈប់រថយន្តរួចបើកទ្វារថយន្តរត់គេចខ្លួនបាត់ស្រមោលឈឹងបន្សល់ទុកតែរថយន្តនៅនឹងកន្លែង ។
ក្រោយពីកើតហេតុសមត្ថកិច្ចបានចុះមកធ្វើការវាស់វែងធ្វើកំណត់ហេតុ និងសម្រួលចរាចរណ៍រួចយកម៉ូតូ និងរថយន្តដែលជាវត្ថុតាងទៅរក្សាទុកនៅអធិការដ្ឋាននគបាលក្រុងបាវិតដើម្បីកសាងសំណុំរឿងបញ្ជូនទៅការិយាល័យនគបាលចរាចរណ័ស្នងការដ្ឋាននគបាលខេត្តចាត់ការបន្ត ៕
ចែករំលែកព័តមាននេះ