ខេត្តស្វាយរៀង ៖ យ៉ាងហោចមនុស្សម្នាក់បានស្លាប់ និង៤នាក់ទៀតរងរបួសធ្ងន់ស្រាលខណៈដែលបើកបរមិនប្រកាន់ស្តាំបុកគ្នាចំពីមុខពេញទំហឹងលាន់ដូចរន្ទះ ។ ករណីគ្រោះថ្នាក់ចរាចរណ៍នេះបានកើតឡើងកាលពីម៉ោង៦និង៣០នាទីល្ងាចថ្ងៃទី១៦ ខែមេសា ឆ្នាំ២០១៨ នៅលើផ្លូវលំក្រាលក្រួសក្រហមមួយខ្សែ ស្ថិតក្នុងភូមិថា្នញ សង្កាត់បាទី ក្រុងបាវិត ខេត្តស្វាយរៀង ។
បើតាមប្រភពពីកន្លែងកើតហេតុបានអោយដឹងថា នៅមុនពេលកើតហេតុគេឃើញម៉ូតូ១គ្រឿងម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០០៥ ពាក់ផ្លាកលេខ កំពង់ចាម ១A-៥១៣៥ បើកបរដោយឈ្មោះ សេក ហឿន ភេទប្រុស អាយុ២៥ឆ្នាំ មុខរបរកម្មករមានទីលំនៅភូមិធ្លកសង្កាត់ ច្រកម្ទេសក្រុងបាវិត ខេត្តស្វាយរៀង បើកបរពីត្បូងទៅជើងមានអ្នករួមដំណើរម្នាក់ឈ្មោះ ម៉ាប់ នៅភូមិធ្លក សង្កាត់ច្រកម្ទេស ក្រុងបាវិត ។
លុះបើកបរ ដល់ចំណុចកើតហេតុខាងលើក៏បានបុកជាមួយនឹងម៉ូតូ១គ្រឿងទៀតម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៨ ពាក់ផ្លាកលេខ ស្វាយរៀង ១l-៥៦២២ បើកបរដោយឈ្មោះ វឿន រតនះ ភេទប្រុស អាយុ២៥ឆ្នាំ ជនជាតិខ្មែរ មុខរបរកសិករ មានទីលំនៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង រងរបួសធ្ងន់ និងអ្នករួមដំណើរ២នាក់ទៀតទី១-ឈ្មោះ សៀង ហៃ ភេទប្រុស មានទីលំនៅភូមិបាវិតលើ សង្កាត់បាវិត ក្រុងបាវិត រងរបួសស្រាល និងទី២-ឈ្មោះ សោន ភេទប្រុស មានទីលំនៅភូមិបាវិតលើ សង្កាត់បាវិត ក្រុងបាវិត រងរបួសធ្ងន់ បាក់ភ្លៅខាងឆ្វេងអ្នកទាំងបីគ្មានមួកសុវតិ្ថភាព ម៉ូតូគ្មានកញ្ចក់មើលក្រោយបើកមកពីជើងទៅត្បូងបណ្តាលឲ្យអ្នកបើកបរម៉ូតូឈ្មោះ សេក ហឿន ស្លាប់នៅនឹងកន្លែង និងអ្នករួមដំណើររងរបួសធ្ងន់ ។
បច្ចុប្បន្នសាកសពសមត្ថកិច្ចបានធ្វើកំណត់ហេតុប្រគល់ជួនក្រុមគ្រួសារយកទៅធ្វើបុណ្យតាមប្រពៃណី ។ ចំណែកអ្នករងរបួសធ្ងន់ និងស្រាលត្រូវបានបញ្ជួនទៅព្យាបាលនៅមន្ទីពេទ្យបង្អែកជីភូ ។ រីឯវត្ថុតាំងទាំងពីរគ្រឿងត្រូវបានសមត្ថកិច្ចយកមករក្សាទុកនៅប៉ុស្តិ៍នគរបាលរដ្ឋបាលបាទីដើម្បីបំពេញសំណុំរឿងបញ្ជួនទៅការរិយាល័យជំនាញខេត្តចាត់ការបន្ត ៕
ចែករំលែកព័តមាននេះ